Simon USA: Alang Bakulik, Kambiang Mambebek, Ayam Bacaruik
Alah cukuik lamo juo ambo indak ado mancaritokan kajadian-kajadian nan ambo alami jo Simon U.S.A. (Urang SungeiLontiak Asli) kapado dunsanak di siko. Sabananyo masih banyak nan alun ambo caritokan, tapi ambo cubo manimbang-nimbang, maetong elok buruaknyo sabalun kisah kami dicaritokan; karano beko jan sampai lain pulo nan tumbuah. Untuak mengobati kerinduan sebagian dunsanak nan mungkin taragak mandanga carito-carito kami tu, mangko kini nangko ambo cubo menjumpai dunsanak baliak dengan harapan dapek mambarikan hiburan saketek, jikok indak ado bana nan ka dapek diparambiak dari carito ambo ko. Sabananyo kajadian ko alah agak lamo. Antah taun bara, ambo indak takana persisnyo. Namun sampai kini tatap taraso dek ambo karano kalau basuo subjek nan dicaritokan - yaitu induak ayam nan ka batalua - mangko taraso baliak kabanaran kaji-nyo dek ambo. Jikok saisuak ambo agak ilang aka dalam menyikapinyo, namun kini ambo alah bisa manarimo jo lapang dado. Karano apo nan tajadi iyobana nan nan sabananyo. Mungkin dunsanak mulai batanyo-tanyo dalam hati, apo pulo carito nan dimungkasuik si Wadi tea ko? Wanyo bacarito acok maleo, bak cando kaset nan diputa jo aki nan alah suak tapi alun ba cas. Baitu mungkin dalam kiro-kiro dunsanak. Ibaraik si bisu barasian, taraso iyo tapi bakatokan indak. Katiko tu ambo sadang manunggu durian rareh di parak Rodi. Baa kok banamokan parak Rodi? Karano di sinan memang pernah bajadikan tampek urang karajo Rodi (kerja paksa) pado maso Balando saisuak. Nan ambo tantu indak mancaliak bana baa urang karajo rodi tu, cuma acok mandanga carito dari atuak (kakek) ambo, Abdul Hamid Dt. Andiko. Walaupun karajo Rodi tu alah labiah dari satangah abaik nan lalu, namun sampai kini lokasi tu tatap banamokan Parak Rodi. Jikok dunsanak sempat bajalan-jalan ka kampuang ambo di Tiakar Kec. Guguak, Pikumbuah Mudiak, tanyokan sajo ka urang: 'Dima porak Rodi?" Mangko jo sonang hati pasti dunsanak diantakan ka lokasi nan ambo mungkasuk, yaitu indak jauah dari baruah Batu Biliak, dokek luak (sumua) Jakuk. Sangkek tu ari masih pagi. Unggun nan ambo buek dari tadi malam masih barasok juo baru. Kalau maunyikan durian awak iyo harus bakawan jo api unggun. Salain untuak badiang, asoknyo dapek pulo untuak pausia rongik atau nyamuak. Ambo sadang manunggu toke durian tibo. Dari sanjo kapatang sampai pagi tu lai kiro-kiro sapuluah buah durian rareh, baungguakkan dalam lubang di bawah lantai dangau durian tu. Jadi kalau ado baruak atau sabangso baruak nan andak mancilok durian tu, pasti susah tanpa manjagokan ambo. Ambo lalok di ateh lantai sasak dalam dangau durian tu, tapek di bawah durian tu baungguakkan. Untuak mamasuakkan atau mangaluakan durian tu, lantai papan harus diangkek saketek. Sadang manunggu toke tibo tu, ambo mandanga karisiak-karisiak langkah kaki nan samakin lamo samakin dakek. Ruponyo si Simon ko nan labiah dulu mancogok. Babaju dingin sarato manyandang kain saruang, tangannyo masih mamacik senter. Mungkin baru pulang lalok dari dangau durian pulo baru paja tu. "Bara roreh Af?" Tanyonyo. Mungkasuiknyo bara durian nan rareh (jatuah). "Dari sonjo lai sapuluah, Mon." Jawek ambo. Ambo alah mulai bakameh, karano giliran ambo maunyian durian tu hanyo sakali dalam saminggu, yaitu malam Kamih. Batang durian nan ambo unyikan tu adolah pusako tinggi kaum Caniago Balai Pincuran, kampuang Apak ambo. Jadi karano marupokan hak basamo, supayo samo mandapek bagian, mangko bagiliranlah kami sahari surang, sakali dalam tujuah hari. 