Waalaikumsalam w.w. Ananda Rahim,
Alhamdulillah, berkat doa Ananda jo kawan-kawan, ambo sakaluarga lai
sehat-sehat sajo. Ambo faham baa mako Ananda batanyo sarupo itu. Saparati nan
ambo sampaikan dalam rangkaian posting sabalunnyo, nampaknyo urang awak
Minangkabau -- baiak di Ranah maupun di Rantau -- indak punyo program
sistematis untuak mandidik nan mudo-mudo untuak siap tajun ka masyarakat
sabagai warganegara Indonesia nan bakaturunan Minang. Dalam wacana nan
bakambang dalam RantauNet ko malah awak kini tahu bahaso untuak kaum
masiang-masiang sajo tugas tu nampaknyo indak dilakukan. Hampia sagalo
pandidikan disarahkan sajo ka sikola atau ka masyarakat, sahinggo kito tumbuah
surang-surang sajo. Dalam iduik babangso jo banagara kini, taraso bana bahaso
caro nafsi-nafsi tu indak cukuik. Alah bara kali dalam milis ko dibahas, bahaso
-- misalnyo -- kito alah katinggalan bana dibandiang jo dunsanak kito dari
Batak, nan parsatuannyo ka dalam sarato pambinaan wataknyo malalui 'dalihan na
tolu' sabana taratur
dan kuaik.
Kini babaliak kito ka partanyaan Ananda. Jawaban ambo sacaro manyaluruah untuak
generasi mudo Minang nan jadi mahasiswa -- apopun ilimu nan sadang dituntuik
kini -- antaro lain adolah saroman nan di bawah ko.
1. Paratamo, tuntuiklah ilimu sadalam-dalamnyo jo satinggi-satingginyo,
luluihlah sacapek-capeknyo, jo IPK satinggi-tingginyo, dan jan ado masalah
salamo studi. Iko nasihaik nan ambo agiahkan ka saluruah anak-anak ambo, supayo
inyo bisa jadi 'urang' jo kakuatannyo sandiri. Sasudah tamaik, jan baranti
baraja, karano ilimu jo masalah nan paralu dipalajari jo ilimu tu indak
abih-abihnyo, baiak malalui sikola maupun malalui 'universitas kahidupan', nan
bisa kito palajari malalui media massa, tamasuak malalui internet. Hanyo jo
caro itu kito bisa basaiangan dalam iduik ko.
2. Kaduo, piliahlah satu atau duo bidang spesialisasi nan bukan sajo
bamanfaat untuak diri dan kaluargo kito, tapi juo bamanfaat untuak masyarakat
dan bangso kito, dan masuaklah ka dalam organisasi profesi nan bisa
mangambangkannyo sacaro taruih manaruih. Karano ilmu tu basifat universal,
supayo kito jan jadi 'katak di bawah tampuruang', kuasoilah ciek atau duo
bahaso asiang, tautamo bahaso Inggirih, baik pasif maupun aktif.
3. Palajarilah pokok-pokok latar belakang sejarah dan kebudayaan Minangkabau
tu, sajak zaman prasejarah katiko alun ado tulisan; taruih ka zaman sejarah
kuno sasudah ado tulisan -- mulonyo dalam babagai prasasasti batu nan tadapek
di sekitar Batu Sangka sajak abad ka 14, taruih ka tambo sasudah Islam masuak
sekitar abad ka 16; lanjuik ka sejarah modern jo sagalo gajolak-gajolaknyo,
tautamo sajak Parang Paderi 1803-1837 sampai kini.
