----- Original Message ----
From: hanifah daman <[EMAIL PROTECTED]>
To: Saafroedin BAHAR <[EMAIL PROTECTED]>; [email protected]
Sent: Tuesday, August 29, 2006 9:08:33 PM
Subject: Re: [EMAIL PROTECTED] Caro jawa mamaliharo Jejaring???
Ass Wr Wb bapak Saafroedin Bahar yth
Waalaikumslam w.w, Ananda Hanifah,
Ambo jawab juo sacaro langsuang di bawah partanyoan Ananda.
Jawekno basalekkan ( bia indak baikua )
Baliak juo kito ka contoh dunsanak kito urang Batak. Hampia di sagalo bidang
mereka tampil sampai ka puncak, dan makin lamo makin banyak. A sababnyo ?
Mereka bana-bana manjago kualitas dan bagak basaiang, baik surang-surang maupun
sabagai suku bangso.
Pak Saaf, hanifah punya kawan batak (cowok), doctor dibidang matematika diskrit
kaluaran Australia . Salamo iko kami bausaho mahambekno (indak mamiliahno kalau
ado pamilihan) dengan alasan, baliau Kristen. Tapi baliau ahli strategi,
dipadiakanno kawan jawa bajalan dijalan nan indak luruih, dibantuno kawan2
lain nan lamah atau nan sampik diwakatu sahinggo kawan gon maraso tatolong dek
si batak. Kato si batak dun Sebaiknya kita saling bekerjasama atau saling
membantu, jangan pintar sendiri, bersama kita bisa .
Kalau bakumpua kami induak-induak lalu maota jo si batak, baliau pandai pulo
bacarito tantang anak-anak atau apolah nan biaso dibahas induak-induak kalau
bakumpua. Pandai pulo baliau bacarito tantang pangajian AA GYM, tapi di bulan
puaso santai sen baliau mambuek kopi panas dakek kami nan islam. (di tampek
kami, nio teh atau kopi atau aia putiah silahkan ambiak surang). Kalau kami
babuko basamo, sato pulo no dll.
Lalu di pamiliahan barikuikno ndak bisa lai kawan2 ma ilak untuak indak
mamiliah baliau. Oh ya waktu pamiliahan sabalunno, sabalun pamiliahan baliau
malacak dulu kama arah suaro. Lalu diituangno paluangno untuak bisa maju, raso
kakalah tampakno. Lalu di acara pamiliahan, terakhir nan maju tingga baduo,
lalu di buekno aturan kita ndak usah votinglah, aklamasi saja. Kamudian di
piliahno kawan nan paluang manangno cukuik gadang. He he he salamaikno dari
kakalahan. Jadi disampiang santiang rang batak sangaik pandai mambaco paluang.
Suko bakarajo samo dan suko saolah-olah manjadi dewa panyalamaik.
Jawab: Ambo manggarihbawahi apo nan Ananda sampaikan ko. Tanggapan ambo:
ambiaklah tuah dari nan manang, ambiak contoh ka nan sudah. Palajari pulo baa
mako urang awak indak banyak nan bisa sarupo itu.
Baa jo urang awak ? Kan iko bana nan sadang kito kaji kini sacaro mandasar.
Manuruik panglhatan ambo, urang awak ko labiah banyak masalah internalnyo nan
mangakang potensinyo daripado nan mandorong. Kito diaja bapikia dalam ukuran
mikro dan iduik dalam tatanan sosial nan tapacah-pacah. Kito indak diaja basatu
saroman urang Batak. Untuak mamaliharo harato pusako, sadar indak sadar kito
diaja untuak saliang curiga, bahkan dalam urang nan sakaluarga.
Kalau manuruik Hanifah kasalahan urang Minang katiko jadi pamimpin adolah indak
mangayomi atau indak bausaho manyalamaikkan masa depan urang Minang nantino.
Banyak nan sombong kalau sadang naiak daun. Kalau kami rakyaik badarai gon,
pado taibo ati maliek urang sombong kadang labiah sombong pulo kami li. Mangkon
kato kami ha, Kok kayo, kayo senlah surang, kami indak kamamintak. Kok
santiang, santiangsenlah surang, kami indak kabatanyo, dll. Makono indak
tajalin karajo samo kalau level babedo.
Oh ya Pak, bapak alun mambaleh tanyo hanifah tantang Baa caro urang jawa
mamaliharo jejaringno? . Mungkin info iko bisa mambantu rang Minang mambangun
dan mamaliharo jejaring nan bapak anjurkan dun.
