Assalamu'alaikum wr.wb. Dek ambo yang lahia jo gadang di Padang, masalah "Kamar Rontgen" atau warung kelambu di Taplau (istilah kami rang mudo di Padang untuak pantai Padang) ko bukan hal aneh dan ndak bisa ditutupi, karano pertumbuhan ekonomi kota Padang memang lambek, apolagi sajak terminal Andalas pindah ka Aia pacah jo bandara Tabiang alah dipindahkan ka Katapiang. Hal iko manambah lambek pertumbuhan ekonomi kota Padang sebagai ibukota Provinsi, karano pusat perdagangan manjadi pindah dan tabagi, urang labiah sanang balanjo ka Bukik Tinggi dari pado ka Padang dek hetongan kali-kalinyo untuak biaya operasional. Kalau di Padang balanjo ado tambahan kali-kali ongkos kuli ka ateh angkot + ongkos angkot + ongkos kuli di terminal Aia pacah untuak manaiakan ka Bus. Kalau di Bukik Tinggi tingga bayia kuli dari pasa Bukik ka terminal sajo karano terminal jo pasa dakek. Dan malah labiah rami terminal bayangan di Simpang Duku jo Simpang Lubeg daripado terminal Aia Pacah. Efek sampiangnyo pemindahan bandara jo terminal ko manambah pengangguran dan daya beli rendah karano Pasar Raya Padang alah langang kini. Biasonyo di Pasar raya Padang kalau nio manyewa kadai (waktu terminal di Lintas) paliang pendek 2 tahun dan nilai sewa ratusan juta, kini kadaix2 di pasar raya Padang tu alah banyak yang tutuik, yang punyo kadai malah kalau ado yang nio nyewa hituangan bulan pun dengan nilai rendah pun akan diberi. Kalau dimisalkan di pasar Raya Padang ado 300 kadai, tiok kadai misalkan punyo karyawan ba-3 urang. Kini dek alah langang karyawan disusuikan jadi sorang artinyo alah 600 urang yang nganggur, ditambah lai buruh kasar yang jadi faktor pendukung yang kahilangan mato pancarian. Jadi banyak dunsanak jo anak kamanakan kito di Padang yang putuih sikolanyo dek kahilangan mato pancarian. Ka masuak ka Industri pertumbuhannyo bainsuik-insuik pulo. Apolagi biaya hiduik makin maha kin dan lapangan karajo susah pulo, yang berefek ka peningkatan kriminal jo prostitusi. Yang alun barubah dari dulu sampai kini, perekonomian Sumbar masih tergantung ka kiriman urang rantau dan APBN. Jadi sia yang salah??? Kalau ambo hanyo manyarankan, kalau dunsanak, niniak mamak, jo bundo kanduang yang di rantau ado kelebihan rezki, investasikan lah di Sumbar, bia tabuka lapangan karajo untuak dunsanak jo kamanakan kito di kampuang. Yang paralu kini tindakan nyata dari perantau untuak mambuka lapangan karajo di kampuang.
wassalam Reza -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