4. Kaampek, paralu Ananda sadari bahaso ajaran adat, sarato sistem nilai dan
struktur sosial Minangkabau nan kito kenal salamo ko hanyo tabateh pado tingkek
kaum, suku, jo nagari sajo, dan indak atau alun ado patunjuak jo panjalasannyo
sacaro sistematis untuak tingkek di ateh nagari, sahinggo sabana indak cukuik
mambakali kito untuak tajun ka dunia laweh ko. Tambahan lagi, sifat ajaran
adaik kito sabalum masuaknyo Islam adolah pragmatis sajo, sahinggo agak sekuler
kecek urang kini. Memang paranah ado ugamo Ciwa-Budha di Minangkabau, saparati
nan nampak dari tulisan-tulisan di bawah patuang Adityawarman, tapi nampaknyo
hanyo di kalangan rajo-rajo [Pagaruyuang?] sajo, indak sampai ka rakyat badarai
doh. Kalau kito ingin malawehkan pandangan, kito musti kalua dari 'tampuruang'
nan manyungkuik kapalo kito tu, baraja kito dari ajaran nan labiah laweh, yaitu
Islam untuak ugamo dan ilmu pangatahuan lain untuk hal-hal nan basifat duniawi.
Tantangan sejarah dan kebudayaan nan alun saluruahnyo dapek kito salasaikan
sampai kini adolah baa caro mangintegrasikan tigo sumber sistem nilai sosial
budaya Minangkabau nan kito warisi ko, yaitu: adat Minangkabau nan basifat
parokial dan matrilineal, ugamo Islam nan universal dan patrilineal, jo budaya
maso kini nan umumnyo kito timbo dari Barat dan dari dunia lainnyo, nan dalam
kakaluargaan basifat parental. Ikolah nan antaro lain ambo cubo mandorong
malalui milis ko, yaitu untuak manyalasaikan Kompilasi Hukum ABS SBK. nan
syukurnyo alah mulai bajawab jo prakarsa Dunsanak Drs Sayuti M Pd Dt Radjo
Panghulu, Sekretaris Umum LKAAM Sumbar marangkap Katua Komisi A DPRD Propinsi
Sumbar., nan sadang manangani Peratruran Daerah ABS SBK, nan mudah-mudahan bisa
salasai dalam wakatu nan indak talalu lamo.
Baa konkritnyo untuak KMM Jaya ?
1. Bueklah atau aktifkanlah Bagian Pendidikan Sejarah dan Kebudayaan
Minangkabau, nan marancang kurikulum, mancari pancaramah, sarato
manyalanggarakan pandidikan kepribadian Minangkabau untuak warga KMM Jaya,
baiak sacaro tatap muko, maupun malalui model 'uiversitas tabuka' malalui
fasilitas internet ko.
2. Bantuaklah kalompok kader kapamimpinan Minangkabau maso datang, malalui
program ToT (Training for Trainers) nan bukan sajo mangarati apo tantangan nan
dihadapi masyarakat Minangkabau, di Ranah dan di Rantau., tapi juo mampu
manganalisa dan mangambangkan gagasan-gagasan konseptual dan kabijakan
strategis dalam bdang pangabdian dan karir nan dipiliahnyo.
3. Bueklah jejaring ('network') jo organisasi kaum mudo lainnyo, baiak
sasamo kaum mudo Minangkabau maupun jo kaum mudo Indonesia lainnyo, sahinggo
bisa dibangun 'efek sinergi' nan paralu untuak mangarajokan karajo-karajo
gadang. Bangso dan nagara kito Republik Indonesia kini ko sabana bapetai-petai,
tautamo dek panyalah gunoaan kakuasaan dan dek korupsi. Jan ado surang pun dari
kalian nan baniaik apolagi nan malakukan korupsi, baiak korupsi ketek apolagi
korupsi gadang.
