Nan Tacelak Dari PADANG EKSPRES Tan Koti Bapuaso" Oleh Viveri Yudi
Pinyangek di ujuang rantiang, tabang ka pulau angso duo. Kasiak angek pingganglah gantiang ... ... namun pukek di helo juo. Malabiahi ancak-ancak. Mangurangi jan sio-sio. Bayang-bayang sapanjang badan. Taraso kurang disangko labiah, saketek disangko ba nyak. Nan kayo bialah di kayonyo, nan bansaik ma-ansua basilambek. Co iko bana sariknyo hiduik. Apo nan dibali sagalo maha. Salamo hiduang ditam puah angok, baru kini lado labiah maha dari dagiang. Bangkak bana mato dek manangih, nan harago minyak indak ka turun juo. Kariang bana aia mato dek maratok, nan sakik hiduik indak ka sanang. Antah kok awak lai bausaho marubahnyo. ** Matohari hampia tabanam, cahayo galok-galok sanjo. Udaro taraso labiah angek pado nan biaso. Tan Koti hilia mudiak di tangah rumah, batilanjang da do. Di bahunyo tasandang baju kauih bulek lihia, sarupo jo baju nan acok dipakai toke cino. Paluah mailia dari ujuang rambuik sampai ka ujuang kaki. Sakali-sakali inyo tatagun, mahapuih paluah nan mahilia di batang tubuah. Tiok sabanta matonyo mancigok jam dindiang jo suduik mato. "Satangah jam lai..." Tan Koti bakato dalam hati. Tan Koti batambah rasah. Galang-galang di paruiknyo mulai maranyah. Sagalo pasandian taraso lamah. Diputanyo cingkunek radio. Badaruak-daruak bunyi nyo. Antah tangan nan kasa antah dek radio nan alah Tuo. Ceklekk! Drrrtt! Ngiiink-ngiiink! tadanga suaro radio mandangiang di talingo. Indak lamo antaronyo ka lua suaro, "Manolah dunsanak kasadonyo. Sabanta lai kito man danga kaba barito tantang nagari kito. Pokok-e sangkuikan talingo di 82,25 Hz, Radio Mati Pucuak FM!" Tan Koti galak dikulum, sanang hatinyo mandanga suaro kamanakannyo di radio. Dalam galak, Tan Koti tabayang maso lalu. Kutiko Ujang Lepis, panyiar radio tadi manyampaian niaiknyo mambuek stasiun radio di kampuangnyo. Radio Mati Pucuak FM namonyo. Wakatu itu Tan Koti bapasan; "Wak den sanang bana mandanga waang mambuek radio FM di nagari ko. Tapi kok dapek nan mamakai bahaso Minang." Ujang tangango, indak ma ngiro mamaknyo bapikia sarupo itu. Nan inyo danga Tan Koti urangnyo 'gaul'. Suko bagaua jo urang banyak. Mungkasuiknyo urang nan banyak harato, supayo lapeh salero. Inyo bangga manjadi urang Minang, walau labiah banyak 'Miang' dari pado Minangnyo. Sia nan madakek gata-gata dibueknyo. "Lai ado urang nan na muah mandanga radio awak tuh mak?" Ujang Lepis ma njawek sambia galak man cimeeh. "Sadangkan lai mamakai bahaso gaul jo bahaso Inggi rih-je lai indak didanga urang. Apolai babahaso Minang? Sia nan kanamuah mamuta siaran radio awak?" tukuak nyo. Tan Koti mahelo angok panjang. Jantuangnyo manggarik kancang. Cimeeh kamanakannyo tadi taraso lancang. Tapi inyo mamak urang, harus pandai baliku di nan tanang. Harimau bana dalam paruik, kambiang juo nan kalua dimuluik. "Usah waang bakato bakcando itu. Usah ditiru pulo bakcando siaran televisi di nagari awak ko. Acaranyo banamo Berita Ranah Minang, tapi siarannyo bahaso Indonesia. Indak ado kaba nan bahaso Minang... Ujang Lepis langsuang manangkok mungkasuik mamaknyo tadi. Kapalonyo maangguak-angguak mangarati. "Jan taulang kajadian nan tasuo di alek 'Dialog Kebudayaan Minangkabau', kapatangko. Malu awak! "Ba-a kok baitu kato mamak?" "Cubo simak dek waang jaleh-jaleh. Panitia maundang urang nan patuik manjadi wakia urang Minang." "Patuik manuruik