Ass Wr Wb mamak AAM dan dunsanak kasadono yth
Di bawah gon adolah ota2 ipah jo pak saaf di RN, tapi tasasek ka japri. Tadi
ipah alah parmisi buliah ditaruihkan ka BN dan ka RN, buliah kato baliau.
Mudah2an info iko kok lai kapaguno.
Wass
Hanifah Damanhuri
Waalaikumsalam w.w. Ananda Hanifah.
Tarimo kasih partanyaan-partanyaan Ananda ko, makin lamo makin mandalam. Ambo
cubo manjawab jo gaya Ananda, yaitu langsuang di bawah partanyaan, hanyo ambo
ganti warono hurufnyo sajo. Lieklah jawaban ambo di salo-salo partanyaan Ananda
di bawah.
Wassalam,
Saafroedin Bahar
----- Original Message ----
From: hanifah daman <[EMAIL PROTECTED]>
To: Saafroedin BAHAR <[EMAIL PROTECTED]>; [email protected]
Sent: Tuesday, August 22, 2006 9:22:44 PM
Subject: Re: [EMAIL PROTECTED] matriakad VS patriakad >>>
Ass Wr Wb bapak Saafroedin Bahar yth
Pak Saaf
Hanifah cubo mananggapi saketek nan dibawah gon dih. Nan lain lasuah sen
taraso mambacono.
e. Ado ciek lai nan takana, apo memang masih tapaliharo harato pusako tu?
Apo indak alah abih dek digadaikan jo dijua taruih manaruih salamo ko ?
Jawekno tantu tapulang ka masiang-masiang kaluarga.
Mungkin ado nan masih utuh, hal iko tajadi umumno dek kaluarga tersebut bi
marantau lalu batinggakan sen (basewakan) harato pusako ka rang kampuang.
Kabanyakkan iyo alah bi tandeh, mungkin tajua, tagadai atau alah jadi parumahan
dll.
Jawab : Ambo kiro memang iyo saroman nan Ananda katokan tu. Di tipak urang
rumah ambo mamang itu nan kajadian. Dalam jangko panjang angko-angko bara nan
tajua, bara nan tagadai kan ka katahuan, antaro lain malalui Perda Kabupaten
nan ka dibuek nanti untuak malegalisasi nagari sabagai amsyarakat hukum adat,
langkok jo peta tanah ulayatnyo.
Peta tanah ulayat nagari tu bisa dilangkoki jo peta tanah ulayat suku dan jo
peta tanah ulayat kaum. Jo mamakai GPS kan mudah sakali mambueknyo. Kalau alah
salasai sagalo peta tu, nanti jaleh baa duduaknyo harato pusako tinggi tu di
maso kini.
Apo indak paralu paratian diarahkan kapado baa manaruko jo mambangun harato
pusako baru, indak sakadar mamaliharonyo, sahinggo urang Minang manjadi labiah
dinams, basumangaik, indak co kini.
Satujuuuu.
Kadang-kadang tapikia di hanifah, urang jawa bi makmur di daerah sitiung dan
pasaman jo masa depan nan cerah karano mereka punyo kabun karet, sawit sawah
dll. Anak-anak merekapun banyak nan alah jadi urang (salasai sikola dan dapek
karajo). Baa kok urang Minang sendiri indak dipikiakan masa depanno dek pajabat
nan bawenang di Padang ?
Mungkin ndak pak, diadokan pulo pamukiman baru untuak rang minang sendiri di
wilayah minang? Kalau mungkin baa carono?
Jawab: Tarimo kasih ateh dukuangan Ananda taradok gagasan manaruko baru iko
Sudah barang tantu rencana tu bisa sakali dilaksanakani. Caronyo adalah malalui
program transmigrasi lokal nan kini alah manjadi program Pamarentah kito, d.h.i
dari Departemen Transmigrasi. Jadi tingga manunggu parmintaan jo prakarsa para
Dunsanak di Ranah sajo lai. Tantu paralu diinventarisasi bara tanah negara nan
tasadio lai di Suametara Barat, nan bisa dipakai untuak itu, dan bara pulo
banyak dunsanak kito nana mamaralukan tanah tu.
Jan lupo, urang batambah banyak sadangkan laweh tanah indak batambah lai doh.
Itu sabanyo manga dunsanak kito urang Batak, dima nyo datang, nan dicarinyo
dulu adolah tanah, untuak mambuek apo nan disabuiknyo 'sahala harajoan'
[=karajaan den surang].
