Yth. Niniak Mamak, Cadiak Pandai
sarato Dunsanak kasadonyo
Salingkuang Palanta Rantaunet
Assalamu'alaikum w.w.
Maaf jo ampun nan ambo mintak, jikok tarnyato apo nan ambo sampaikan indak pado
tampeknyo.
Lah lamo kito bacarito bakucindan di berbagai palanta, walaupun namo balain
tapi urangnyo samo itu ka itu juo, yaitu urang awak.
Salain manjadi member di berbagai milis urang awak nan memakai berbagai namo,
ambo mintak maaf jikok salamo ko ado nan talantuang dek ka naiak sarato talendo
dek katurun, jikok ado sasek jo kaleru sarato lupo nan ndak jadi kaingatan.
Maklum lah, jikok umua alun lai sataun jaguang, darah lai alun sa tampuak
pinang. Utang niniak mamak untuak manunjuak-ajari.
Nan kini nangko, ambo selain manjadi anggota di berbagai palanta urang awak tu,
kabatulan ambo sato-sato pulo jadi moderator di palanta untuak urang awak nan
banamo "Urang Awak" bana, baalamaik [email protected], dengan barando
di http://groups.yahoo.com/group/urangawak.
Mungkin ado juo dunsanak nan bagabuang di palanta "Urang Awak" tu, salain di
palanta-palanta lainnyo.
Ambo andak mangabakan bahasonyo kini barando "Urang Awak" tu memiliki tampilan
baru.
Sasuai dalam adaik, sabananyo kain usang juo nan bapakai, tapi dek bacaluik jo
rono baru jadi nampak baru.
Jikok dunsanak berkenan manyigi, silahkan kli barando di
http://groups.yahoo.com/group/urangawak tadi tu.
Barikuik ko adolah Sekapur Sirih kato pengantar nan ambo cubo manyusun surang.
Mohon bantuan niniak mamak sarato cadiak pandai untuak mangoreksinyo:
==
Sarantak balam jo barabah, barabah lalu balam mandi
Sarantah salam jo sambah, sambah kami susun jo sapuluah jari
Mano lah sagalo niniak jo mamak, cadiak pandai suluah bendang dalam nagari
Sarato bundo kanduang limpapeh rumah nan gadang
Sakali aia gadang, sakali tapian barubah
Sakali musim batuka, sakali caro baganti
Namun nan kuriak iyo tatap kundi, nan sirah iyo sago
Nan baiak iyo budi, nan endah iyo baso
Itulah adai nan indak lakang dek paneh, indak lapuak di ujan;
adaik banamo sopan santun
Lamo bana punai malayang
Inggoknyo tatap ka buah palo
Lamo bana kito di rantau urang
Adaik jo limbago jan sampai lupo
Bapisah usahlah mambuek carai
Jikok gantiang jan sampai putuih
Di palanta Urang Awak kito jalin silaturrahmi
Ketek usah disabuikkan namo, gadang usah bahimbaukan gala
Indak basisiah jo basibak, indak babarih jo ba balabeh
Usah dibateh jo bahinggo
Molah dunsanak kasadonyo
Namun baitu, dalam bagarah bakucindan
Raso jo pareso tatap di jago
Usah lupo jo kato nan ampek
Iyolah kato mandata, kato malereang,
Kato mandaki, sarato kato manurun
Tau jo condong ka maimpok,
Sarato gadang nan ka malendo
Dijago alua jo patuik, sarato ereang jo gendeng
Lamak di awak, katuju di urang
Baitu lah adaik Minangkabau
Sakian sambah sujuik dari kami,
Silang nan bapangka, karajo nan bapokok
Wassalam,
(Moderator)
==
Baitu lah kiro-kiro.
Sakali lai maaf jo rila nan ambo puhunkan, jikok talabiah takurang, tasasek jo
takaleru. Mudah-mudahan silaturrahmi kito sabagai anak nagari Minangkabau tatap
tajago di maso-maso mendatang.
Wassalamu'alaikum w.w.
Wady Afriadi Sutan Pamenan
(32 th)
Parung, Bogor 16330
[email protected]
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================
