Uni Ben,...dan dunsanaka kasadonyo.
Sabananyo, hal-hal samacam iko, alah langsuang ambo
sampaikan ka pak Dubes, katiko ado
partamuan-partamuan. langsuang ambo angkek tangan,
babicaro di depan khalayak ramai, pejabat, dan indak
ado takuik stek alahpun. Itu sababnyo kiro-kiro lima
hari nan lalupun, sampai-sampai bu DCM mangecek
kasuami ambo : " Pak Rahim, si Rahima ko di Dharma
Wanita, adolah padusi nan barani mangecek, dan tajam
kato-katonyo, tapi aa nan dikecek annyo bana sadonyo.
Banyak hal nan ambo kritik/sarankan sacaro langsuang,
saroman awak pejabat kantua ko, mamakai sarano kantua
untuak kepentingan pribadi, mangkirtik ibu-ibu banyak
nan karajonyo kumpua sana-sini bagunjiang sajo,tatapi
jo caro cando, urang bisa tartawa, tapi cando itu bana
adonyo.
Bara hari nan lampaupun ambo mangkritik pembuatan
majalah nan banyak mahabiahkan pitih,sabano banyak
sakali antah bara juta habih untuak itu, samantaro
isinyo babantuak fhoto2 sajo, iko album atau majalah
babobot, ambo kecek-an. Dan banyak lai nan ambo kritik
baik isi ataupun lainnya. Ambo kecek-an kalau sajo
pitih ko untuak rakyat awak di Indonesia nan miskin
baralah karancaknyo.(haniang dan takajuik urang rapat
katiko tu, dek nan ambo kritik bukan sambarang urang,
tapi diplomat, samantaro amboko aalah, non diplomat,
istri pegawai lokal staff biaso sajo).
Dan ambopun acok badiskusi jo apak paja dirumah
masalah iko. Aaa kecek apak paja :
"...Ima...kalaulah urang sadonyo pemikirannyo saroman
Ima lai aman duniako, lai indak malarat bangsa awak
doh,..tapi urang indak samo doh, banyak nan alah kayo,
masih maraso kurang taruih, alah dibari fasilitas nan
langkok dan lux, masiah maraso kurang, masih
mancari-cari jalan dimaa tampek nan basah agar pitih
mangalir taruih ka bank sakunyo, indak bank rakyat
miskin doh, tapi bank saku surang-surang, mampakayo
diri nan alah kayo,..itu alah manjadi watak, atau
sikap dari sebahagian, atau buliah dikatoan kabanyakan
pajabat awak di Indonesia...sulit untuak marubahnyo."
Tapi uni Ben, untuak saketek-saketek alah banyak
barubah dari nan lampau, biasonyo jarang nan
mamikiakan zakat profesi, zakat bisnis perdagangan
sekarang alah tabiaso dikaluakan. Biasonyo indak
pernah taniek baa mamikiakan mahasiswa/i, sakarang
kasodonyo alah dipikiakan. Dan alah banyak perubahan.
Ambo indak amuah mengecek-an itu ateh usaha ambo,
indak, karena, keputusan tetap ditangan ibu Dubes,dan
ibu ketua.
Bagi ambo alah cukuik, kabaradaan ambo, bilo mangecek
menjadi perhatian apak-apak juo ibu-ibu diplomat
lainnyo, indak saroman dulu, kalau dulu talampaui
jaleh pabedaan antaro diplomat dan non diplomat.Ini
akibat keilmuan juo nan manantukan, kalau awak
mangecek asa mangecek sajo tanpa argumentasi dan jaleh
dan masuak aka, iyo indak dipandang awak doh.Tetapi
dek ilmu juo nan maninggikan derajat sasaurang.
Batualah firman Allah : " Allah mengangkat derajat
urang nan baiman dan barilmu beberapa darajat ".
Dan kelebihan ilmu tu alah ambo rasoan dimaa sajo ambo
barado, dikalangan maa sajo. Kalaulah indak dek karano
ilmu nan dimiliki, maalah bisa ambo didangakan,
pandapek ambo diparhituangkan, dan lainnyo.
