Assalamualaikum warahmatullahi wabarakaatuh, Bia lamak kopi jo lapek sagan ko dimakan iyo sambia mambaco curito minang. Wassalam, syb.
News / Ciloteh Minang "Do'a Rakyaik Untuak Pajabaik" Oleh : Viveri Yudi Senin, 20-Februari-2006, 01:25:37 43 clicks "Kadang ambo sadiah mancaliak kakobeh pajabaik-pajabaik di nagari ko," kato pak Wali kutiko singgah di lapau Mak Kari.. ... sahari kapatang ko. "Kalau di muko ambo lagaknyo sarupo urang nan patuah bana. Angguak sarato takua kapalonyo manjadi-jadi. Tapi di balakang ambo..." "Usah pak Wali mancabiak baju di dado," sorong Mak Kari. "Pamimpin, urang nan dianjuang tinggi, diamba gadang. Kusuik nan ka manyalasaian, karuah nan kamanjaniahan. Takalok manjagoan, lupo maingekan. Panjang nan kamangarek, singkek nan kamauleh' Kan baitu pak Wali," uleh Mak Kari. Tasabuik diurang, banyak pajabaik nagari Mati Pucuak nan mampalasa oto kantua untuak pai malala-lala. Ado pulo oto plat sirah nan dibao bini pajabaik untuak manjapuik anta anaknyo ka sikola. Banyak pulo urang mancaliak oto kantua di lua kota kutiko hari Satu jo hari Akaik. Tapi, sajak kamera tapasang, alah agak kurang pagawai nan takaja pulang. Sakurang-kurangnyo pagawai batahan karajo sampai siang. Sabulan kabalakang, pak Wali mamasang kamera ketek di satiok ruangan karajo. Dari meja karajo, pak Wali dapek maliek parangai anak buahnyo di tipi ketek nan talatak di mukonyo duduak. Lah pakak talingonyo mandanga gunjiang urang nan mangecekan pagawainyo banyak maota daripado karajo. Di hari nan sahari nantun, pak Wali sadang basanda di kurisi babeleang di baliak meja karajo nyo. Sikunyo basitakan ka tangan-tangan kurisi, jarinyo manyilang saliang manyatu. Mukonyo kusuik cando urang jago lalok. Urek sagadang jari kalingkiang mambalintang di kaniangnyo. Sambia baputa-puta di kurisi kabasaran, pak wali tipi 'monitor' di suduik ruang karajonyo. Tamu sadang rami, harok basobok jo pak Wali. Dilieknyo Mak Kari jo Tan Koti sadang maota kareh jo nan lain. "Ba-a mangko pambagian buku nan disadioan pamarentah kapatangko indak salasai pak?" tanyo Tan Koti ka Umar Bakri. Pak Guru tagalenjek, inyo indak manyangko Tan Koti ka batanyo pakaro pambagian buku. "E..e.., I-iyo itu bana nan ka ambo laporan ka kumandan," jaweknyo singkek. "Kabanyo pambagian buku indak rato, piliah kasiah! Nan patuik dapek indak manarimo! Nan jangga, ado pulo guru nan mangecekan bahaso buku nan disadioan pamarentah indak sasuai jo kurikulum nan dipakai di sikola," tongek Tan Koti. "Indak ka putuih dek inyo surang tu doh," bisiak Mak Kari ka Tan Koti. Pak Wali nan mandanga ciloteh tadi dari tipi monitor tagalak sengeang. "Niaik lai elok, tapi ado se caceknyo," gumam Wali Nagari sambia geleang-geleang kapalo. Di subalah 'mantari pandidik-an' dilieknyo 'mantari kasihatan' duduak sambia mangapik Ayam. Tibo-tibo Ayam lapeh dari katiak pak dotor. Urang kalebuik. Ayam kuriak hinggok di kapalo Tan Koti. "Huppp! Kama waang ka lari," kecek pak dotor sambia mamacik si Kuriak arek-arek. "Ayam kalera! Lah den baok ka kantua pak Wali, indak pulo tahu diri!" "Baliau mantari kasehatan di nagari ko mah," bisiak Mak Kari ka Tan Koti. "Baa mangko baliau mambao Ayam ka siko? Ka manyogok pak Wali Nagari?" tanyo Tan Koti manyalidik-i. "Huss! Indak buliah buruak sangko. Itu doso!" "Atau mungkin ka mampacaliakan ka pak Wali bahaso sagalo unggeh di nagari ko lai aman. Indak takanai 'flu buruang'," uleh Tan Koti. "Mungkin juo," jawek Mak Kari manyudahi. Sadang kalebuik tadi, mancogok Man Lutuik sambia mangapik buku sataba bandua. Di balakangnyo maikua 'humas' kantua