Jawab: Nan nampak di ambo, urang Jawa mampunyoi sejarah, filsafat iduik, dan
kabudayaan nan sabana tuo -- sajak abad paratamo Masehi -- dan tatulih dalam
bamacam-macam prasasti dan babad, nan manata masyarakatnyo sabagai satu
kesatuan nan terstruktur baik, baik sacaro lokal pado tiingkek desa sampai ka
tingkek negara, nan wakatu daulu babantuak karajaan. Tiok rajo Jawa mambuek
prasasti, dan indak jarang mamaliharo pangarang-pangarang babad. Ado juo rajo
Jawa nan manulih sandiri kasusastraannyo.Jo kato lain, urang Jawa alah lamo
masuak ka dalam alam sejarah nan manuruik para ahli sejarah bamulo sajak urtang
manggunokan tulisan. Dunsanak kito di Jawa tu mamanfaatkan tulisan Pallawa dan
Devanagari nan baasa dari India basamo jo masuaknyo ugamo Hindu..
Dalam sejarah suku bangso Jawa nan alah bausia labiah dari 2000 tahun tu tiok
urang tahu dima tampeknyo dalam kasatuan masyarakat nan tastruktur baik ko,
walau agak feodal, dan saluruahnyo tu dilestarikan dalam pewayangan, nan biso
kito pandang sabagai pandidikan nan efektif untuak masyarakat badarai.
Dalam manghadapi galombang demi galombang pangaruah dari lua, saparati
manghadapi masuaknyo ugamo Buddha, Islam, jo Kristen, landasan sejarah dan
budaya mereka jauah labiah kuaik, sahinggo ugamo-ugamo nan baru tu sacaro
praktis dapek di-'jawa'-kan. Apolagi jiko kito ingek bahaso sabagai limbago,
ajaran ugamo Kristen baru malimbago sajak Konsili Niceae tahun 425 Masehi
(kalau ambo indak salah) dan masuak ka Indonesia basamo jo datangnyo Portugis
tahun 1511, kudian saketek dari masuaknyo ugamo Islam ka Indonesia. Dalam
kontak budaya, budaya nan labiah kuaik jaleh akan manang,, dalam hal ko budaya
Jawa jauah labiah kuaik baik dari ugamo Islam maupun daoi ugamo Kristen nan
datang kudian. Sampai kini ugamo Islam di Jawa kan lain juo jo Islam di awak.
Paratikanlah baa urang NU baugamo, dimano pangaruah kiyai-kiyai NU jo
pesantrennyo indak banyak bana bedanyo jo pangaruah pedanda Hindu ka
masyarakat Bali. Pendek kato, jejaring urang Jawa marupokan wujud dan hasil
dari sistem
nilai dan tatanan sosial nan alah taatur rapi dan alah baumua kiurang labiah
2000 .tahun.
Baa di awak ? Iyo tapaso bacurito panjang kito sakatek, sapanjang nan nampak di
ambo. Urang awak baru masuak abad sejarah sasudah abad ka 16, yaitu sasudah
Islam datang , langkok jo tulisan Arab dan sistem nilai sarato tatanan sosial
nan cocok jo jiwa kito urang Minang nan egalitarian.. Antah dek karano apo,
walau sajak abad ka 13 alah mulai masuak pangaruah Ciwa Budha ka Ranah
Minangkabau, ugamo tu indak banyak pangaruahnyo ka nagari-nagari.Mungkin sakali
karano pado dasarnyo nilai-nilai sosial adat Minangkabau nan maajakan 'duduak
samo randah tagak samo tinggi' indak sasuai jo tatanan sosial Jawa nan terpusat
jo feodalistik tu. Pangaruah ugamo Ciwa Budha tu hanyo ado di lingkungan
rajo-rajo Pagaruyuang nan katurunan Jawa sajo. Nampaknyo ugamo Islam masuak
dalam duo galombang. Galombang paratamo mulai dalam abad ka 16 Masehi sacaro
damai dan baangsua-angsua, dari arah Timur dan dari Barat. Galombang kaduo
mulai tahun 1803, tapi sacaro kareh, karano tu dilawan urang
sahinggo manimbuakan Parang Paderi salamo 34 Tahun (1803-1837). Saat itu,
walau Islam alah ado di Minangkabau. salamo kurang labiah 300 tahun, antah baa
bacampua aduak jo adaik lamo, dan mambiakan sajo banyak kabiasaan jo limbago
adat lamo nan sabananyo indak sasuai bana jo ajaran Islam. Pamurnian atau
'reformasi' tajadi awal abad ka 19, sawakatu pulang kampuang salapan urang
haji nan manganuik faham Wahabi garih kareh -- saroman jo Taliban dan FPI maso
