Assalaamu'alaikum wa rahmatullaahi wa barakaatuhu Bola sadang heboh jo World Cup di Jaruman, di rantau rangkayo Eva. Hao-no mangepoh kasabalik pinjuru bumi. Hikmah nan langsuang ambo nikmati di Jakarta sajak alek main bal di Jaruman ko adolah lancar jalan pagi-pagi di Jakarta. Banyak bakurangno macet. Indak sarik bagai manarang-an panyabab 'langang' ko sabab umumno urang abih manonton bola duo atau tigo ronde tiok malam sainggo agak takalok saketek pagi ari. Nan partamu pukuah salapan sampai pukuah sapuluah malam (tigo hari tarakhirko digeserno pulo ka pukuah sambilan malam). Sudahtu, kabano pukuah sabaleh. Sudahtu nan pangabisan pukuah duo malam.
Ota urang indak barasak pado bola. Tantang Parancih seri jo Korea. Tantang Portugih mangalahan Meksiko. Tantang Ghana masuak ka 16 besar. Ateh maatehi dalam ota. Labiah malabiahi dalam curito, indak dapek nan kadisabuik. Manonton bola ko alah manjadi bisnis tasandiri pulo di ibu kotako, jo nonton bareng, jo manonton bajamaah. Baitu kalau hobby jano si Utaih. Kok diambo manonton bola ko 'untuanglah' alah malapeh canduno. Indak sarupo saisuak bana lai doh, walaupun saisuak tu indak lo sampai talabiah-labiah bana. Takana juo di ambo katiko manonton final antaro Bulando jo Jaruman (Barat) tahun 74 nan di adokan di Jaruman pulo, di tv nan itam putiah maso itu. Bulando daulu mancetak gol, tapi main bakasudahan 2-1 untuak Jaruman. Tahun 78 ambo manonton sabagian partandiangan di tv tu di Sawah Lunto. Taun 82 jo 86 di Baliakpapan. Taun 90 kabatulan kami sadang di Makkah jadi indak sato manonton. Tahun 94 sampai nan kiniko, manonton sakadar-sakadarno sin lai. Nan kiniko ambo tonton nan pukuah salapan malakik pukuah sambilan, sudah tu indak lai. Dek digantino jam main manjadi pukuah sambilan, jadih pulolah, ditontonlo nan pukuah sambilanko malakik pukuah sapuluah sudah tu indak lai. Anak-anak ambo lai nan amuah lo manantian labiah laruik pado itu, batanyono ka ambo, baa mangko indak dinantian sampai sudah. Kecek ambo, kamanggaduahlo ka lalok awak, sudahtu ka manggaduahlo ka jago subuah awak. Pamandangan nan ka ditonton itu ka itu juo, urang bakaja-kaja kahilia ka mudiak. Bialah bisuak pagi sin dibaco resume partandianganno tu. Pakaro main bolako memang ambo rato-rato sajo. Katuju lai tapi indak mancandu bana. Di kampuang kami saisuak ado duo tanah lapang. Tanah lapang gadang, talatak sabalah ka ilia, sabana ka tampaik urang main bola iyo bana, acok diadoan partandiangan antaro klub babagai kacamatan katiko itu. Kami manyabuikno 'balai ilia'. Nan ciek lai tanah lapang ketek, sabanano balai adaik, lapangan barumpuik juo, tampek kami nan ketek-ketek saisuak main bola pulo disinan, kami sabuik 'balai mudiak' sabab talatak di sabalah ka mudiak. Ambo biaso main bal di kaduo-duo lapangan tu. Katiko masih ketek-ketek bana, kami main di balai mudiak. Katiko alak baranjak remaja, alah sabana batandiang main bal pulo kami, main di balai ilia. Sayang nan balai iliako sajak taun 74 alah diubah urang manjadi patapak-an sakola SMP Ampek Angkek. Partimbangan no wakatu itu, di kanagarian kami Balai Gurah, ado tigo jorong, di satiok jorongko ado tanah lapang. Mako dikorbananlah tanah lapang nan di nagari kami itu bana. Katiko ambo batapa di Banduang sajak taun 70 sampai taun 79 buliah dikecek-an indak panah lai ambo main bola. Paliang-paliang jadi panonton sajo. Tapi di Baliakpapan timbualo sumangaik, amuah lo ambo baradu kaki bagai jo urang Parancih di tanah lapang. Main bolako iyo managia, iyo amuah lupo jo umua awak dino. Ikolah nan intino bana nan ka ambo sampaikan, jaan sampai tapadayo bana awak jo tontonan bola ko. Batanggang tiok malam sainggo jadi bapetai-petai urusan. Tamasuak urusan ibadah kapado Tuhan Allah. Wassalamu'alaikum, Lembang Alam -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
