Waalaikum Salam Wr Wb mamak Darul
Salamoko ibuk guru Hanifah nan batanyo taruih,
jikok kini tanyo diarahkan ka Hanifah baa no?
Kalau batanyo biasono hanifah lai agak santiang saketek he he he,
Kalau manjawek ?? ? Hanifah masih baraja. Apoli mamak batanyo di forum, duh
alun PD li untuak manjawekno. Salah jawek babahayo,, Kalau di kelas salah
jawek, bisuakno dipelok- i baliak, nan tau anak-anak dikelasnoh. (antah tauno
awak salah antah indak lo du). Hanifah cubo juo untuak manjawek tanyo mamak dih
Disiko Hanifah mangecekan seluruh murik dipandang samo rato.
Maksud hanifah dalam maagiah nilai akhir. Panilaian sasuai antaro kamampuan
anak jo interval nilai. Indak ado dipangaruahi oleh tali kakarabatan dan
lain-lain. Anak kawan, anak saudara atau anak pajabat indak diangkek nilaino
doh. Apo Adono .
Tapi kami nan agak manangah-manangah kapandaianko iyo maraso korban dek
disamoratokan dek guru dulu. Dianggap anak samo kepintaranno. Sahinggo nan
manangah kabawah iyo tangah-angah mangajai pelajaran nan mangalir taruih.
He he he, pasan kami ka anak-anak umumno mantun, bagi nan agak manangah
kabawah kamampuan, agak rajinlah baraja di rumah, ulangi palajaran sampai
ngarati. Bilo paralu buek kalompok baraja. Kalau indak mangarati hari iko,
bisuak labiah indak ngarati, karano biasono materi indak tambah mudah doh tapi
tambah sarik. Mestino guru bapatokan ka anak-anak nan manangah karano jumlahno
labiah banyak dari pado nan santiang atau dari pado nan lambek (ongok).
Apo lai guru dan masyarakat iyo bana manyanjuang nan santiang,maaguangkan nan
juara, tambah taicialah kami jadino. Baa ikoko Hanifah.
He he he jadikan menah itu sabagai palacuik supayo juara pulo. Kadang-kadang
guru banyak dapek ilmu dari nan santiang, asal guru pandai mangambangkan
partanyaan dan pandai mamotivasi. Dapek murik kayak pak saaf kan asyiik di
mamak du, banyak ilmu nan dapek diambiak he he he.
Mamak Darul, anak hanifah nan tuo indaklo juara doh. Mamano suko matematika,
ano indak suko doh. Katiko di SMA dipiliahno jurusan IPS. Untuang sabalun ano
mamiliah jurusan IPS dun hanifah pernah badiskusi jo kawan nan doctor dibidang
statistic binino doktor di bidang pertanian. Anakno jurusan IPS, katono gpp
jurusan IPS, banyak orang terkenal berasal dari jnurusan IPS, yang penting dia
bisa mengembangkan dirinya secara optimal.
Tanyo kaduo, apo memang guru kini iyo terikat bana di kurukulum, sahinggo
sangat mangaja (mamburu) bahaso nan penting alah diajakan. Mangarati Indak
mangarati itu resiko kudian.
Bisa jadi juo. Karano target akhirno kan UAN. Dari pado disasai anak-anak
materi dun alun diajakan, rancaklah diagiahan sen walau sakileh. Palapeh tanyo.
He he he. Maaf mamak darul, hanifah indak guru di SMA doh, jadi jawekno asal
bunyi sen
Dek buku jo pelajaran iyo sauyak piyak, penguasaan anak didik banyak nan
kurang, apo lai kalau ditanyo
"mencongak" apo lai analisa, anak tamatan SMA kini iyo bana payah, apo lai
nan manangah kabawah.
