Assalaamu'alaikum wa rahmatullaahi wa barakaatuhu Manolah mamak Saaf sarato dunsanak nan adang adok,
Panjawab tanyo mamak tantang tanah ulayat sabanano bisa panjang jawab ambo. Tapi ambo cubo mangumpo singkek sajo. Kapanjawab tanyo mamak nan partamu tantangan sawah pusako. Umumno sawahko 'dibuek' urang dan awak hanyo manarimo sapaduo, dek dipasaduo-an tu. Dek karajo tu alah turun tamurun, jo prasangka elok sajo, awak nan di rantau manarimo sajo barapun hasia padi nan diantaan dek urang nan mambuek sawah dan di tarimo dek dunsanak nan masih tingga di kampuang. Di kampuang kami tadiri dari limo rumah tuo. Tigo buah rumah tipak di urang gaek ambo, buliah dikecek-an dari ciek nenek, nan hasia sawahno masiah ado nan basarikat. Sampai katiko ibu ambo masih ado, baliau tingga di kampuang sampai anam bulan sabalun baliau mandaulu (baliau bapulang akhir taun 2002), ibu ambokolah nan mancataik hasia-hasia sawah nan pulang, sudah itu baliau bagi-bagikan ka 'nenek-nenek' nan punyo di rantau. Baliau ko punyo 'sekretaris' urang nan punyo masin tumbuak/heler, dan biasono hasia sawah alah langsuang sajo di bao ka masin. Kini dek ibu ambo alah indak ado, hasia sawah tu umumno bapicayoan sajo diantaan urang ka masin, di atur dek urang masin. Adiak ambo nan tingga di Pakan Baru pulang sakali-sakali untuak mamareso, sudah itu mambagi-bagian asia sawah ka nan 'berhak'. Aturan nan sangaik lamah sabanano, tapi kami pabiaan sajo sarupo itu. Jo caro sarupo ikolah nampak-nampakno arato tuo akan samakin hilang ma'nano bagi anak kamanakan. Hasia sawah tu bana hampia indak ado aratino lai. Surang nenek nan tingga di Jakarta, katiko ibu ambo masih hiduik manarimo hasia panjualan padi 200,000 rupiah, sakali panen. Kini nenek tu alah indak ado pulo. Anak-anakno ado pulo batigo. Pitih 200,000 ko kini musti mareka bagi batigo, jadi indak ado amek aratino lai doh dan indak pulo diarok-anno amek. Baa biko kasudahanno pambagian / kapamilikan arato tuo tu isuak? Wallahu a'lam. Namun, katiko rumah urang gaek ambo tabaka tahun 1995, dan baliau basikukuah ingin tatap tingga di kampuang, ambo mampalopori/maajak adiak-adiak nan mampu untuak baiyua mambangun rumah untuak ibu ambotu. Baliau bakandak supayo rumah tu gadang andakno, 'kapanjamu anak cucu katikono pulang', baitu jano baliau. Kami paturuikan pulo. Ambo sampai-an ka adiak-adiak ambo, nan bahaso rumahko awak hadiahkan sajo kapado ibu awak, nan kajadi 'sabagai' arato tuo sajo nanti kalau baliau alah indak ado. Jadi awak indak kamawarihi untuak dibagi-bagi do. Dan itu pulolah kini nan kami lakukan. Sia-sia nan pulang, maraso pulang ka rumah ibu sajo. Rumah tu bia sinlah tagak disinan sampai salamo-lamono kajadi saksi bahaso kami badunsanak. Ado timbua tanyo, baa mangko indak dibagi manuruik syarak, nan rumahno itu sajo? Kan rumahtu bukan tamasuak arato tuo? Batua, tapi kan kami tagak-an di tanah ulayat. Kalaulah rumah sajo musti ditanggai untuak dibagi tantu mubasia pulo jadino. Dek kami banyak dalam kaum, ado juo diantaro kami nan laki-laki nan agak cadiak, rajin no pai mangamehi hasia padi ko pulang dan indak untuak disampai-anno ka dunsanak padusi. Timbua komplain dari nenek padusi, ano basipakak sajo. Tapi di anak-anak nenekko, indaklah talampau paduli bana. Biaan sinlah jano. Iko mungkin marupoan suatu anomali, tapi kami pabiyaan sajo samantaroko sarupo itu. Tanyo mamak nan kaduo baa caro ambo 'baurusan' jo anggota kaum? Jo caro nan wajar-wajar sajo. Katiko ado nan datang mintak pandapek jo nasihaik, ambo agiah nan dimintakno tu sasanggup ambo. Katiko ado nan paralu dicaliak dek sakik atau dek ado masalah, ambo datangi pulo. Kok ado anggota kaum maupun urang sumando nan mandaulu, ambo musti capek tibo. Kalau ado nan maimbau dek kabaminantu ambo datangi capek. Aratino bana tapasolah awak jadi capek kaki ringan tangan, dan itu ambo jalani sasanggup ambo pulo. Masalah? Pasti salalu ado, dan indak kasadoan masalah dapek awak manangani, tapi paliang indak sato ambo mamikia-an alah manyanangan bagi anggota kaum. Dimano-mano ado kasampatan ambo cubo manyampaian ma'na arato tuo sarato pabedaanno jo arato sacaro syara'. Dan nampak di ambo dari kabanyak-an anggota kaum ko indaklah talampau paduli bana lai jo arato tuo tu walaupun tatap manyadari bahaso arato tu masih ado disinan. Wassalamu'alaikum, Lembang Alam --- Saafroedin BAHAR <[EMAIL PROTECTED]> wrote: > Waalaikumsalam w.w. Dunsanak Lembang Alam, > > Ado duo hal nan manarik paratian ambo. > > 1. Sabagian gadang, 75%, kaum Dunsanak alah di > Jabotabek. Tadi pagi, tanggal 27 Agustus jam 10:00 - > 11.45 ambo hadir dalam rapek para dunsanak dari Koto > Gadang, tanyato nan tingga di kampuang hanyo 17% > sajo > lai. Apo akibaiknyo ka sawah ladang jo tanah ulayat > kaum ? Sia nan mangarajokan ? > > 2. Dunsanak Lembang Alam alah malaksanakan fungsi > panghulu tanpa jadi panghulu sacaro formal, jadi ado > Panghulu 'de iure' dan ado pulo Penghulu 'de facto'. > Baa caro Dunsanak ma-'manage' anak kamanakan na > sabanyak tu? Apo ado samacam 'Buku Gadang' dan > dirintis dek Dunsanak Firdaus Oemar Dt Maradjo ? > > Wassalam, > Saafroedin Bahar St. Lembang Alam __________________________________________________ Do You Yahoo!? Tired of spam? Yahoo! Mail has the best spam protection around http://mail.yahoo.com -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