Sabagai urang tuo, pintu ambo tabukak tiok wakatu untuak mambantu Ananda jo
kawan-kawan. Ambo yakin banyak dunsanak nan sa generasi jo ambo juo siap
mambantu generasi Ananda. Sabalun ko kan ambo alah manulih bahaso : " Di antaro
tokoh-tokoh ko-- nan tingga di Jakarta -- nan takana dek ambo adolah Prof Dr
Taufik Abdullah, Dr (h.c.) Taufiq Ismail, Prof Dr Hasjim Djalal, Dr Boer Mauna,
Prof Dr Amri Marzali, Prof Dr Farid Anfafa Moeloek, Dr Fasli Djalal.. Pak
Chaidir Nien Latief bisa manambahkan namo tokoh-tokoh senior kito nan ado di
Banduang." [liek e-mail ambo tanggal 14 Agustus 2006].
Kini, barundianglah sasamo panguruih KMM Jaya, ambiaklah prakarsa, susunlah
program, aturlah langkah paratamo ka arah pandidikan kapribadian Minangkabau
nan bawawasan luas dan siap tajun ka maso datang.
Untuak samantaro sampai di siko daulu Ananda Rahim.
Wassalam,
Saafroedin Bahar.
----- Original Message ----
From: daim rahim <[EMAIL PROTECTED]>
To: Saafroedin BAHAR <[EMAIL PROTECTED]>; [email protected]
Cc: [email protected]
Sent: Tuesday, August 29, 2006 12:00:19 AM
Subject: Re: [EMAIL PROTECTED] Pembekalan untuak generasi mudo Minang.(untuak
pak saf)
Assalamualaikum Pak saf..semoga sehat.
pak ibaraiak anak jolong lahia, anggap sajo baitu dulu, kami agak binguang
saketek ko pak... kami anak mudo di jakarta (KMM-JAYA) lai banyak namonyo namun
latar belakang kami balain-lain ado nan kedokteran, hukumnyo, ekonominyo,
keagamoannyo dan itu dari 20-an kampus dijakarta.
ado keinginan gadang di kami untuak memperisiapkan bekal nan apak
mukasuikkan demi kemajuan kami di maso depan...
itu pulo lah salah kami mungkin pak, kami kurang batnayo ka nan tuo "mungkin",
disampiang latar belakang kami tadi nan majemuk juo adao nan gadang di rantau
juo ado nan gadang di ranah sendiri..
dek karano itu lah pak..kiro2 persiapan apao nan nyato nan apak mukasuikkan
tu, tolong bana di bimbiang kami pak, diskusi adat kah? atau apo?
tapi pak nan palianmg terpenting kalau lai setuju apak jo kami, kami ingin
memberikan kontribusi ril ka SUMBAr walau ketek namonyo, tapi apo kiro2 kini tu
pak...
kalau kontribusi untuak anak mudo di jakarta mungkin nan ketek lah kami
lakukan di TMII jo apak patang ko...
mohon pak diagiah gambaran kami pak persiapan nan apak mukasuikkan bia ndak
bagerak capek pulo kami.
terimo kasih pak.
Abdurrahman Rahim 08159551814
Sekjen KMM-JAYA
Saafroedin BAHAR <[EMAIL PROTECTED]> wrote:
Waalaikumsalam w.w. Ananda Rahim,
Kalau Ananda satuju, ambiaklah langkah parsiapan nan paralu, sahinggo niaik
baiak ko bisa kito laksanakan dalam wakatu nan indak talalu lamo.
Wassalam,
Saafroedin Bahar
----- Original Message ----
From: daim rahim <[EMAIL PROTECTED]>
To: Saafroedin BAHAR <[EMAIL PROTECTED]>; [email protected]
Sent: Saturday, August 19, 2006 11:22:56 AM
Subject: Re: [EMAIL PROTECTED] Pembekalan untuak generasi mudo Minang.
assalamualaikum warahmatullahiwabarakatuh.
tarimo kasih atas masukan dan saran apak ka kami.
Saafroedin BAHAR <[EMAIL PROTECTED]> wrote:
Assalamualaikum w.w.