Kok nyampang tanah kurang di Ranah, kito bisa bisa mintak tanah ka daerah
Riau. Rasonyo di Riau tanah masih laweh, walau sabagian kini dalam penguasaan
HPH jo HGU nan pado suatu saat pasti akan habih masonyo. Tantu untuak itu adat
diisi limbago dituang. Ambo sandiri,walaupun ado punyo rumah di Padang, tapi
indak punyo tanah pusako lai, karano tu maraso paralu mambuka ' tanah pusako
baru' dan untuak iko sajak babarapo bulan nan lalu sacaro informal alah
mambicarokan kapado babarapo tokoh masyarakat adat di Riau untuak maminta tanah
patanian manuruik pola transmigrasi lokal, sakitar 2,5 HA. Basamo jo
tokoh-tokoh masyarakat Riau tu, ambo sato maurus program transmigrasi lokal di
Riau ka Departemen Transmigrasi, dan pado dasarnyo bisa, mungkin tahun muko,
karano kan musti dianggarkan dulu dalam APBN.
Kok jadi dan diizinkan Tuhan, tantu bukan ambo nan ka bakarajo nanti di
sinan, tapi paliang indak ambo jadi 'niniak moyang baru' nan 'manaruko' , indak
lai sakadar barabuik mampacakakan tanah pusako tinggi suku ambo nan ado di
dusun Kajai, Kampuang Dalam, Pariaman tu. Nan di kampuang tu bialah diambiak
dek dunsanak sapasukuan ambo. Walaupun baru sampaikan niaik ambo ko sacaro
lisan, parmintaan ambo ko lai mandapek paratian dari tokoh-tokoh Riau. Salain
ambo, ambo ajak juo babarapo komisioner Komnas HAM lain sacaro pribadi, karano
tahun muko kami kan ka lengser. Ituang-ituang bekal pansiun, nan hahal manuruik
undang-undang jo manuruik adat.
Ado lai nan baminat? Nak ambo sampaikan ka para tokoh Riau tu ? Tapi nan
basunguah-sungguh.
Oh iyo pak
Kalaupun tajadi parubahan / panyasuaian tantang harato pusako manuruik ABS
SBK.
.. rumah pusako bialah untuak padusi yo pak. Bia ado tampek kami
pulang..., kalau indak ado dunsanak padusi li, barulah bapak pikiakan, rumah
untuak sia ?
Salamo gon itu nan jadi kabanggaan kami jadi induak-induak minang,
dibandiangkan jo induak-induak non minang. Kami pulang karumah ibu kami, dan
kami maraso mamiliki. Ado parasaan talinduangi di siko. ( di sinetron acok di
caliak, tausia dari rumah laki, eh dirumah ortu indak pulo ditarimo, kasihan)
Jawab : Ambo satuju bana kalau rumah pusako atau rumah gadang diagiahkan ka
padusi sabagai milik basamo dan lambang Minangkabau, paliang indak tampek
bakumpuanyo saluruh anak katurunan, tapi jan dibeda-bedakan satu jo lainnyo.
Beko malanggar HAM !
Untuak 'korps' apak-apak jo laki-laki, ambo anjurkan bueklah rumah untuak
kaluarga surang-surang, paliang indak cari kredit BTN dan ansua sacaro taratik,
jan bacarabuik pulo jo induak-induak. Malu awak.
2. Dalam soal Keluarga.
b. Tantang namo urang Minang, tautamo nan laki-laki, manuruik pandapek
ambo tadiri dari ampek unsur, yaitu 1) namo ketek; 2) namo ayah manurut ajaran
Islam; 3) namo suku dari fihak ibu; dan 4) gala sasudah kawin. Sabagai contoh,
namo ambo dapek di'ABS SBK'kan manjadi Saafroedin (namo ketek) Bahar (namo
Ayah ambo) Tanjung (namo suku) Soetan Madjolelo (gala dari mamak). Kan langkok.
Kalau nan padusi kan indak bagala doh.
Kalau ibu bukan urang minang nan indak punyo suku baa pak?
Jawab : Kalai ibu bukan urang Mianng, rasonyo ado duo kamungkinan: 1) pakai
sajo namo nan lazim di kalangan ibu nan urang Minang tu untuak manunjuakkan
panghormatan kito ka ibu. , atau 2) ibu nan bukan urang Minang tu diagiah suku
malalui limbago 'malakok' ka suku Minang nan ado. Kan itu nan dkarajokan dek
dunsanak kito urang Batak, bilo nan laki-laki kawin indak jo urang Batak.
Ado juo daerah tertentu di Minang, laki-laki nan alah kawin indak pakai gala,
baa pulo du pak?
Jawab: Indak baa bana doh, Ananda, walau sarancaknyo tantu iyo pakai gala.
Memang ado saatnyo agak 'rikuh' juo awak mamakai gala, misalnyo kalau awak jadi
pegawai dan tingga di Rantau, apolagi kalau gala itu indak masuak pulo ka
ijazah dan KTP..