'Dima ang lalok, Mon? Baa kok ndak kamari waang? Aden surang sajo siko." Tanyo ambo. "Aden manggantikan gaek pulo maunyikan durian di hilia. Ponek-ponek sajo nyo, ndak ado jatuah do." "Ambiak lah tu agak duo." Kecek ambo dek karano ambo agak ibo jo kawan arek ambo ko, walaupun jalan pikirannyo ambo acok ndak mangarati. Baa kok ambo agiahkan duo? Supayo ciek dapek dibaoknyo untuak kawan makan lamang di lapau Iyuh, ciek lai dapek diagiahkannyo ka toke untuak dituka jo pambali rokok. Alhamdulillah, durian pusako kampuang gaek ambo ko sangaik rancak buahnyo dan alah tanamo di Tiaka. Jadi toke indak marago-hago bana do. Ciek durian biasonyo haragonyo samo jo Dji Sam Su sabungkuih. Sambia maota-ota pagi tu mananti toke tibo, matoari mulai tabik. Ambun nan bagayuk di ujuang daun mulai memantulkan cahayo matoari, bakcando mutiara di ateh batang kayu tampak dek ambo. Murai alah bakiciang sajak tadi, kadang-kadang ciek jo duo inggok di batang manggi dakek dangau durian. Bukik Batu Putiah mulai kanai cahayo matohari, sungguah sangaik mempesona. Bahkan sampai bertahun-tahun kemudian, katiko alah memiliki kamera SLR, ambo indak bosan-bosannyo duduak pagi-pagi di pamatang sawah baruah Batu Biliak tu untuak mengabadikan Bukik Batu Putiah tu diterpa cahaya matahari pagi. Dunsanak bisa mancaliaknyo di http://geocities.com/tiakarguguk. Ciek jo duo alah tadanga suaro buruang balam di ateh bukik: "Tur kutu, tu." Balam ciek gayo. Agak murah haragonyo. Sasudah tu tadanga pulo balam nan lain: "Tur kutu, tu, tu." Balam duo gayo, balam sarupo ko alah agak maha. Ndak lamo sasudah tu, dari arah lain: "Tur kutu, tu, tu, tu." Nah kalau itu adolah balam tigo gayo. Jikok dunsanak pandai manangkoknyo mangko itu adalah alamaik ka kayo, karano haragonyo sangaik maha. Kecek urang, balam tigo gayo ko salain bisa memberi kekayaan kapado pemiliknyo, juga memperpanjang umua urang nan punyo. Antah iyo antah indak, ambo ndak tau bana. Di tangah sumarak pagi tu, tanpa ambo sadari dari tadi ado induak ayam nan baputa-puta di sampiang dangau durian, antah apo nan dicarinyo. "Ayam sia ko Af? Wanyo alah ka bacaruik lo sabanta lai nampaknyo." Kecek Simon bakeh ambo. "Apo Mon? Sia bacaruik?" Tanyo ambo sambia mangaruikkan kaniang. Alah ka batea-tea pulo Simon ko, ari pagi baru? "Ayam ko." Jawek Simon. Sungguah alun tantu dek ambo antah apo pulo nan dimungkasuknyo. Walaupun manuruik ambo wanyo batea-tea, tapi ambo ndak barani mementahkan apo nan disabuiknyo. Karano sekian kali akhirnyo terbukti bahaso nan disampaikannyo tu ternyata bana. Lagipulo, kemampuan utak ambo jauah di bawah inyo. Takana juo dek ambo wakatu SD, ambo baraja mancaliak jam ka wanyo di musajik, sasudah sumbayang tarawiah. Walaupun alah ditarangkan guru di sikola, namun ndak juo mangarati ambo baa caro mancaliak ari pukua bara di