Para dunsanak sapalanta,
Ado nan takana dek ambo dari partanyaan Ananda Daim Rahim dari KMM Jaya di
bawah ko, yaitu baa caronyo bukan sajo manjawab partanyaan sacaro insidental,
tapi juo baa mambakali anak mudo kito sacaro komprehensif dan tarencana tantang
sijarah dan kebudayaan Minangkabau [adaik Minangkabau adolah bagian dari
kebudayaan Minangkabau sacaro manyaluruah] dan posisinyo sacaro nasional. Dalam
bidang nan ambo tangani kini, yaitu masyarakat hukum adat, misalnyo alah ambo
cubo marintisnyo malalui tugeh ambo kini di Komnas HAM.
Capek atau lambek nampak samakin lamo samakin jaleh bahaso sabananyo dari aspek
sosial budaya masyarakat Minangkabau indak mampasiapkan generasi mudonyo sacaro
baiak dalam manghadapi maso datangnyo. Saisuak, sajak ketek anak laki-laki
alah disuruah lalok di surau, antah sia nan maaja dan antah apo pulo nan diaja
di sinan. Sasudah tu, anak dilapehkan sajo ka sikola, nan mamusekkan paratian
ka palajaran-palajaran formal nan bak kecek urang kini basifat 'kognitif' sajo.
Palajaran adaik Minangkabau praktis indak ado, salain dari buku-buku nan
manjalehkan tambo zaman saisuak, dan indak banyak manjawab tantangan maso kini.
Palajaran ugamo nan didanga dari khutbah di musajik indak disampaikan sacaro
tarancana dan bakalanjutan, kadang-kadang indak konsisten dan indak koheren
pulo. Simpang siua. Kok ambo bana jadi anak mudo Minang maso kini ambo juo
pasti akan binguang jo kaadaan masyarakaik Minangkabau ko.
Jadi baa handaknyo ?
Apo indak mungkin para dunsanak nan bagarak dalam bidang pandidikan mambuek
modul-modul pandidikan watak anak mudo Minang, untuak kudian disebarkan sacaro
taratur malalui milis-milis Minang nan alah ado manuruik model Universitas
Terbuka?.Atau dibuek bana milis khusus yahoogroups nan perai tu. Jiko paralu
ditunjuak instruktur-instruktur nan manguasoi tiok-tiok modul itu. Salah satu
masalah nan paralu disampaikan -- dan kini sadang kito garap basamo -- adolah
sistem nilai ABS SBK nan alah kito sapakati marupokan jati diri Minangkabau.
Sistem Universitas Tarbuka ambo kiro bisa mamanuhi kabutuhan, karano indak
mudah bukan sajo untuk mangumpuakan anak-anak mudo kito nan taseba dima-dima.,
tapi juo indak mudah untuak mangumpuakan para tokoh senior kito nan manguasoi
materi pandidikan tasabuik.
Bahan-bahan manganai sijarah dan kabudayaan Minangkabau ko alah mulai banyak,
dibandangkan jo tahun 1970, sawakatu Drs MD Mansur dkk mulai manabikkan buku
'Sejarah Minangkabau' paratamo, untuak manjawab buku 'Tuanku Rao' dari Ir
Mangaradja Onggang Parlindungan. Kini alah ado Dr Mestika Zed dkk di Padang nan
alah banyak pulo mangarang buku. Tantang kabudayaan [tamasuak masalah ABS SBK]
alah rami kito pabincangkan, dan sacaro palahan-lahan alah dapek kasapakatan,
nan bisa dan paralu dikonsolidasikan supayo indak masuak angin pulo.
Baa malaksanakan idee ko ?
Ambo raso, langkah paratamo adolah manghubungi tokoh-tokoh senior Minang , nan
bapaduli taradok maso datang anakmmudo Minang, dimano pun baliau tingga, nan
bana-bana bapaduli taradok maso datang Minangkabau, dan basadio untuak
'dijapuik tabao, ditanyo manjawab, diimbau manyahuik'. Indak usah banyak,
sakitar sapuluah atau duo puluah tokoh saroman tu sajo alah labiah dari cukuik.
