Assalamu alaikum warahmatullhi wabarakatuh,
Alhamdulillah, dapek barito baiak kami, lah jadi Inyiak malah kirono Angku
Lembang; dikaruniai Allah cucu kamba. Dari jauah di subarang Lauik Basa,
Nyiak Sunguik mangucapkan salamat ka Inyiak Baru jo Enekno sarato famili
kasadono.Mudah-mudahan si Kamba Duo sehat dan selamat basamo Bundo mareka
dengan doa dan harapan mareka manjadi anak-anak dan insan nan saliah
nantinyo panambah sumarak ugamo kito untuak ibadaik mareka di dunia nan
kadibawo ka akhirat pulo nantinyo.
Di Kampuang Awak ado duo panggilan. Walaupun cucu nan garih langsuang alun
ado, banyak cucu-cucu maimbauan ambo "Inyiak" dan cucu nan dakek maimbauan
"Uwak". Anak ambo nan tuo Samudera baru anambaleh tahun, lapeh kalas duo ka
masuak kalas tigo di High School, baru dapek SIM patang ko, sabanta-sabanta
lah mintak kunci oto untuak praktek. Anak gadih ambo Mutiara baru 11 tahun,
salasai kalas satu ka masuak kalas duo Middle School, suko main piano,
manggambar, sepak bola kaki (soccer), baranang, mamanjek-manjek tabiang
curam (rock climbing). Kini saminggu ko mangikuti Rock Climbing Camp di
Santa Kuruih.
Salam,
Nyiak Sunguik
#47808 From: "Muhammad Dafiq Saib" <[EMAIL PROTECTED]>
Date: Tue Jun 27, 2006 1:53 pm
Subject: [EMAIL PROTECTED] Inyiak [EMAIL PROTECTED]
Assalaamu'alaikum wa rahmatullaahi wa barakaatuhu
Ambo indak basuo jo inyiak kanduang ambo doh. Baiak inyiak kanduang dari
fihak bapak maupun inyiak dari fihak ibu, walaupun nenek (enek) lai basuo
kaduono. Baa kasiah inyiak ka cucu tantu indak jaleh di ambo doh, sabab
indak panah ambo rasoan. Inyiak sapasukuan lai ado, nan ambo imbau inyiak
juo, tapi indak inyiak nan tapek bana. Balain pulo saketek pado itu ado pulo
inyiak Sunguik nan di Santa Kuruih, lawan badiskusi awak di Palanta ko, nan
ambo himbau inyiak juo.
Salamoko, umumno 'cucu-cucu' ambo ajaan maimbau ambo inyiak. Baiak cucu
dari kakak sapupu, dari kakak badunsanak apak, atau dari adiak kanduang
sakalipun. Panggilan 'inyiak' tu bana, indak 'kakek' indak 'pak gaek' apo
lai 'opa' doh. Alhamdulillah lai bih amuah lo anak-anak tu di aja sarupo itu
(baa lo kaindak, tiangno di awakno). Sanang bana ati ambo di pa inyiak dek
'cucu-cucu' tu. Ambo ajaan supayo prononsiasinopun harus 'inyiak' bukan
'inyik', sabab awak iyo alah jadi inyiak urang.
Tuhan Allah Kayo Sungguah, tibo juolah masono ambo mampunyoi cucu nan sabana
cucu. Anak dari anak kanduang ambo nan paliang tuo, nan kami paralek-an
tahun nan lapeh. Tanggal 5 Juni kapatang lahialah cucu ambo. Maha Kayo
Allah, Maha Pangasiah, Maha Panyayang, sakali duo dapek. Kamba, laki-laki
kaduono. Subhanallah. Bacucuran ayia mato mangaji untuak mareka kaduono.
Sanang ati indak dapek nan ka disabuik. Alah sajak dalam kanduangan, katiko
anak ambo diagiah tahu dek dotor bahaso anakno kamba, jo gurau katiko itu
ambo kecek-an kok nyampang laki-laki kaduono, ampek biko kambiang untuak
mangaqiqahkan no. Katiko tanyato iyo laki-laki kaduono, iyo bana ampek
kambiang ambo dabiah, ambo bana mandabiahan ka ampekno.
Tiok ari kini bagageh ambo pulang dari kantua, untuak sugiro mamangku-mangku
cucu, dipagantian. Sambia mangaji-ngaji. Sabana sadang tacurah kasiah ka
cucu. Gadang raso syukur kapado Allah Ta'ala. Ambo alah sabana jadi inyiak
kini. Alhamdulillah.
Wassalamu'alaikum,
Lembang Alam
No virus found in this outgoing message.
Checked by AVG Anti-Virus.
Version: 7.1.394 / Virus Database: 268.9.4/375 - Release Date: 6/25/2006
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================