Ambo dapek marasoan baa bana parasaan teman-teman ambo
nan lain, nan sakolahnyo indak salasai, hanya tamaik
SMA sajo, atau kuliyah indak pulo tamaik, memang lain
didalam pergaulan para ibu-ibu, kurang baitu
dipandang. Ikolah nasib perempuan pegawai biaso, bukan
istri diplomat, bilo barado di lingkungan para istri
pejabat.
Usaho manuju perubahan kabaikan ko indak biso
langsuang doh uni ben, perlahan tapi pasti, dek awak
indak urang gadang, awak urang biaso sajo. lain hal
bilo kelak ambo jadi pejabat tinggi atau urang besar,
awak nan manantuan sagalonyo, iyo gampang malaksanakan
perubahan tu.
Saroman nan dikecek-an apak paja sulik merubah
kabiasaan dari pejabat Indonesia.
Untuak kehidupan Timteng, indak sado Timteng miskin
doh uni Ben, Kuwait ,Saudi, kayo. Mesir nan tamasuak
miskin.
Tetapi anehnyo, samiskin-miskin kehidupan di Mesir,
penjaga rumah atau juga pembantu rumah, masih bisa
hiduik layak, masih bakomporkan gas, indak kayu doh.
masih makan ayam jo dagiang(acok), masih bakulkas, ba
mesin cuci dsbgnya.
Perbedaan antaro kayo jo si miskin di Mesir adolah
kayo punyo oto, miskin indak, kayo rumahnyo gadang,
lueh dan rancak si miskin indak, biaso sajo..dst,
namun jarang sakali kekurangan aia(aia jarang mati,
kecuali bilo ado perbaikan, itupun salamo ambo di
Mesir ko salamo labiah kurang 15 thn limo atau ampek
kali aia mati.
Dan bayaran aia jo listrik, apolai gas sangaiklah
murahnyo bilo dibandiangkan jo Indonesia, nan katanyo
nagari sekeping surga.
Nan maha di Mesir tu adolah barang elektronik sajo.
bahan pokok atau bahan primer kasadonyo di subsidi
oleh pemerintahnyo.
Mengenai rumah, macam-macam, ado nan maha(biasonyo
para diplomat nan sangaiklah tinggi sewa rumah mereka
tu, manuruik kami nan lokal ko, tapi mereka dibayarkan
oleh pemerintah kita Indonesia, sudah ketentuannyo
saroman tu, samantaro lokal bayar surang sajo, makanyo
awak nan lokal staff, biaso sajo, ado nan murah, ado
nan maha, ado nan sadang-sadang sajo, tagantuang dimaa
tampek awak tingga, dimaa lokasinyo, dan juo
tagantuang kondisi rumah tu juo.
Kalau rumah ambo nan sakarang, untuak dari nan
sudah-sudah tamasuak nan alah rancak, nan lampau juo
rancak, namun indak ba Ac doh, bundo Nismah alah
datang karumah nan lamo.Kalau dibandiangkan rumah para
lokal dan diplomat, itu samo sajo mambandiangkan
antaro di langik jo dibumi.
Kalaulah indak karano sakolah amboko, ambo labiah
sanang untuak pulang ka Indonesia, dek karier apak
paja bisa maju, baitupun karier ambo, tapi demi ambo
harus bisa manyalasaian kuliyah, dimaa lai sakarang
kehidupan di Indonesia samakin sulik, iyo samakin
taraso lamak di Mesir ko, bilo dilihat dari sisi masih
bisa manabuang, masih bisa anak-anak hiduik labiah
elok, makan bisa nan bergizi tinggi bilo dibandiangkan
hiduik di Indonesia, sadonyo serba maha, iyo paniang
kapalo mambayangkan kehidupan di Indonesiatu.Anak kami
alah tabiaso pulo hiduiknyo serba ado, baa kalau di
Indonesia kelak, itu nan dipikiakan.
Apak paja kalau pulang beko, aalah karajo, tantu harus
dipikiakan dari kini. Umua alah diateh 40 tahun, tantu
kalau indak maaja, bisnis se lai. Kalau ambo iyo alah
ado pekerjaan tetap sebagai PNS. Tahu suranglah awak
baa bana hiduik PNS nan jujua tu, bukan PNS nan
korupsi doh, awak kan mancari nan jujua-jujua sajolah,
bia masuak sarugo beko, hindarilah nan KKN tu, masuak
narako pulo beko karano KKN, bara bana gajinyo?
