Aia Angek:
Ciek lai Nagari "Aia Angek" di Tanah Data, kampuang Uda Dr. Rustam Didong,
ahli ekonomi, nan dahulu di UI jo LIPI. Ambo alah panah ka rumah urang
gaek baliau tahun 1964-65, dan tingga di rumah baliau di Jakarta sabalun
barangkek ka Rantau tanggal supersemar tahun 1966. Kalau awak dari
Bukittinggi ka Padangpanjang, lapeh dari Kotobaru, Nagari Aia Angek
talatak di sabalah kida jalan gadang tu, arah Timur, kalau awak taruih
bajalan ka ateh gunuang mangko dapek awak sampai ka Kapundan.
Di bawah Simpang Aia Angek tu, tampak di ambo kini ado babarapo restoran
mungkin gift shop bagai, di tapi tabiang sabalah ka suok jalan. Kalau awak
mancalaiak ka arah Barat, ka arah Gunuang Singgalang, mangko tampak jaleh
pamandangan nan manakjubkan nan indak ambo lupokan tiok lalu di sinan,
kampuang Angku Adyan, Ranah Pandai Sikek nan Indah.
Ambo sanang jo Aia Angek. Memang ado tabek aia angek. Wakatu ambo pulang
tahun 1985, aia angek tu nan ambo cari labiah dahulu. Sudah sumbayang
subuah di Kampuang ambo pai bahonda jo kamanakan. Urang baru jago lalok
boundok-undok kain saruang di sinan. Ambo lah anok-anok sin barandam di
kolam aia angek tu manikmati kurnia ilahi nan mahangek manyanangkan badan.
Indak dapek baranang doh karano agak babatu-batu dan indak talalu panjang
tabekno. Tapi isi aia tu batuka karano banda aia kaluano tatap mailia dan
aia baru tatap masuak. Iyo lamak kaangekan di pagi hari tu. Sudah
barandam-randam, basegeh baliak, ambo singgah minun kopi di Lapau dakek tu.
Sudah tu taruih bahonda ka Padang Panjang, lah agak siang, taruih lo ka
Lubuak Mato Kuciang. Sinan lah balapehkan urak-urak baranang di Lubuak Mato
Kuciang nan sadang elok panjang no. Lai sajam bakayaiaan baranang indak
baranti-ranti; tacangang-cangang anak-anak turih lokal mancaliak awak. Lah
duo puluah tahun sampai kini, masih rasono kapatang ko sajo rasono.
Koto Baru:
1. "Koto Baru" dakek Aia Angek tu, biaso juo disabuik "Koto Baru Bateh"
(tamasuak Tanah Data), jalan basimpang ka arah Barat ka Pandai Sikek, tantu
indak lupo jo Bika Si Ana. Dari Koto Baru nan iko malalui Pandai Sikek awak
dapek bajalan taruih ka Puncak Gunuang Singgalang. Lah ambo kawoan lo du
mandaki sampai ka puncak tun.
2. Ciek lai "Koto Baru" di Tilatang Kamang nan acok disabuik juo "Koto
Baru Salo" untuak mambedakanno jo Koto Baru Bateh tun. Koto Bru Salo ko
babtehan jo Panampuang Ampek Angkek. Kok taragak Karupuak Salo, iyo di
sinan sumberno banyak dijua urang di "Pakan Akaik" Koto Baru tu. Kok ka
mancari anak bada gai, sinan lo pusek no du. Biasono urang mantaranakkan
anak bada tu di Salo dakek Koto Baru tu, sahinggo ado Ungkapan nan biaso
kito dangansabagai garah "Urang Salo manjua Anak". (Kalau Koto Baru Bateh,
hari pakanno hari Silasa, samo jo hari Pakan Lasi).
3. Di Pek Ten, ado lo "Koto Baru"dakek Lampasi jo Piobang arahjalan ka Pek
Mudiak. Jan lupo, di Piobang ko ado lo Palabuhan Kapatabang. Kabano dahulu
ado rancana ka mambuek Observasi Angkasa di sinan sabagai tampek monitor
urang tabang-tabang ka Langik (nan katujuah :).
