Assalaamu'alaikum wa rahmatullaahi wa barakaatuhu Baitu banalah 'adaik jo kabiasoan', sarupo nan di caritoan Bundo Nismah ko. Indak ado nan bakakalan doh. Batukano taruih. Kadang-kadang batuka naiak, kadang-kadang batuka turun. Kadang-kadang tampak bagantino jo nan labiah lamah, nan labiah buruak pado nan sabalunno. Tapi adokalono pulo batukano jo nan labiah elok jo nan labiah rancak daripado nan taralah. Sarupo conto nan dikamukoan dek Bundo tu, pakaro caro urang saisuak manjago etika, manjago moralitas. Ado sangsi di tangah masyarakaik, untuak manjago supayo urang jaan sampai lalu lalang sajo ba sakahandak atino. Jaan sampai urang babuek nan indak elok di tangah masyarakaik.
Mako dibueklah kasapakatan, dibuek paraturan, dibuek undang-undang. Sia-sia nan malangga paraturan diagiah sangsi. Babuek cemo samisal baintaian, tatangkok di urang kampuang, digunduli urang kapalo, di arak urang bakaliliang kampuang. Nan sampai digunduli sarato diarak bakaliliang kampuangko mungkin nan alah sabana jauah babuek doso agakno dan tatangkok basah di urang. Ado pulo nan tausia dari nagari. Ado nan didando sapanjang adaik. Tapi titian lah barubah manjadi lapuak, paraturan lah barubah manjadi lungga, undang-undang muloi ditinggaan urang. Nan saisuak dinilai sabagai cemo, kinilah manjadi barang biaso. Nan saisuak mamariangik, kinilah jadi kabiasoan. Nan saisuak indak buliah dikarajoan, kini dipatontonan urang ditangah rami. Baitulah kabiasoan. Itu contoh kalau awak mancaliak dari sisi nan negatifno. Dari nan elok barubah manjadi buruak. Tapi iyobana sarupo itu kasadoanno? Sainggo awak indak dapek maraso optimist saketek juo lai? Rasono bukanlah sarupo itu bana. Banyak nilai-nilai nan barubah sabaliakno dari nan daulu kurang rancak manjadi kini labiah elok. Daulu urang padusi nan amuah babusana muslimah sangaik terbatas. Iyobana binyi buya sin barangkali nan amuah babusana muslimah sacaro elok jo langkok walaupun indak kasadoan binyi buya amuah bapakaian sarupo itu. Bahkan ado diantaro binyi buya nan cukuik jo manyaok-an kain salendang sajo ka kapalono sakadarno, indak sampai balilik bana. Daulu anak sakola PGA, bajilbab pai sikola. Caro dikampuang kami disabuik 'balilik', sabab sabana rapek lakek kain salendang tu di kapalo. Ambo punyo babarapo urang kawan saisuak nan sikola di PGA, nan 'balilik' ko pai sikola, tapi sayangno baitu sampai di rumah, katiko alah pulang dari sikola, lapeh lilik tu sa lapeh-lapehno. Bukan sakadar di rumah sajo, bahkan katiko pai ka pasa bagai batuka bajuno jo pakaian rok, 'babukak' tenda. Sabab katiko itu, mareka mamakai busana muslimah alun jo kasadaran, tapi samato-mato dek karano 'tapaso', dek paraturan sikola PGA. Kini samakin banyak, urang padusi nan mamakai busana muslim, walaupun ano bukan anak sikola PGA. Nan mamakai pakaian muslim ko, nampak di ambo, sabana banyak pulo nan iyo bana istiqamah. Iyobana jo kasadaranno mamakai jilbab tu. Dari saari kasaari samakin batambah sajo jumlahno. Katiko ambo baru pindah ka kantua Jakarta 13 tahun nan lapeh alun surang juo lai kaum padusi di kantua ambo nan mamakai jilbab. Tapi kini alah bapuluah banyakno nan babusana muslimah ko. Katiko ambo ketek-ketek saisuak, musajik di kampuang kami ramino hanyo ari Jumaaik atau dibulan puaso katiko urang sumbayang tarawiah.Sumbayang mugarik, paliang-paliang sa saf ketek urang laki-laki. Kini sakali-sakali ambo pulang, ambo dapek-i ado juolah kamajuan saketek. Di kompleks tampek ambo tingga, katiko ambo baru pindah, indak sampai sapuluah urang jamaah sumbayang subuah doh, itupun kabanyak-an urang tukang nan manompang lalok di musajik. Kini alhamdulillah, bisa sampai 70 urang (laki-laki jo padusi) jamaah sumbayang subuah, nan umumno panghuni kompleks. Jadi nampakno, aturan nan biaso awak katahui sabagai sakali ayia pasang, sakali tapian barubah, ka tatap balaku juo taruih. Tingga sasudahtu aa paidah patukaran galombang tu ka masiang-masiang awak. Wassalaamu'alaikum, Lembang Alam ----- Original Message ----- From: "Hayatun Nismah Rumzy" <[EMAIL PROTECTED]> To: <[email protected]> Sent: Friday, May 12, 2006 2:01 PM Subject: [EMAIL PROTECTED] Adaik Saisuak > Assalamu Alaikum W. W. > Tabayang-bayang saisuak dizaman Japang (1943-1945) dikampuang bundo > dikenagarian Tolang kawedanaan Suliki Luhak 50 Koto. Sapasang anak manusia > diarak sakaliliang kampuang rambuiknyo dicukua. Apo sababnyo? Tadanga dek > bundo urang bisiak-bisiak dek karano baintaian. Baintaian tu bahaso kunonyo > kok kini lah basabuik bapacaran.
-------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