jam. Sasudah ditarangkannyo berulangkali bakeh ambo nan utak kadu ko caro mambaco jarum panjang jo jarum singkek, akhianyo ambo bisa mangarati, sampai kini. Alun sempat ambo batanyo baliak, si Simon ko malanjuikkan keceknyo. "Ayam bakulik, kambiang mambebek, ayam jantan bakukuak, induak ayam bacaruik." "Ha? Baa pulo induak ayam bacaruk? Ado-ado sajo waang ko." Sanggah ambo. "Kok indak picayo waang, cubo caliak sabanta lai." Jawek Simon data. Tarnyato, iyo batua kecek Simon tu. Antah baa pulo, partamo memang sulik dipicayo, tapi sasudah diparatikan bana, batua nan dikatokannyo tu. Induak ayam nan ambo mungkasuik tadi adolah saikua induak ayam kuriak. Baputa-puta nyo sabalik dangau antah apo nan dicarinyo. Indak sampai saparampek jam sudah tu, wanyo mulai bacaruik. Caruik nan partamo kurang jaleh tadanga dek ambo. Sasudah ambo danga-kan bana, baru samakin jaleh. "Pa.., pa.., pa.., pan**k, pan**k!" "Pa.., pa.., pa.., pan**k, pan**k!" Ambo kurang yakin, ambo latakkan kaduo tapak tangan di balakang talingo ambo, manadah ka muko untuak bisa manampuang suaro dengan semakin jaleh, apo nan sabananyo disabuik induak ayam tu? "Pa.., pa.., pa.., pan**k, pan**k!!" Katonyo baliak! "Nah, indak picayo waang tu." Taruih Simon kalera ko seakan maledek ambo. "Barbeda jo sistem pita suara pado manusia, rongga farink pado ayam indak ka pernah bisa menghasilkan suaro seperti huruf "k" di awal kato. Namun awak manusia, nan selalu menganggap diri awak surang paliang tahu tentang makhluk lain berasumsi bahaso induak ayam mengucapkan kato 'kotek'. Padohal sabananyo nan dibaconyo samo jo nan awak anggap sebagai kato caruik." Taruih Simon. Kalimaik-kalimaik Simon nan kaduo tu sungguah ndak ambo mangarati apo mungkasuiknyo. Sadangkan ayam tu taruih berulang-ulang juo manyabuikkan kato"ampek" tu. Tibo panik ambo. Alah ka kiamaik ari ko? Baa kini induak ayam bacaruik-caruik bagai karajonyo? Sia nan dipacaruikkannyo? Apokah wanyo bacaruik karano liang ciriknyo sakik dek ka batalua? Alun sempat pertanyaan-pertanyaan lain muncul di benak ambo, ambo ambiak arai karambia nan ado di dakek dangau durian, ambo kaja ayam tu. "Sieh! Sieh! Alah tu bacaruik juo ayam!" Pai dari siko, pai!" Sagah ambo. Ayam tu lari dari kajaran ambo, namun nan caruiknyo taruih juo, bahkan samakin kareh, samakin kancang, samakin panjang. "Sieh! Sieh!!" "Pan**k, pan**k, pan*******k!!!" "Sieh!!!!" "P**teeeeeeeeekkkkk!!!" Ambo jatuah pingsan. Pagi-pagi, sasudah bergadang samalam suntuak manunggu durian, alun makan sarato alun minun bagai, alah lari-lari mangaja induak ayam jo arai sabalik parak. Baa ndak ka pingsan. Butuh wakatu bertahun-tahun bagi ambo untuak bisa manarimo kenyataan nan dikatokan Simon ko, bahaso induak ayam bacaruik. *** Bogor, Sabtu 15 April 2005 N.B: Jikok dunsanak ndak picayo, cubo dangakan bana kalau ado induak ayam nan ka batalua di ateh sangkak. Dangakan bana elok-elok, simakkan bana! Ambo yakin sasudah tu dunsanak pasti picayo dinyo. Wassalam, Wady Afriadi Sutan Pamenan [email protected] http://groups.yahoo.com/group/urangawak -------------------------------------------------------------------------------- -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