Gala ambo 'Soetan Madjolelo' sarik juo ambo pakai. Rasonyo labiah babobot --
dan pakai honor nan agak badagok-- kalau ambo 'maota' urang banyak jo gala
ambo nan lain 'Dr' daripado 'Soetan Madjolelo' he he :-)) Baa juo kan nan
penting kan indak gala tu doh, tatapi pribadi, bobot, dan kalakuan urang nan
manyandang gala tu. Kan baitu Ananda ?
Iko sen dulu dari hanifah, talabiah takurang mohon maaf
Wass
Hanifah Damanhuri
Ass Wr Wb bapak Saafroedin Bahar yth
Tarimo kasih ateh dukuangan Ananda taradok gagasan manaruko baru iko Sudah
barang tantu rencana tu bisa sakali dilaksanakani. Caronyo adalah malalui
program transmigrasi lokal nan kini alah manjadi program Pamarentah kito, d.h.i
dari Departemen Transmigrasi. Jadi tingga manunggu parmintaan jo prakarsa para
Dunsanak di Ranah sajo lai. Tantu paralu diinventarisasi bara tanah negara nan
tasadio lai di Suametara Barat, nan bisa dipakai untuak itu, dan bara pulo
banyak dunsanak kito nan mamaralukan tanah tu.
Alhamdulillah lai ado paratian pamarentah kirono, hanifah kiro paratian
mereka cuma untuak rang jawa sen. Walaupun rasono alah talambek, tapi bia
juolah dari indak samo sakali.
Anu pak, kan rang awak labiah suko badagang, kiro-kiro namuah ndak rang awak
ikuik manaruko sawah baru du ?
Kalau banyak dunsanak nan mamaralukan tanah nan bapak tanyo, kok takajuk pulo
bapak jo kanyataanno beko. Raso kasadono rang kampuang tarutamo nan tingga
dibanuhampu akan mangaku mamaralukan tanah dan rumah du. Rumah nan ditunggui
kalau indak punyo basamo mungkin punyo urang nan marantau, sagetek nan tingga
di rumah surang noh. (Mudah-mudahan ditampek lain indak mantun.)
Jawab: Rasonyo program transmigrasi lokal untuak urang awak ko alun paranah
dicubo lai, atau kalau alah paranah, ambo nan alun tahu. Bagi nan sabana-bana
mamaralukan, paralu direncanakan dan diatur nan sungguah-sungguah jo Departemen
Transmigrasi. Memang manarik untuak diparatikan 1) apo ado sumangaik urang awak
untuak marantau manaruko tanah partanian atau paternakan nan baru, 2) apo ado
limbago urang awak di Ranah nan baiyo bana amuah mangorganisasikan program iko.
Sabagai 'try-out', baa kok Ananda cubo 'manjajagi.' untuak para Dunsanak kito
di Banuhampu tu, dalam ukuran ketek dulu, untuak tahun anggaran 2007 atau 2008
nan akan datang?
Jan lupo, urang batambah banyak sadangkan laweh tanah indak batambah lai doh.
Itu sabanyo manga dunsanak kito urang Batak, dima nyo datang, nan dicarinyo
dulu adolah tanah, untuak mambuek apo nan disabuiknyo 'sahala harajoan'
[=karajaan den surang].
Oh pantaslah. Rang batak nan di Bengkulu iyo mantun memang. Bakaja mereka
mambali kabun sawit dan kabun karet atau mambali tanah untuak kabun karet dan
sawit. Bialah panampilan sederhana bagai, asal punyo kabun.
Jawab. Dek karano iko adalah 'adat' mareka, mako indak di Bengkulu sajo doh
hal itu kajadian, tapi dima-dima Ananda. Di babarapo provinsi sabana banyak
dunsanak kito urang Batak itu, saparati di Sumatera Timur; di Riau alah
baratuih ribu hektar hutan nan dibuka mereka walau tanpa izin pemilik tanah
ulayat; di Papua banyak sakali pejabat pemerintah, baik sipil maupun militer,
nan dunsanak kito urang Batak. Kalau ambo indak salah, di Jakarta perantau
Batak jauah labiah banyak -- dan labiah dinamis -- dari perantau Minang.. Hanyo
haruih kito haragoi, bahaso 'semangat juang' para dunsanak kito tu jauh labiah
tinggi dari 'semangat juang' urang awak. Baa mangko baitu ? Paralu diteliti hal
ko acaro mandalam apo sababnyo. Sacaro pribadi ambo bapandapek bahaso nan
manjadi faktor panyabab baitu dinamisnyo mareka adolah norma budaya jo sistem
sosialnyo nan memang dirancang untuak manyatukan potensi sagalo nan batali
darah jo batali parkawinan ka dalam satu sistem nan
tarintegrasi, nan tadiri dari tigo marga, disabuik 'dalihan nan tolu'.
