Waalaikumsalam w.w. Ananda Hanifah,
Kok pakaro adat jo ugamo, ambo bana kan indak ahli doh. Kan paranah ambo tulih
dalam milis awak ko bahaso posisi ambo adolah sakadar 'konsumen' sajo, nan
taheran-heran mancaliak baitu banyaknyo masalah mandasar ABS SBK nan
tagaiang-gaiang indak salasai salamo 600 tahun dan paliang kurang salamo 170
tahun.
Berkat doa Ananda, kini alah dapek ambo salasaikan Edisi Revisi 3c dari Matriks
Klasifikasi Empat Jenis Hukum Adat Minangkabau dalam rangka Doktrin ABS SBK dan
Masalah Implementasi Kelembagaannya dalam NKRI. Sasudah ko ambo kirim ka Ananda
malalui jalur japri. Sasudah sampai, bisa Ananda forward kama-kama. Kalau
malalui Rantau.net kan attachment sacaro otomatis ditulak.
Tantang matriarchat jo patriatchat. Ambo acok bana diingekkan dek para ninik
mamak, bahaso Mianngkabau indak manganut sistem matriarchat, tatapi sakadar
matrilineal sajo. Artinyo para kaum ibu samo sakali indak ado kuasonyo dalam
suku, karano sagalo kaputusan ado di tangan niniak mamak, nan sadonyo
laki-laki. Jadi posisi kaum ibu adolah sakadar basifat administratif sajo,
untuak jadi rujukan dalam mambuek ranji, Indak labiah dan indak kurang. Di
Balai Adat samo sakali indak ado tampek untuak padusi. Ambo kiro memang
demikian kadaannyo manuruik adat nan kito tarimo.
Namun, ambo kurang nyaman dan kurang satuju jo praktek saroman tu. Kalau iyo
kito mamuliakan kaum ibu, sasuai jo niaik dan jo ajaran ugamo Islam, yo
diagiahlah tampek nan terhormat kapado kaum ibu dalam maambiak kaputusan dalam
sagalo bidang, apolagi kini alah tanyato bahaso anak padusi kito sabana
santiang, kalah anak-anak laki dek inyo. Ambo paranah hadir dalam wisuda anak
ambo di UI Depok. Dari 12 alumni nan luluih 'cum laude', ado 10 nan padusi !
Bukan main.
Ado ciek lai. Nampak di ambo kito urang Minang mancampur aduk antaro garih
katurunan jo harato pusako, dan nampaknyo kito labiah mamantiangkan harato
pusako daripado katurunan. Kan itu nan malatarbalakangi tatanan aneh sawakatu
suami isteri tatap dalam sukunyo surang-surang, urang sumando disabuik 'abu di
ateh tunggua, dan adonyo konsep 'punah' dalam manyusun ranji kaum dan suku.
Tantang 'punah' ko, kalau dalam suatu kaum atau suku, bilo indak ado lai anak
padusi nan sacaro administratif akan mamaliharo garih katurunan jo harato
pusako, mako kaum atau suku tu disabuik punah, abih, putuih katurunan, walaupun
katurunan laki-laki nan batali darah bukan main banyaknyo.
Lamo tapikia dek ambo, baa mampartanggungjawabkan konsep 'punah' ko sacaro
agamo, karano nasab manuruik Islam kan justru manuruik garih laki-laki. Itu
nan tajadi jo Ayah ambo, nan alah ambo tulis sacaro langkok dan jaleh dalam
buku nan ambo tulih jo Dunsanak Ir Mohammad Zulfan Tadjoeddin, MA (2004).
Syukurnyo, masalah ko alah bisa kito salasaikan malalui wacana dalam milis RGM
GM nan diasuah dek Ananda Dt Marah Bangso, yaitu jo mamakai software komputer
"Family Tree Maker" nan bisa dibali di Glodok, Jakarta. Jo software ko, kok
kito nak tahu sia nan tamasuak garih matrilineal, caliak sajo urutan dari garih
padusi. Kalau kito nak tahu sia nan tamasuak 'nasab' kito manuruik garih
laki-laki, yo diurut sajo dari garih laki-laki.