kini -- dan mulai malakukan kakarasan untuak mambao urang patuah ka ajaran
ugamo nan mareka anggap benar. Sasudah latiah baparang -- dan sasudah masuak
pulo pangaruah Ulando -- mako diadokan pajanjian padamaian tahun 1937, nan kini
disabuik 'Piagam Bukik Marapalam' nan antah baa alun surang juo nan basuo jo
piagam tu. Apo isinyo Piagam Bukik Maraalan tu ? Yo apo nan kini kito sabuik
sabagai 'Adat Basandi Syara', Syara' Basandi Kitabullah' atau ABS SBK. Hanyo
balain jo pajanjian pardamaian NKRI jo GAM di Helsinki, dan
kini dirinci dalam UU Pemerintah Aceh, di awak indo doh rinciannyo, sahinggo
sampai kini adat bak kato adat, ugamo bak kato ugamo. Balain jo di Jawa dimano
budaya Jawa mampu manyerap sagalo ugamo nan masuak, di Ranah adaik indak
sakuaik tu bana, tapi lamah indak juo, sahinggo ndak ado nan kalah dan indak
ado nan manang antaro adat jo ugamo. Nan nampak di ambo, itulah sababnyo
mangapo Parang Paderi nan balangsuang salamo duo generasi tu indak mancapai
sasarannyo. Baitu juo reformasi nan tajadi sasudah Parang Paderi -- jo
munculnyo Kaum Tuo dan kaum Mudo -- indak juo barhasil manyatukan urang Minang,
sampai kini. Aratinyo, masyarakat Minangkabau ko indak mampu -- atau alun mampu
-- menyerap pangaruah-pangaruah nan masuak manjadi satu jo latar belaang
sejarah dan tradisinyo, nan iduik sakaum-sakaum, saksuku-saku, da
sabagari-sanagari tu, sampai kini. Mungkin itu nan manyababkan gajala nan
dikaluahkan dek Dunsanak kito pak Darul sampai kini, bahaso urang awak bisa
samo
bakarajo tapi indak bisa bakarajo samo. Ringkasnyo, balain jo di Jawa dima
sagalo unsur kabudayaan dapek diintegrasikan jadi satu, dalam masyarakat
Minang, unsur-unsur budaya tu masih sarupo minyak jo aia. Nampak di ambo, itu
makonyo susah bana urang Minang mambuek jejaring, karano indak ado 'grand
design' nan cukuik rinci untuk manindaklanjuti ABS SBK nan tagaiang-gaiang tu.
Nak langkok kaji kito, Ananda Hanifah, itu bana nan mandorong ambo malalui
milis RGM GM, abssbk, jo RantauNet ko, maajak urang awak manyalasaikan 'utang
sejarah' kito sabagai suku bangso, supayo ABS SBK tu bisa dioperasionalkan
kadalam sistem nilai dan tatanan sosial kito nan labiah tapadu, sahinggo 'kok
bulek alah buliah digolongkan, kok picak alah bulaih dilayangkan'. Apo lai ado
hasilnyo ? Syuikur Alhamdullillah, wacana malalui dunia maya ko nampaknyo lai
ado hasilnyo. Rasonyo indak ado beda pandapek kito soal ugamo. Nan masih ado
ganjalannyo adolah dalam soal adat, khususnyo nan manyangkuik soal sistem
kakarabatan dan soal sako dan pusako. Tatapi i sacaro palahan-lahan alah mulai
nampak titiak-titiak tamu. Alhamdullillah. Kamajuan ko -- walau saketek demi
saketek -- paralu bana dikonsolifdasikan, kalau indak bisa masuak angin inyo
baliak, dan payah pulo nantik maangekkannyo baliak.
Kiro-kiro itulah katarangannyo manga urang Jawa indak sarik mambuek jejaringnyo
dan manga urang awak yo bagai jalan di tampek sajo salamo ko.Apo bisa kito
peloki ? Pasti bisa. Salasaikanlah soal ABS SBK ko sacaro mandasar dan
rumuskanlah sacaro janiah sahinggo bisa jadi rujukan dasar dalam iduik kito
urang Minang. Salabiahnyo Ananda bulak baliaklah wacana tantang ABS SBK dalam
bulan-bulan tarakhir kito.
Sampai di siko dulu Ananda, talabiah takurang tantu ambo mintak maaf. Nan bana
tantu tapulang kapado Allah swt juo.
Wassalam,
Saafroedin Bahar.
Iko sen dulu dari hanifah, talabiah takurang mohon maaf.
Wass
Hanifah Damanhuri
Want to be your own boss? Learn how on Yahoo! Small Business.
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================
