Assalamu'alaikum warahmatullahi wabarakaatuh. Ma sagalo adidunsanak jo anak kamanakan di salapan pinjuru angin,
Alhamdulillah, kapatang, lk jam 5.00 sore, Pak Dutamardin jo induak bareh baliau basarato jo anak, minantu dan cucu baliau lah barado di Padang dan manginap di Hotel Pangeran nan ditapi lauik. Sasuai jo permintaan baliau dalam imel baliau sabalun barangkek dari rantaunyo, ambo nan pertamo sakali tibo di hotel jam 5.00 tu, dan sakiro 10 minik kami maota di lobi, tibo Miko jo Ephi Lintau. Lah marandang kacang ota kami ilia mudiak sampai kiro-kiro jam 6.00 dan sudah tu baliau maajak kami makan malam. Sasudah manimbang-nimbang lapau ma nan ka dituruik, kami putuihkan ka Lubuak Idai nan di Jl. Khatib Sulaiman, makan ikan baka jo sambalado mudo minyak tanak. Sadang makan, manyusul pulo tibo si Budi dan batambah sero ota di lapau tu. Kami baru baranjak dari lapau sakiro jam satangah salapan dan baliau lansuang ka hotel dan kami abih pulang pulo. Pagi ko, kami barampek manamui gubernur nan lah disupakaiki jo ajudan baliau pukua 8.00 di rumah bagonjong. Rencananyo Pak Duta ka mainfokan Minang USA Foundation dan ka mamintak bantuan pak gubernur mambantu mamfasilitasi kagiatan yayasan ko untuak saketek banyak mambantu ranah kampuang halaman. Sakiro jam 10.00 jadual kami ka Padang Ekspres dan siang pertemuan jo LSM, indak jaleh amek diambo LSM apo, mungkin LSM nan diuruih si Budi. Sakitu dulu laporan ka rang palanta. Tolong iriangi jo do'a, mudah-mudahan rencana Pak Dutamardin mambantu kampuang ko bisa jalan sasuai jo rencana baliau. Ambo jo kamanakan-kamanakan sapalanta ambo nan di Padang lah komit (kecek rang kini go he) manolong a nan dapek kami bantu sainggo talok di badan. Salam, mak Sati (68->69) Tabiang -------------------------------------------------------------- Website: http://www.rantaunet.org ========================================================= Berhenti, berhenti sementara dan konfigurasi keanggotaan anda, silahkan ke: http://rantaunet.org/palanta-setting -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
