Taun 1980-an, cuma ado ciek oto nan malayani rute Pikumbuah Mudiak (dari Suliki) nan langsuang ka Padang, yaitu P.O. Bahagia nan dimiliki oleh H. Yusri, urang Kubang, Kecamatan Guguak, Pikumbuah Mudiak.
Tahun 80-an tu, oto Bahagia tu gadang bangkalainyo, sagadang ukuran oto armada ANS nan kini alah iduik-sagan-mati-ndak-amuah tu. Namun di maso 90-an akhir, nampaknyo peta barubah. Oto Bahagia nan gadang-gadang tu pansiun, digantikan dek oto ukuran 3/4, gadang bana indak ketek bana indak pulo. Sampai kini. Cuma kalau dulu pemberangkatan oto tu cuma ciek atau duo kali sehari, kini alah sampai limo atau anam kali sahari. Mungkin Haji Yusri, urang konglomerat di Kubang tu bapikia, bialah saketek penumpang nan dibao, tapi acok. Atau mungkin juo karano oto nan gadang ndak pernah panuah lai, jadi diganti sajo jo nan ketek, jadi labiah pas. Cingkariaknyo oto Bahagia tu sabana ligat, labiah ligat daripado karo nan basigayuik di ateh batang kayu. Kalau karo basigayuk di batang kayu nan indak manggarik, tapi cingkariak Bahagia basigayuik di pintu oto, nan kadang melaju jo kecepatan tinggi. Tantu jauah labiah sulik. Dari Suliki sampai wilayah Kota Pikumbuah, biasonyo Bahagia tu jalannyo bak cando kilek, kancang sangaik. Garobak urang tapi jalan ndak sagan nyo malendo. Ambo kiro dulu, kalau bantuak iko painyo Bahagia tu, mangko dalam duo jam tantu sampai nyo di Padang. Tapi ruponyo kancangnyo cuma di sakitar-sakitar Pikumbuah Mudiak sajo. Baitu oto tu mulai kalua wilayah Pikumbuah, jalannyo baradiak kakak jo cipuik (keong mungkasuiknyo, ambo ndak mangecek kumuah bagai do sanak). Tiok sabanta cigin oto lain nan malangga, sadangkan supir nan tadi mambaok oto gagah bana di daerah mudiak, baru kalua dari Pikumbuah kuncuik ikua punconyo. Ambo sangko cingkariak nan direkrut dek Haji Yusri ko adolah urang-urang pilihan dari Kota Padang, nan sangaik paham seluk beluk percingkariak-an sarato masalah oto. Karano satiok ambo mangecek jo wanyo, katiko kami masih berada di daerah Mudiak, wanyo selalu mangecek dengan logat urang Padang. Tapi kutiko pernah oto rusak di daerah Sicincin, katiko mamintak tolong bakeh ambo, baa kecek nyo: "Ndo, tolong putea kunci ko setek." (Terjemahannyo kiro-kiro: Rang Sumando, tolong puta kunci ko saketek.) Ambo jadi tau, bahaso tarnyato cingkariak tu tarnyato urang Kubang totok. Sebagian urang Pikumbuah mudiak dalam logatnyo mengganti huruf "a" jo "ea". Misalnya ula jadi ulea, puta jadi putea, kalua jadia kaluea, dan lain lain. Ruponyo di mudiak, cingkariak tu bahasonyo bahaso urang Padang, tapi kaluea dari Pikumbuah, mancogok juo aslinyo :) Babaliak ka kaji, salamo puluhan taun oto Bahagia mamonopoli rute Suliki-Padang tu, indak ado saingannyo. Penumpang pun ndan punyo pilihan. Jikok ndak naiak Bahagia, tantu manyambuang-nyambuang lai lewat terminal Koto Nan Ampek Pikumbuah. Jikok dijumlahkan ongkos otonyo beko, jo naiak oto sago bagai, bisa bisa duo kali lipek jatuahnyo. Alun lai panek nan dirasokan. Jadi rancak lah naiak Bahagia, supayo agak bahagia pulo awak saketek. Namun, sakitar tahun 2000-an (kalau indak salah ambo) sesuatu terjadi. Katiko tu, ado surang penumpang nan naiak oto Bahagia tu. Gadih, bajilbab. Dek mandanga sorak cingkariak; "Padang Padang.. Kosong..." Tantu nyo naiak. Tapi katiko alah naiak, tarnyato indak ado bangku nan dapek diduduak-inyo. Tantu bantanyo gadih tu, "Dima nan kosong da?" Baa jawek sitokar tu: "Diateh atok lai kosong." sambia taruih basorak kalua "Padang Padang... Kosong!!!" Akhianyo karano maleh basitagang jo sitokar tu, anok sajo nyo lai. Sabalah tangannyo bagayuk kateh, mamacik basi panjang di ateh plafon oto, sadangkan tangan kida mamacik tas kulik ketek nan disandangnyo. Alah tagak dari Pikumbuah ka Bukik Tinggi, alun juo ado urang turun lai. Kabatulan hari tu hari Minggu, anak kuliah banyak nan baliak ka Padang jadi agak panuah oto Bahagia tu. Jankan ka turun urang, urang nan naiak batambah juo. Si gadih alah tasasak-sasak dek urang, antah indak sangajo atau memang sangajo urang malakok-lakok ka gadih tu. Akhianyo gadih tu batanyo ka cingkariak baliak. "Da, baa kok sampik bana oto ko, ambo ndak dapek maangok lai." Namun jawek sitokar: " KALAU NAK LAPANG, BALI SAJO OTO SURANG." Indak tatahan dek gadih tu lai, akhianyo inyo turun di Padang Panjang, naiak nyo oto lain. Ruponyo gadih ko bukan sumbarang gadih. Wanyo adolah anak urang kayo gadang. Disampaikannyo kecek cingkariak Bahagia tu bakeh Apak Mandehnyo. Akhianyo manitah Apaknyo; "Jadihlah kalau baitu kecek sitokar Bahagia tu. Bisuak kito bali oto awak surang." Sahari sasudah tu, langsuang manambang oto punyo anak gadih tu, melayani trayek nan samo, Suliki - Padang, menyaingi Bahagia. Namo otonyo, "RNS". Jadi kini, lah ado duo oto nan manambang dari Mudiak ka Padang. Urang RNS nampaknyo menyadari bahwa penumpang ndak buliah dikasari, jadi lai agak nyo jago saketek muncuang sitokar atau supirnyo. Akibaiknyo, urang-urang nan pernah sakik ati naiak Bahagia langsuang beralih ka RNS. Namun Bahagia tantu ndak namuah pulo kalah. Wanyo lai pulo baraja dari kesalahannyo tu. Walaupun H. Yusri tidak pernah meminta maaf secara terbuka kepada mantan penumpang nan alah dikasari sitokarnyo tu, namun beliau lai meningkatkan kenyamanan penumpang nan tetap setia jo Bahagia. Kini kalau naiak Bahagia, penumpang dihibur jo VCD lagu-lagu Minang sarato Barat (sasuai jo salero anak kuliah). Sampai kini, persaingan antaro Bahagia vs. RNS itu tetap berlangsuang ketat. Jikok dunsanak tagak di tapi labuah jalan raya ka Padang, tampak oto Bahagia bawarna sirah nan lari terbirit-birit bak cando dikaja urang bunian; mangko agak babarapo minik sasudahnyo pasti tampak pulo oto berwarna hijau, bamerek "RNS" di atehnyo. Ndak jarang pulo sebaliknyo. Bogor, 30 Maret 2006 Wassalam, W.A.S.P [email protected] http://groups.yahoo.com/group/urangawak -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