sia mak..? "Tantu patuik manuruik panitia... "Sia panitianyo mak..? "Husss..! Usah waang banyak tanyo bana. Proyek tu maah..!" jawek Tan Koti jo muko masam. Sudah tu inyo malanjuika; "Diundang urang nan baradaik sarato bapangkaik. Langkok jo cadiak candokio nan bagala Dotor sarato Propesor. Tamasuak budayawan sarato intelek tual' Minangkabau." "Hebat yo mak..?" "Judulnyo lai hebat. Tapi nan wakden maraso asiang." "Ba-a mangko baitu mak?" "Sajak dari awa sampai akhia aden indak mandanga urang mangecek jo bahaso Minang. Catuak-catak inyo bacurito, tapi lupo jo bahaso niniak muyang nyo. Sabana katulahan." Tibo-tibo tadanga suaro uniang Idar, bini Tan Koti mamantak talingo. "Jo..! Babuko lah lai. Urang lah azan!" "Haa?! Alah azan urang? Babuko awak lai, cihhuuui!" Tan Koti manyosoh sagalo nan talatak di ateh meja. Indak bara lamo, nasi jo samba nan tahidang licin tandeh. Tan Koti tasanda kakanyangan. Lah salasai pulo urang sumbayang Magarik di musajik, tapi Tan Koti alun juo barasak dari tampek duduak. Matonyo mulai mangantuak, kapalonyo ta-akuak-akuak! Dari labuah tadanga suaro Pudin mamanggia. "Taaann. Ka musajik awak lai..!"sambia manggusuak-gusuak mato Tan Koti manjawek jo maleh. "Yooo..! Dululaah. Sabanta lai den turuik.." *** Di Surau Tan Koti duduak dakek tunggak musajik. Kantuaknyoi samakin manjadi-jadi. "Manolah jamaah tarawiah kasadonyo. Tapek di hari nan kini nangko, alah limo hari kito bapuaso. Mamintak kito ka bakeh nan Kuaso, habih bulan puaso, hapuih pulo handaknyo sagalo doso..." "Aamiin..," jawek jamaah sambia manangadahan tangan. Mandanga jawek urang basamo, ustad mando'a samakin kusuak. "Yaa Allah. Jadianlah kami urang-urang nan saba manjalani hiduik nan batambah sarik. Angkaulah nan Maha Pamurah, lapangkan rasaki kami ya Allah. Jauahanlah kami dari sagalo bala nan kamanimpo. Tunjuak-ilah kami jalan kalua dari sagalo kasusahan. Bimbianglah pamimpin kami ka jalan nan luruih ya Allah ya Rabbi. " "Aamiin..!!" Sasudah manutuik do'a, ustad turun mimba. Jamaah basugiro handak sumbayang tarawiah jo witir basamo-samo. Tan Koti tasanda di tunggak musajik sambia bakaruah. Aia saleronyo mahilia di suduik bibia. Mancaliak nan sarupo itu Pudin manggutiak pinggang Tan Koti. "Tan.., jagolah. Sumbayang tarawiah awak lai!" Jamaah mancaliak ka si Pudin. Tan Koti lah mambukak incek mato, mahapuih aia salero nan mailia di bibianyo. Mancaliak Tan Koti lah mulai jago, Pudin basugiro maangkek tangan, takabia maikuk-i Imam. Tibo-tibo tadanga urang heboh sabalik. Pudin malengong ka tunggak musajik. Dilieknyo Tan Koti sadang lalok mambalintang, sambia bakaruah gadang di ateh lapiak sumbayang! "Astaghfirullah! Jagolah Tan...Urang ka sumbayang!" kecek Pudin satangah mahariak. Jamaah nan mancaliak ado nan tagalak, ado pulo nan mancaliak ka Tan Koti jo mato mambulalak tando berang. Mancaliak kaadaan nan sarupo itu, Pudin langsuang mancuekan pinggang Tan Koti jo ampu kaki. "Hekkk!" Tan Koti tadangek, manyaringik manahan sakik. Mukonyo sirah manahan rabo. Dilieknyo urang sakuliliang mamandang jo muko berang. Tan Koti malu diri. Sambia tagak disembanyo kain saruang, malucuih pulang. "Kama Tan?" "Ado proyek snek!" Tan Koti bagageh kalua, maninggakan urang nan geleang-geleang kapalo. Website http://www.rantaunet.org _____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ____________________________________________________