Tantang pabandiangan jo urang Batak. Walau dalam soal harato pusako juo ado
masalah, yaitu nan padusi samo sakali indak dapek warisan, namun dalam soal
kahidupan bakaluarga urang Batak salain labiah kompak dari keluarga urang
Minang model lamo, juo indak ado konsep urang sumando sabagai 'abu di ateh
tunggua'. Kalau urang kawin, nan padusi masuak marga lakinyo. Basamoan jo itu
diatur hubungan antaro marga 'hula-hula' jo 'marga boru', sahinggo pihak
laki-laki tatap haruih hormat ka marga padusi. Ado gajala, padusi Batak kini
alah mulai mamparjuangkan hak warisnyo -- nan indak ado dalam adat Batak --
malalui Pengadilan Negeri. Dalam babarapo kasus mereka alah mulai manang.
Tantang baa caro malaksanakan ABS SBK dalam soal matriachat jo patriarchat ko,
supayo indak tajadi gajolak dalam soal sako jo pusako, pandapek pribadi ambo
adolah sabagai barikuik.
1. Dalam soal internal kaum jo suku, masalah garih katurunan jo harato
pusako.
a. Jalehkan bana dulu apo sasungguahnyo peranan padusi dalam kaum sarato
suku, apo
sakadar basifat administratif dalam manyusun ranji atau ka baiyo bana
manghormati
padusi sabagai pamilik harato pusako. Kini kan indak jaleh doh.
b. 1) kalau sakironyo peran padusi memang sakadar basifat administratif
sajo,
sadangkan sagalo kuaso ado di tangan ninik mamak, yo taruihkan
sajolah apo nan
dipraktekkan salamo iko. Hanyo ambo tatap juo heran, baa mako jauah
bana
praktek jo teori adat tantang peranan padusi sabagai ' Bundo
Kanduang'.
2) kalau sakironyo peran padusi indak sakadar administratif tapi
bana-bana
dimukasuikkan untuak mamuliakannyo, atur baliak tatanan kaum jo suku
ko, sacaro
maso kini, antaro lain manduduakkan nan padusi sabagai samacam
pemegang
saham harato kaum jo suku nan bagabuang dalam rapek kaum atau suku
nan
manjadi 'Rapat Umum Pemegang Saham' (RUPS) dan para niniak mamak
sabagai
'Direksi' dari kaum dan suku nan haruih mambuek partangguang
jawaban taradok
manajemen harato pusako. Kalau indak basifaik amanah, yo ditinjau
baliak.
c. Sistem matrilineal jo limbagonyo saparati urang ampek jinih dan tanah
ulayat masih
bisa dilanjuikkan, tapi direformasi jo ajaran Islam nan dalam garih
katurunan maajakan
bahaso nasab diurut malalui garih laki-laki. Manuruik Buya H. Mao'oed
Abdin dari MUI
Sumbar, rumusnyo adolah: kito 'banasab ka bapak sasuai jo Islam, tapi
basuku ka ibu
sasuai jo Adat'. Baliau mangusulkan istilah untuak sistem sosial nan
taintegrasi ko
sabagai 'sistem matrilineal plus'. Ambo satuju bana jo usul Buya Mas'oed
Abidin ko.
c. Mulailah manyusun data nan langkok, bukan sajo sia anggota kaum jo suku,
baiak di
Ranah maupun di Rantau, tapi juo sia ipa bisan, urang sumando jo anak
pisang,
langkok, jan sampai ado nan taicia.
d. Untuak mamaliharo harato pusako kaum jo suku, buek bana Yayasan manuruik
undang-
undang maso kini, sahinggo harato pusako tu aman sacaro hukum dan indak
bisa
disalahgunokan sarupo salamo ko. Karano manuruik Pasal 203 Undang-undang
Nomor 32
Tahun 2004, sabagai masyarakat hukum adat, nagari paralu dilegalisasikan
malalui
Perda Kabupaten, mako tanah ulayat kaum jo suku bisa dibuekkan petanyo
basamo jo
peta ulayat nagari.
e. Ado ciek lai nan takana, apo memang masih tapaliharo harato pusako tu? Apo
indak
alah abih dek digadaikan jo dijua taruih manaruih salamo ko ? Apo indak
paralu paratian
diarahkan kapado baa manaruko jo mambangun harato pusako baru, indak
sakadar
mamaliharonyo, sahinggo urang Minang manjadi labiah dinams, basumangaik,
indak co
kini.