Sasudah gagasan ko disatujui, dibantuak bana samacam 'dewan pendidikan sejarah
dan kebudayaan Minangkabau' Di antaro tokoh-tokoh ko-- nan tingga di Jakarta --
nan takana dek ambo adolah Prof Dr Taufik Abdullah, Dr (h.c.) Taufiq Ismail,
Prof Dr Hasjim Djalal, Dr Boer Mauna, Prof Dr Amri Marzali, Prof Dr Farid
Anfafa Moeloek, Dr Fasli Djalal.. Pak Chaidir Nien Latief bisa manambahkan namo
tokoh-tokoh senior kito nan ado di Banduang.
Sacaro kalimbagoan, mungkin bidang iko bisa digarap dek Gebu Minbang, jo
mangaktifkan pangampu nan baminaik ka bidang pandidikan iko.
Baa pandapek dunsanak sa palanta?
Wassalam,
Saafroedin Bahar (70th kurang)
----- Original Message ----
From: daim rahim <[EMAIL PROTECTED]>
To: Saafroedin BAHAR <[EMAIL PROTECTED]>; [email protected]
Sent: Monday, August 14, 2006 12:44:59 PM
Subject: Re: [EMAIL PROTECTED] JAYA batanyo pak??
assalamualaikum warahmatullah wabarakatuh
pak...pasca peringatan hari internasional masyarakat hukum adat
internasional di TMII, kami basamo-samo tapikia dan cubo-cubo manganalisa hasil
dari perjuangan apak sebagai komisioner perlindungan masyarakat Hkum adat
"koreksi kalau salah" .
pertamo..syukurlah alhamdulillah kalo Masyarakat hukum adat (MHA) alah
dilindungi oleh undang undang dan mandapek pijakan konstitusi sebagai payung
hukumnyo jikok nantinyo bermasalah dikemudian hari..dan kito tunggu
Undang-undanngyo.
kaduo..dampak dari pengakomodiran MHA dengan undang-undang nantinyo tantu
akan memberikan keleluasaan kapado MHA yang ado diindonesia untk membela diri
apabilo hak-hak mereka dirampas, namun pak..iko baranjak dari kaindaktahuan
kami..Ado seketek ketakutan kami pak, bahwa apabilo undang-undang MHA atau UU
perlindungan MHA disahkan nantinyo sesuai permintaan Presiden "agar
secepatnya", akan memberrikan peluang atas penyalahgunaan konstitusi/UU
tersebut sebagai landasan perpecahan atau reintegrasi bangsa ini, seperti
keinginan papua lepas dari indonesia contonyo.
nah nantinyia mereka akan menjadikan alasan perpecahan, pemisahan diri dai
NKRI gara hak-hak meraka merasa yang diakui UU tetap saja dlanggar
juga...pendek kato MHA maraso gadang kapalo jadinyo.
ba kiro-kiro tu pak..lai kiro mandasar pertanyaan kami tu pak?? sebab
nantinyo setelah ado UU MHA, saketek-saketek ado konflik dan sebagainyo, karano
mereka merasa terlindungi, padahal kini alah terlindungi namun implementasinyo
nan alun lai,,
ko iyo indak apo kiro2 caro pemerintah untuak melakukan langkah defensif
atau antisipasi dari ketakutan diateh pak...
terimo kasih pak..iko hanyo letupan dari kawan-kawan KMM nan cubo ananda
sampaikan psan mereka-mereka agar ditanyoan ka apak..
wassalamualaikum warahmatullah wabarakatuh
Abdurrahman Rahim
Sekjen KMM-JAYA
Want to be your own boss? Learn how on Yahoo! Small Business.
Want to be your own boss? Learn how on Yahoo! Small Business.
Want to be your own boss? Learn how on Yahoo! Small Business.
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================
