Antah dimaa lo dapek carito di bawah tu ek angku Zulhelmi. Iko ciek lai tambahan dari MakNgah:
Si Kayo saurang barado, rumahnyo rancak sagalo ado. Makannyo nan lamak-lamak. Kok inyo mamasak nan lamak-lamak, pintu jo jandelanyo dibukakkannyo supayo tabaun dek urang lalu dan tetangganyo. Si Pakiah tetangganyo urang kurang barado. Jarang inyo masak nan lamak-lamak. Satu kali Si Kayo datang ka Rumah si Pakiah mintak pitih. Tacangang si Pakiah: "Baa ka ambo mintak pitih, bagarah Tan Kayo go? Kan Tan Kayo Urang Kayo, ambo nan misti mintak pitih ka Tan Kayo." "Aden datang bukan mintak pitih ka Pakiah doh, mintak piutang" kecek si Kayo. "Aa utang ambo ka Tan Kayo?" tanyo si Pakiah. "Pakiah taruih kanyang dek baun samba den tiok hari den masak. Tapi Pakiah indak panah mamasak nan lamak-lamak saroman masakan den. Indak panah tabaun saketek juo di den doh. Jadi Den rugi surang...Pakiah misti baia baun tu!" Jadi, tacangak, tapurangahlah Si Pakiah. "Oooh mantun lo du Tan Kayo? keceknyo. "Kok iyo mantun, bialah ambo cari aka lu pambaianyo. Bialah bisuak ambo datang kumah Tan Kayo maantaan pambaianyo". Bisuaknyo, sabalauanpai sumbayang Jumaat, basegehlah si Pakiah pai elok-elok ka rumah si Kayo mambawo Puro Padang Barisi Pitih recek, bakilek-kilek, pitih simpanannyo. "Lai dumah Tan Kayo?" imbaunyo dari laman. "Lai Pakiah," jawab si Kayo, "Kumahlah", sambia manyikkokkan pintu. Mancaliak puro barisi pitih banyak tu, iyo baputa-puta incek mato si Kayo. "Duduaklah Kiah" Kecek si Kayo. Ndak usahlah Tan Kayo, ambo ka maantaan nan ambo janjian patang ko ha, sambia mamparagoan puro pitih badariang nan panuah tu. Dibukakannyo puro tu diparagoannyo isinyo pitih badaraai tu. "Buliah nak salasai lo utang piutang kito sabab hari pusaso lo kini, nak ditarimo Allah ibadaik kito". Tibo-tibo tajatuah puro tu ka lantai jubin Si Kayo. Badarianganlah bunyi pitih tu. Sabagian taserak kalua balenong-lenong di lantai. Baputa-puta lo incek mato si Kayo mancaliaknyo. "Maoh Tan Kayo," kecek si Pakiah sambia mangamemgehi pitih tu sarato mamasuakan pitih tu baliak ka dalam puro. Sudah tu, si Pakiah tagak, tagalak sengeng. "Lai tadanga dariang pitih tu dek Tan Kayo?" tanyo si Pakiah. "Lai," kecek si Kayo sambia galak. "Iyo sabana bunyi dariang pitih bana mah," kecek si Kayo. "Tarimo kasih Tan Kayo" kecek Si Pakiah sambia basalam, malangkah baliak ka pintu. "Eh, maa pitih tu, anto babawo baliak, indak jadi batinggaan pambaia utang?" kecek si Kayo. "Kan alah du kioh? Tapi Tan Kayo lah mandanga bunyinyo... Samo bakarilahan lah awak ....." kecek si Pakiah sambia bajalan galak mangkacimuih... Sudah tu si Pakiah taruih ka musajik. Tibo di Musajik, sudah sumbayang sunat manunggu Katik si Pakiah masih tagalak-galak nabi surang ... Alhamdulillah, alhamdulillah... Tuhan Allah Kayo Sungguah keceknyo galak surang ... Salam, --MakNgah At 09:59 AM 10/7/2005 +0700, Zulhelmi Umarsyah Iska wrote:
Tukang cukur
Internal Virus Database is out-of-date. Checked by AVG Anti-Virus. Version: 7.0.344 / Virus Database: 267.11.8/114 - Release Date: 9/28/2005
Website http://www.rantaunet.org _____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ____________________________________________________
