Ambo pun diawal 60-an TK di Ateh Ngarai, tapi lah dakek RRI ka RRI bangunannyo indak dakek ka Ngarai doh. Namonyo "TK Tunas Mekar"
-----Original Message----- From: [EMAIL PROTECTED] [mailto:[EMAIL PROTECTED] On Behalf Of A Bandaro Sent: Monday, September 26, 2005 6:52 AM To: [email protected] Cc: BANUANET; Henri Novis Subject: Re: [EMAIL PROTECTED] Bukiktinggi dari maso ka maso - Kpd sanak di rantaunet, ma'af, diquote sadono utk Banuanet. Mokasi Dave. TK diateh ngarai tu samo wak Dave. Rasono teka tu adolah teka partamo atau paliang tidak teka "paporit" jaman itu. 20-21 Feb 1958, Mustang tantara pusat manembak'i relay station di anak ayia-garegeh. Ambo dlm parjalanan pulang dari sikola SR-1 ( atau SR-2?)(kelas 2) disampiang "stadion" ateh ngarai. Mustang tu malayok diateh jam gadang, dek nan ditembak arah garegeh, ambo manonoton tembakan nantun sambia tagak sin dilabuah gadang di muko SR-8 tu ( kini Balai Sidang B Hatta). Ado urang tuo nan maenjo ambo katapi jalan balinduang masuak banda. Kelas 5 dan 6 SR ambo di SR-12 simpang mandiangin du. Wass Mak Ban ~~~~~~~~~ -----Original Message----- From: Muhammad Dafiq Saib Sent: 25 September 2005 22:05 To: [email protected] Subject: [EMAIL PROTECTED] Bukiktinggi dari maso ka maso - Jam Gadang cebol. Assalaamu'alaikum wa rahmatullahi wa barakaatuhu, Katiko kasudahanno Bulando tukang jajah tu mangalahan nagari Minangkabau dalam parang Paderi nan balangsuang cukuik lamo (1821 - 1837), mako laluaso lah no manaruko tanah-tanah kosong di salingkuangan nagari Kurai Limo Jorong. Bisa awak mambayangkan nan bahaso ka ciek-an area nan awak kalompok-an sabagai 'pasa ateh' kini, sajak dari parumahan Novotel kini, sampai ka Benteng (Fort de Kock) sampai ka kabun bungo adolah marupokan munggu, tanah katinggian, nan indak tapaliaro amek dan indak jaleh bana pasukuan nan maa nan manguasoi. Dek kosong dan buliah dikecek-an ndak batuan tulah, dapek Bulando managak-an Benteng, managak-an Jam Gadang, maagiah-an satumpak ketek tanah untuak ka jadi Kampuang Tjino dan sabagaino, hal nan saharusno indaklah mudah dino mangarajoan saandaino munggu atau tanah katinggian tu jaleh urang nan punyono. Tantu sajo indak mungkin awak kasampiangkan bahaso ado sajo bagian-bagian dari tanah rakyaik katiko itu nan memang iyo dirabuik-rampehno dek Bulando tukang jajah. Katiko Bulando mambuek jam gadang, mambuek benteng, mamaga tanah ka jadi kabun binatang nan awak warihi kinitu, apolai managak-an gareja gadang tibo kian dari Simpang Kangkuang, yakin bana pulo awak, adolo Sutan Parapatiah, Sutan Bandaro, Sutan Rumah Panjang, Sutan Lembang Alam di tahun 1800 sakian an tu nan manggarutu, nan sakik ati, nan indak dapek nan kadisabuik bangih atino ka urang Bulando panjang iduang nan mambuek bangunan antah-antaha ntun. Tapi aa nan kadisabuik, tagak dino sagalono tu, sampai-sampai jo satasiun kuretapi, nan mulo-mulo dulu mambauni asok batubaro no tu ado di antaro Datuak-datuak dan nak ka muntah. Itu alah jauah amek kalau ka awak caliak Bukiktinggi ka taun 1800 an. Katiko ambo baumua limo taun, taun 1956, ambo sikola taman kanak-kanak di TK di ateh