Baa adat Minangkabau ? Jiko dibandiangkan, indak ado norma dan tatanan sarupo
tu doh. Tatanan sosial kito mambedakan antaro 'in group' barupo buah paruik,
kaum, suku, jo 'out group' barupo anak pisang dan urang sumando. Dalam
parkawinan, suami isteri tatap juo dalam suku surang-surang, antaro bapak jo
anak indak sasuku, dan indak ado hubungan struktural antaro suku nan satu jo
suku nan lain.
Baa mako baitu ? Manuruik panglihatan ambo, supayo harato pusako jan jatuah
ka 'urang lain'. Jadi konsep dasarnyo sangaik konservatif, dan indak dinamis
samo sakali. Ringkasnyo, norna budaya dan sistem sosial urang Minangkabau
sajak jolong memang indak dirancang untuak bersatu dan indak dirancang untuak
bakarajo samo, baiak di Ranah maupun di Rantau. Mungkin itu sababnyo manga
urang awak tapaso 'bertempur' surang-surang, indak bisa saliang mambantu.
Ciek lai: jadi sia nan haruih mamikia ulang masalah ko ? Tantu para
fungsionaris adat di Ranah. Apo alah ado garak ka arah itu ? Sadiahnyo, alun.
Jadi baa lai? Kini tingga mamiliah: 1) pura-pura indak tahu bahaso urang awak
sacaro manyaluruah alah 'maluncua' mundur taruih manaruih; atau 2) maambiak
prakarsa maadokan kaji ulang dan mangambangkan norma budaya dan tataan sosial
baru, nan di satu pihak mamaliharo nan baiak dari lamo dan di pihak lain
mambangun tatanan baru nan labiah dinamis dan labiah basatu.
Apo alah ado gagasan ka arah itu? Calak-calak ganti asah, mananti tukang
tibo, basamo jo Dunsanak Ir Mohammad Zulfan Tadjoeddin,MA, duo tahun nan lalu,
bulan Oktober 2004, ambo alah manabikkan dan maluncuakan buku "Masih Ada
Harapan', duo kali bulan Oktober 2004 di Padang, baiak dalam jumpa pers maupun
tampil di TVRI Padang. Baa reaksi masyarakat awak ? Tantu ado nan mandukuang
dan ado nan bangih. Sasudah tu? Yo, lalok baliak, indak ado apo-apo, karano
masyarakat kito di Ranah memang indak dirancang untuak basatu atau untuak
bakarajo samo. Jadi baa lai? Rasonyo iyo paralu 'reformasi sosial' sacaro
tarancana. Lalu apo masalahnyo ? Manunggu tampilnyo tokoh reformasi di Ranah,
antah bilo.
Rasonyo labiah babobot -- dan pakai honor nan agak badagok-- kalau ambo
'maota' urang banyak jo gala ambo nan lain 'Dr' daripado 'Soetan Madjolelo'
he he :
Untuang kami di milis indak manyapo bapak jo sabutan pak doctor jadi gratis
mambaco nasehat / tulisan bapak. he he he.. (niaikkan jadi ibdah pak, bia Allah
nan mambaiano nanti)
Jawab: batua Ananda. Milis urang awak di Rantau kan sarana nan effektif bana
untuk kito baiyo batido. Sayangnyo, saketek bana dunsanak kito di Ranah nan
sato jo wacana ko, mungkin karano faktor ekonomi. Syukurnyo di Ranah ado milis
nan bajalan rancak, saparati pakguruonline..
-)) Baa juo kan nan penting kan indak gala tu doh, tatapi pribadi, bobot,
dan kalakuan urang nan manyandang gala tu. Kan baitu Ananda ?
Hmmm tagantuang jo sia bapak maota. Kato bos kami dulu Jangan lihat apa yang
dikatakan, tapi lihat siapa yang mengatakan . Antahlah apo kasuk bos kami du
Jawab: batua, Ananda.
Iko sen dulu dari hanifah, talabiah takurang mohon maaf.
Wass
Hanifah Damanhuri
NB. Baa kok bapak jawek di Japri?, Hanifah balas Japri juo
Jawab: Rancak juo Ananda, Walau baitu, tantang masalah nan basifat umum
Minangkabau, saparati masalah ABS SBK atau masalah sosial budaya, banyak
manfaatnyo kalau kito usuang juo ka palanta, ma tahu bisa manggugah pamikiran
dan langkah labiah lanjuik dari dunsanak nan lain.
---------------------------------
Do you Yahoo!?
Get on board. You're invited to try the new Yahoo! Mail.
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================