Wali Nagari. Katua dewan kesenian nagari Mati Pucuak langsuang mancucuak ka dalam. "Paja kalera! Urang lah mananti sajak pagi, inyo manyorong se masuak!" Tan Koti maupek manahan suaro. "Ssst! Saba se lah. Karatehnyo sadang di ateh tu mah. Inyo mandapek proyek untuak mambuek buku pak Wali..." "Buku juo lai! Nan kapatang ko se indak salasai, kini ka dibuek lo ciek lai!" "Buku nan kini barisi 'kliping' koran nan mamuek tantang pak Wali!" bisiak Mak Kari sambia manggemai rusuak Tan Koti. Di ujuang meja, duo urang padusi saparo bayo kalusuak-anjai, duduak tagak tiok sabanta. Surang gapuak, surang kuruih. Indak lamo antaronyo, nan kuruih batanyo ka pagawai pak Wali, "Bilo den dapek batamuw jo Pak waliy Yuaang?" Nan dipanggia Buyuang tangango. Tapi alun talakik inyo manjawek padusi tadi lah baturo-turo, "Lah dariy tadiy den manantiy di siko ha. Lah mangereok lo paruik den dek lapa, alun juo wakden diimbau!" "Saba Ne. Awak rami, tapaso One saba mananti," umbuak si pagawai. "Saba ka saba juo kecek waang! Samantaro paja tengkak tadiy lamak sae malucuih ka dalam. Baa kok waang hanok sae? Tibo diden banyak paraturan ang. Batele sae wa-ang mah!" kecek padusi tadi. "Lai tantuy dek kalian, baso wakden ko urang kampuang pak Waliy?" panggaknyo sambia mamelokan tikuluak nan maluncua di kapalo. Tibo-tibo pintu tabukak. Man Lutuik kalua sambia maelo kaki. Mukonyo kusuik, sakusuik rambuik nan tatonggok di kapalonyo. Buku taba nan dikapiknyo tadi kini taganggam di tangannyo. "Apo nan tajadi? Baa mangko muko Man Lutuik kusuik?" tanyo Mak Kari dalam hati. "Bapak-bapak, Ibuk-ibuk serta saudara-saudara yang kami hormati," kecek pajabaik 'humas' ka nan rami. "Hari ini, pertemuan dengan pak Wali dibatalkan!" Urang tangango. Dari balakang tadanga padusi marabiak, "Hey kapunduang! Lah panek wakden manantiy dari tadiy, lamak sae waang katoan indak bulih basobok jo pak Waliy. Sia abak ang tuw!" Pajabaik humas takajuik, karano indak manyangko ka kanai picaruik. "Sabar saudara..." "Namo den One Idar! Indak saudara doh! Lai jaleh dek waang!" sambua One Idar tarabo. Pajabaik Humas binguang. Tapi inyo pasoan juo galak. "Maaf One Idar," umbuaknyo. "Pak Wali sedang bersemedi, merenung sambil menginstropeksi diri. Marilah kita do'akan agar pemerintahan negeri ini lebih baik lagi dari tahun sebelumnya." Sarantak urang-urang manadahan tangan. Mak Kari mamimpin do'a. "Ya Allah.., linduangi lah baliau dari sagalo niaik jahek, pangana buruak sarato pajabaik busuak nan ka marusak nagari ko yaa Allah. Jauahan baliau dari tipu-tepok, janji mungkia, sarato karajo nan kamambuek rakyaik taniayo yaa Rabbi..." "Amiin..." sambuang urang basamo-samo. "Kuaikan hatinyo untuak mamarangi sagalo maksiaik di nagari ko...baiak maksiaik kato, maksiaik mato sarato maksiaik raso nan dibungkuih jo sagalo caro yaa 'Aliim..." "Amiin..." "Ya Allah.., tunjuak-i lah hati pajabaik nagari sarato wakia-wakia rakyaik kami ka jalan nan luruih, jauah dari napasu sarakah sarato rakuih. Tarangan pangananyo untuak mauruih rakyaik. Pacaliakan jikok ado diantaro pajabaik pajabaik jo wakia rakyaik nan bakhianaik jo amanaik rakyaik. Ya Rabbii...Lambuikan hati pamimpin kami, nak dapek marasoan parasaian rakyaik..." "Amiin ya Allaaah..." jawek nan basamo. *** -------------------------------------------------------------- Website: http://www.rantaunet.org ========================================================= Berhenti, berhenti sementara dan konfigurasi keanggotaan anda, silahkan ke: http://rantaunet.org/palanta-setting -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