ngarai. Pai sikola diantaanno di Allahyarham ayah ambo, bagonceangan jo kuretangin. Kami tingga di Jalan Lambau no 94, rumah agak kabalakang saketek dari tapi jalan Lambau tu. Dimukotu ado sakola Pertanian. Katiko urang ka parang PRRI barubah jadi asrama TP (tentara pelajar). Bik ati bana ambo mancaliak TP ko babarih-barih katiko itu. Pai sikola lalu ka jalan di muko SR 11 - 12. Bakelok kakida taruih kaarah Pasa Banto. Pasa Bantotu katiko itu adolah parantian bendi. Bakelok kasuok, taruih ka jalan dimuko rumah potong. Taruih ka Simpang Tembok, lalu dimuko RSU. Disabalah kida agak naiak kaateh 'bukik' saketek ado sender RRI. Sasudah simpang jalan masuak ka ngarai, taruih saketek lai kian, dakek panorama, disinan tulah sakola TK ambo. Katiko itu parantian oto di bawah jam gadang. Ado kantua gadang pulisi dakek kantua bupati lamo. Di tampek Novotel tagak kini ado SR No 8, tampek kakak ambo sikola katiko itu. Pasa ateh tadiri dari babarapo buah 'los' ado nan banamo los bagaluang. Di suok kida jalan kumidi, jalan dari arah jam gadang ka kabun binatang sabagian gadang adolah tampek toko ameh urang Guguak. Ado ciek toko olah raga punya urang Pasia Ampek Angkek, namono Toko Antimahal. Taun anam puluhan, sasudah parang PRRI, parantian oto pindak ka Pasa Banto. Parantian bendi pindah dari Pasa Banto ka lapangan di balakang stoplat kuretapi Aua Tajungkang. Di 'ateh' dibangun urang bioskop Sovia, bioskop / pangguang katigo sasudah Irian di pasa ateh jo Eri di muko panjaro. Parantian oto Padang - Bukiktinggi, Bukiktinggi - Payokumbuah sarato tujuan lain-lain nan dakek-dakek talatak di dalam Pasa Banto kinitu. Oto ka Medan ado stasiun no masiang-masiang tapisah. Ado Sibual-buali, ado Martimbang, ado ABS (Aek Batang-Gadis Sejati). Antar Lintas Sumatera datang alah agak kudian. Oto ka Pakan Baru bitu pulo. Ado Batang Kampar, ado Kampar Djaja, ado Tjahaja Kampar, ado Sinar Riau. Tapi oto ka Pakan Baru ko umumno di lua Pasa Banto, di suduik simpang tigo di bawah janjang ampek puluah, dakek pintu ka masuak ka pasa bawah. Di janjang ampek puluah bagian bawah disabalah kida ado toko roti urang Cino, si Tjoan namono. Tokono disabuik urang sin toko si Tjoan. Taun tujuah puluahan, katiko angku gadang mambangun nagari, jo pambangunan nan 'semangkin meningkat' tagaklah pasa batingkek. Parantian oto pindah ka Aua Kuniang. Pasa Banto jadi toko-toko, baitu pulo petak di balakang stoplat Aua Tajungkang, nan sabalunno sempat jadi parantian oplet ka Ampek Angkek jo ka Tilatang Kamang. Di jalan ka kampuang Cino, nan indak barubah sampai kini adolah rumah makan "Salamat". Ambo masih takana katiko di baono pai makan kian di ayah ambo saisuak. Bukik Tinggi tu barubah sajak saisuak, dan ka tatap juo barubah. Bukiktinggi awak saisuak indak samo jo Bukiktinggi urang kini do. Wassalamu'alaikum, Lembang Alam Website http://www.rantaunet.org _____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ____________________________________________________ Website http://www.rantaunet.org _____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ____________________________________________________