Uni tahu surang baralah gaji urang nan baru golongan
3 B saroman ambo ko. Tunjangan ambo di Mesir dari gaji
apak paja, masih labiah tinggi tunjangan tersebut,
ketimbang gaji ambo di Indonesia nan hanyo 1 juta 200
labiah, atau sakarang baralah ambopun indak tahu lai,
indak pernah men check bara gaji ambo di Indonesia
sakarang, bara gaji PNS apo naiak atau masih
baitu-baitu juo.
Kalau kaduo-duo kami pulang dan karajo di Indonesia
sabagai pegawai, samantaro anak alah tabiaso hiduik
serba ado, sulik sekali jadinyo, makonyo akhia nyo
masih dipikia-pikia, jauah labiah rancak tatap sajo
apak paja di kedutaan, sebab semiskmin-miskin dan
sesusah-susah hiduik di kedutaan masih jauah labiah
elok bilo dibandiangkan pulang dan hiduik di
Indonesia, apolai dengan lehidupan nan serba naik,
saketek-ketek naik, iko naiak, BBM naiak, sadonyo
dinaiki, urangpun banyakloh dinaiki(hehehehe..) dan
tinggi sakarang ko. Ngeri ambo mambayangkannyo.
Oh yah, untuak paralu uni Ben ketahui, bahwa di Mesir
pegawai lokal staff lumayan banyak, dan kehidupan
mereka ado nan menghemat bana, bisa mereka dengan 6
anak menyewa rumah hanyo duo kamar se, ruang makannyo
ketek, apolai dapuanyo. Ado nan bisa hiduik talampau
behemat tuh, ado juo nan tinggi bana, habih pitih gaji
sabulan untuak hiduik sabulan tu.
Kalau kami tamasuak nan sadang-sadang sajo, namun
makan memang lebih mewah, ambo indak suko gizi anak
tatahan doh, saketek mewah untuak masalah makan
anak-anak ko, acok juo makan dilua. Samantaro ado juo
teman-teman lokal nan ceke, atau sampilik aa lah
bahaso Minangnyo ko, pelit bana ka anak-anaknyo.
Macam-macamlah tingkah manusia.
Ambo hanyo bisa indak bamewahan jo perabot rumah,indak
bamewahan jo pakaian, tiok sabanta bali pakaian, indak
ambo indak baitu doh, barang-barang perabotan rumah
sangajo dari awal bali nan kaluaran Jepang atau
German, tujuannyo bukan dek karano pamer, tapi untuak
nan tahan lamo, sahinggo indak bali tiok sabanta
perabotan tuh doh, ambo suko nan kuaik bia tahan lamo,
dan alhamdulillah ambo tamasuak nan bisa mamalihara
barang perabotan rumah, mesin cuci alah 12 tahun
manikah masih elok sampai kini, sado perabotan masih
elok dimiliki, balain ambo caliak teman-teman padusi
ambo(ibu2) nan lain, tiok sabanta rusak barang
perabotan rumahnyo baganti tiok sabanta, kalau ambo
alhamdulillah lai tahan lamo, dari dulu sampai kiniko.
Prinsip ambo daripado pakaian, rancak ambo mambali
buku lai. Anggaran untuak buku ambo wajibkan taruih
tiok bulan, dek bukutu ilmu, samantari pakaian indak
doh.
Ini sekedar bayangan kehidupan ambo di Mesir sajo,
indak seindah nan dibayangkan, tetapi dek raso syukur
makanyo lamak se rasonyo hiduik jauah dinagari
Indonesia, padahal, kalau ditanyoan hati, alah lamo
bana ingin menikmati kehidupan di Indonesia. Alah
rindu pulang kampuang, alah rindu ingin hiduik di
Indonesia.
Wassalamualaikum. Rahima Sikumbang Sarmadi
__________________________________
Yahoo! Music Unlimited
Access over 1 million songs. Try it free.
http://music.yahoo.com/unlimited/
Website http://www.rantaunet.org
_____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
____________________________________________________