Susah mancari kambiang hitamno, karano banyak faktor nan mampangaruahi proses
belajar mengajar. Kami bisa juo batanyo, anak SMA mana dulu? Kalau dari SMA
unggul jo guru pilihan dan fasilitas mamadai kali ndak bantuak itu hasia no
doh. Palajaran mancongak kan palajaran di SD, jadi yang salah guru SD bukan
guru SMA.
Dulu, urang nan lah tuo kini, apa mato angin, bilo maadok ka Barat mako
dikida adolah Selatan dan di suok Utara. Jikok ditanyo anak tamatan SMA
kini, indak tauno doh.
Ditanyo Malang dima di Peta, kacau. Apo lai ditanyo 13 x 25 berapa? 37 x 25
berapa? Mereka mancari kalkulator ataupun pintuluk dan karateh.
Materi nan diateh dun juo palajaran di SD du, bukan SMA, jadi nan salah bukan
guru SMA.
Tamat SMA IPA indak tahu sudut berhadapan sama besar. Iyo ibo hati.
Lupo ano kali du? Atau istilah nan beda. Dek mamak batanyo sudut berhadapan
sama besar, tibo di anak kali istilahno sudut sehadap sama besar.
Jikok nan bantuak iko tajadi, sia nan salah: ortu, guru, sistim pendidikan,
indak ado UAN atau sia/apo?
Sarupo nan hanifah sabuikkan tadi banyak factor nan mampangaruahi Proses
Belajar Mengajar diantarono:
Kualitas input
Kualitas guru
kurikulum
Fasilitas
Evaluasi/ Penilaian
Lingkungan
dll
Awak tinjau dari sisi guru sen dulu dih
Untuak palajaran matematika, ilmuno kan barantai sajak dari SD sampai
sataruhno. Kagagalan pangajaran matematika manuruik hanifah kambiang hitam nan
partamo adolah di tingkat SD. Mamak alah maagiahkan contoh no di atehkan. Apoli
kalau mamak suruah maetong pecahan...
Baa kok mantun guru SD?
Rasono anak nan santiang nan manyukoi matematika katiko di sikola jarang nan
mamiliah jadi guru SD noh, apoli gaji guru SD ketek, batugaih mungkin kapalosok
palosok, jauah dari karamian kota dll.
Kalau palajaran SD indak tuntas, tantu guru SMP kelabakan, lalu tibo di guru
SMP maupun SMA tantu tajebak jo pilihan.. maulang palajaran atau manaruihkan
palajaran ?. Kalau guru professional tantu kaduono dijalani jo pangaturan waktu
yang tepat, kalau indak yaaa tapaso diakhir pangajaran diagiahkan sambia lalu
untuak palapeh tanyo.
Kambiang hitam nan tarakhir tantu urang nan maluluihkan calon guru nan indak
bakualitas jadi guru.
Sia nan salah???
Jalan kaluano
diantarono ..
Gadangkan GAJI GURU SD sahinggo banyak calon mahasiswa mamiliah PGSD.
akhirno bisa tajariang calon guru nan bakualitas.
Dari pangalaman maaja guru atau calon guru SD babarapo tahun nan lalu,
banyak diantaro calon guru atau guru tersebut indak suko jo matematika doh.
Bahkan ado diantaro guru-guru SD dun indak apa dino kali-kali 1-10 doh. Baa
lidu?
Mungkin untuak calon guru SD di bidang matematika atau IPA dipisah sajo dari
PGSD nanbaraja sagalo ilmu, dan bagabuang ka jurusan pendidikan matematika.
Pasti calon mahasiswa nan tajariang adolah calon mahasiswa nan manyukoi
palajaran matematika. (iko hanyo pandapek bebas)
Mantun nan bisa hanifah jaweknoh. Talabiah takurang mohon maaf.
Wass
Hanifah Damanhuri
NB. NIDAAAA mancogoklaaaah tolong tukuak katarangan iffaaaah.
---------------------------------
Groups are talking. We´re listening. Check out the handy changes to
Yahoo! Groups.
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================