4. Di Solok kan adolo Koto Baru kan? Koto Baru ko jaleh pulo tampak dari
ambo dari ateh bukik Gantuang Ciri wakatu ambo malalah sinan dari Cupak jo
Talang ka Singkarak tahun 1958. Di Gantuang Ciri tu ambo basuodan maota jo
Angku A. Rivai Marlaut, wartawan senior Haluan, (dima lah kini?) sarato
pajabat-pajabat Solok nan sadang ijok di sinan.
5. Di Limo Puluah Koto ado lo "Pangkalan Koto Baru", nan biaso dipasingkek
urang sajo manyabuikno jo "Pangkalan".
6. Agak jauh saketek, di subarang, di Ujuang Utara pantai timur Nagari
Jiran, Malaysia, ado lo "Kota Bharu". Lah sampai lo mbo ka sinan du. Nan
ambo parajai di sinan, iyolah Sajarah Parang Dunia ka-2 indak dimuloi jo
Pearl Harbor, Hawaii doh. Tapi Tantara Japang manduduaki Kota Bharu
babarapo hari sabalun malantaki Pearl Harbor tu. Kok ado adidunsanak nan
sampai pai ka Kota Bharu ko jan lupo mancaliak Museum Parang Dunia ka-2,
langkok jo gambar-gambar koleksi nan jarang kito caliak. Tantara Japang ko
masuak ka Kota Bharu tu pakai koretangin (speda kecek Rang Kini)
mandedek-dedek, indak tadanga dek urang mareka masuak doh. Ado
gambar-gambarno di museum tun.
Aa, carito ambo ko pakai Caro Awak Koto Tuo na go Angku Lembang, baa du,
lai pasiah juo bunyi no ndak?
Kini, kok buliah ambo manyalekkan Salam di siko, iyo ambo ingin mangucapkan
Salam Salamat Puaso ka Adidunsanak sadono di Lapau kito nan baanggota
labiah dari 1300 ko. Walaupun indak banyak nan sato maota, hantap-hantap
saja, tapi tampakno tatap mangikuti ota. Barangkali kadang-kadang ado nan
tacangang atau tabosek galak jo garah atau galak kacimuih MakNgah, carito
atau tanyo-tanyo ganjia nan mungkin jarang tadanga. Karano itu, iyo indak
lai doh, ambo mintak maaf pulo ka Adidunsanak kasadoalahe nan adang adok.
Mudah-mudahan Ibadah Pusaso kito dan Ibadah-ibadah lainno nan kito buek
basarah diri, di tarimo Allah Subhanahuata'ala dengan kredit nan elok
untuak kito bawo ka "Rantau nan Paliang Jauah" nanti ... Amin.
Salam,
--Nyiak Sunguik
43397
From: "Muhammad Dafiq Saib" <[EMAIL PROTECTED]>
Date: Fri Sep 30, 2005 11:50am
Subject: Re: [EMAIL PROTECTED] Tanyo batanyo + bibit tanaman dari US
[EMAIL PROTECTED]
Assalaamu'alaikum wa rahmatullaahi wa barakaatuhu,,
Namo kampuang nan samo ado di nagari awak ni Ben, tapi mungkin ndak banyak.
Kampuang ambo namono Koto Tuo di kanagarian Balai Gurah. Ado pulo Koto Tuo
di Ampek Koto, di jalan ka Maninjau. Di Ampek Angkek ado namo nagari Batu
Taba. Di jalan ka Batu Sangka di kabupaten Tanah Data ado bulo Batu Taba.
Kacamatan kampuang ambo Ampek Angkek, di Pariaman ado pulo Ampek Angkek,
kampuang ajo Buyuang (nan alah indak panah mancumbok ka palanta awakko).
Katiko ambo karajo lapangan 'geologi' taun 1978 ambo masuak ka nagari Ayia
Angek di Sijunjuang. Dakek Padang Tarok di jalan ka Payokumbuah ado lo namo
nagari Ayia Angek. Kamang salain dari kampuang uni Isna, rasono ado pulo di
daerah Sijunjuang kalau ambo indak salah. Di Padang ado namo kampuang Koto
Marapak, di kami di Ampek Angkek ado pulo. Itu nan ambo tau. Mungkin ado juo
lai nan lain.
Wassalaamu'alaikum,
Lembang Alam
No virus found in this outgoing message.
Checked by AVG Anti-Virus.
Version: 7.0.344 / Virus Database: 267.11.8/114 - Release Date: 9/28/2005
Website http://www.rantaunet.org
_____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
____________________________________________________