2. Dalam soal Keluarga.
a. Sasuai jo ajaran Islam dan UU Perkawinan tahun 1974, keluarga nan tadiri
dari ayah,
ibu dan anak-anaknyo adolah unit paliang dasar dari masyarakat. Biasonyo
dipimpin
dek ayah. Jadi indak ado tampek lai bagi konsep 'abu di ateh tunggua'.
b. Tantang namo urang Minang, tautamo nan laki-laki, manuruik pandapek ambo
tadiri
dari ampek unsur, yaitu 1) namo ketek; 2) namo ayah manurut ajaran
Islam; 3) namo
suku dari fihak ibu; dan 4) gala sasudah kawin. Sabagai contoh, namo
ambo dapek
di'ABS SBK'kan manjadi Saafroedin (namo ketek) Bahar (namo Ayah ambo)
Tanjung
(namo suku) Soetan Madjolelo (gala dari mamak). Kan langkok. Kalau nan
padusi kan
indak bagala doh.
c. Hubungan para ninik mamak jo keluarga indak labiah dari sakadar hubungan
bafamili, indak lai saroman nan dahulu, apolagi kawajiban baliau-baliau
nan
paratamo kan ka kaluargo baliau-baliau sandiri.
Sampai di siko lah dulu Ananda.
Wassalam,
Saafroedin Bahar.
----- Original Message ----
From: hanifah daman <[EMAIL PROTECTED]>
To: [email protected]
Sent: Sunday, August 20, 2006 9:59:12 PM
Subject: [EMAIL PROTECTED] matriakad VS patriakad
Ass Wr Wb bapak Saafroedin Bahar yth
Pak Saaf
Kasato hanifah diskusi tantang ABSSBK di abssbk yahoogroups.com, ilmu tantang
adaik minim, tantang agamo mantunlo. Baa kasato du. Harap maklum kalau hanifah
indak barani untuak sato.
Oh ya Pak Saaf
Kan di Minang balaku matriakad, konsep iko babedo jo agamo islam nan
patriakad. Kalau bapak akan maarahkan ka agamo, tantu nan akan dipakai konsep
patriakad ?. Bagaimana dengan harato pusako nan diperoleh badasarkan konsep
matriakad ? Apo mungkin dilakukan pamutihan? Baa pulo manganai suku?
Kalau bapak mampatahankan adaik, tantu nan balaku konsep matriakad ?. Bapak
akan terbentur di pambagian harato pusako tinggi manuruik ajaran agamo islam.
(untuak pusako randahpun masih sangaik jarang anak laki-laki kabagian, jatuahno
tatap kaanak padusi, tapi iyo indak kakamanakan doh, mantun nan hanifah tau.)
Baalah kiro-kiro konsep ABSSBK nan pantas manuruik bapak ?
Untuak silsilah kaluarga badasarkan patriakad walaupun dalam tatanan
matriakad, masih bisalah di atur. Agiah namo bapak di balakang namo awak, atau
buek pulo kasapakatan diantaro kaluarga besar katurunan bapak, namo sia nan
kadipatenkan, kayak marga di batak. Lalu adoan acara arisan misalno untuak
paikek talisilaturahim antaro sasamo dunsanak katurunan bapak. Suku badasarkan
matriakad masih bisa pulo dipatahankan. Kabatulan papa hanifah alah
manyarankan ide iko ka adiak-adiakno, namo nan dipakai adolah namo kakek.
Alhamdulillah parkumpulan iko sempat lamo aktif di Jakarta, antahlah kini antah
masih jalan antah indak. Kalau masih jalan indak tau pulo, apo masih bisa
batahan andaikan nan tuo-tuo (anak kakek) indak ado lai.
Nan susah iyo dipambagian harato pusako barangkali ndak pak?.
Itu sen dulu dari hanifah. Talabiah takurang mohon maaf.
Wass
Hanifah Damanhuri
---------------------------------
Yahoo! Messenger with Voice. Make PC-to-Phone Calls to the US (and 30+
countries) for 2ยข/min or less.
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================
