To: Palanta
Subject: "Indak Ado Nan Tau"
Assalamu'alaikum W.W.
Yth. Niniak Mamak, Cadiak Pandai, Bundo Kanduang sarato
kasado dunsanak salingkuang palanta Rantau Net;
Alah lamo kito indak basuo, alah tahituang bulan ampia
babilang tahun.
Untuak manamui dunsanak kasadonyo, ambo kirimkan salah satu
carito ambo, sambia maingek-kan kito basamo bahaso bulan
Ramadhan alah hampia tibo. Ateh sagalo salah jo sasek,
khilaf khulafat nan tabuek salamo ko kito abisi jo maaf.
Wassalamualaikum W.W.;
W.A. Sutan Pamenan
Bogor 16330
[email protected]
===================================================
Pado maso saisuak, ado surang saudagar nan kayo rayo hiduik
di Ranah Minangkabau, awak sabuik sajo namonyo sebagai Sutan
Rajo Kayo Nan Bapitih.
Balain si Karun dalam carito-carito nan manumpuak harato
sahinggo lupo kapado Allah SWT, sahinggo haratonyo tu pulo
nan mambunuahnyo sarato mambaoknyo masuak narako; Sutan Rajo
Kayo Nan Bapitih ko indaklah bakcando itu.
Walaupun kayo balindak, rumah nan gadang bak cando istano,
ameh sagadang lasuang (nan indak ditampakkannyo ka nan
rami), namun Sutan Rajo Kayo Nan Bapitih ko indaklah lupo
kapado Allah SWT. Baliau adolah saudagar nan shaleh sarato
suko membantu fakir miskin.
Musajik didirikannyo, surau baitu pulo. Alah tigo kaum nan
mamintak bantuan mandirikan surau, katigo-tigonyo nyo bantu
dek Sutan Rajo Kayo ko, dari pasang batu, tagak kudo-kudo
sampai pasang parabuangan.
Syahdan, pado suatu hari, adolah salah surang pemuda miskin
nan datang kapado Sutan Rajo Kayo nan Bapitih ko andak
malamar mancari karajo.
Kito
sabuik sajo namonyo Buyuang Ketek, walaupun bangkalainyo
sabananyo indak ketek, ndak sasuai jo namonyo.
"Manolah Sutan Rajo Kayo Nan Bapitih." Kecek Buyuang Ketek
mambukak sambah.
Sasudah tu nyo sambuang jo alua antah bara ratuih pantun nan
basabuik antah bara halaman alua nan dibaconyo, tapi nan
intinyo ciek: yaitu wanyo mintak karajo ka Sutan Rajo Kayo.
"Apo kapandaian Angku?" Tanyo Sutan Rajo Kayo.
Mangko dijawek lah pulo dek Buyuang Ketek jo bahaso nan
indak kalah manihnyo bahaso kapandaian wanyo iyo banyak;
sagalo manaruah. Dari karajo balunau (mamangkua sawah)
sampai karajo barasiah, batukang. Dari manggali sumua nan
dalam sampai mamasang gonjong rumah gadang nan tinggi
sangaik, dari mamaliharo nan baangok (bataranak) sampai
mananam nan bapucuak (bacocok tanam).
"Jadihlah." Manitah Sutan Rajo Kayo.
"Angku ambo tarimo bakarajo jo Ambo, anak mudo. Ambo agiah
angku maso percobaan (probation) tigo bulan. Jikok lah
lewaik tigo bulan tu ambo agiah tau bakeh angku apokah angku
taruh bakarajo disiko atau cukuk kontrak sampai disiko. Si
Upiak Banun, sekretaris ambo, akan maagiahkan tugeh-tugeh
nan harus angku karajokan bisuak pagi."
Mangko mulailah Buyuang Ketek karajo jo Sutan Rajo Kayo nan
Bapitih tu.
Tugeh partamo nan diagiahnyo, indak tangguang-tangguang
barek, mambuek rangkiang (lumbuang padi) gadang, bagonjong
sarato baukiran, harus salasai dalam tigo hari!
Batabik paluah Buyuang Ketek mamuta kincia-kincianyo supayo
baa karajo bisa capek dan efektif, sahinggo dalam tenggat
waktu nan ditentukan, rangkiang tu alah sarah terima kunci
ka Sutan Rajo Kayo.
Indak lewaik dari tangah hari di hari nan katigo, alah
salasai rangkiang tu dek si Buyuang Ketek. Takajuk bacampua
heran Sutan Rajo Kayo, indak disangko anak mudo nan banamo
Buyuang Ketek ko bisa mangarajokan sagadang tu.
Mangko diagiahnyo pulo tugeh nan kaduo, yaitu: Mambelokkan
aliran batang aia Namang sahinggo mengaliri lurah dima sawah
Sutan Rajo Kayo batumpak, dan harus salasai dalam duo hari sajo!
Ondeh, raso ndak kamungkin si Buyuang Ketek sanggup
mangarajokan tugeh tu.
Batang Namang ukanlah banda ketek, tapi sungai salaweh tujuah dapo!
Basitungkin pulo lah Buyuang Ketek mamuta utak manjalankan
kincia- kincianyo, baa caronyo batang aia tu harus
dikelokkan sahinggo mengaliri sawah lurah Sutan Rajo Kayo,
dan salasai dalam duo hari...
Berkat rahmat Allah SWT kapadonyo juo (untuak mampasingkek
carito, usahlah ambo jalehkan disiko sacaro teknis baa si
Buyuang tu mangali sarato mamindahkan aliran sungai tu),
mangko proyek si Buyuang tu bahkan dapek disalasaikannyo
hanyo dalam wakatu satu satangah hari!
Ampia takarambuang Sutan Rajo Kayo Nan Bapitih mancaliak
batang aia Namang alah pindah, bakelok mengairi areal
persawahan punyo Sutan Rajo Kayo, sahinggo hasia padi bisa
diharokkan meningkat, dari hanyo limo ratuh gantang
sapiriang sawah manjadi saribu gantang sapiriang. Dan Sutan
Kayo hanyo tinggak maetong bara piriang sawah nyo di lurah
tu, kalikan saribu.
Sakitu
lah perkiraan hasil padi di musim manuai nan katibo!
Sasudah baranti panek si Buyuang Ketek kiro-kiro abih
sabatang paisok, mangko dipanggia lah wanyo dek Sutan Rajo
Kayo baliak untuak manamui baliau di ateh tingkah rumah
gadang nan sagadang istano Pagaruyuang tu.
"Buyuang Ketek," Titah Sutan Rajo Kayo Nan Bapitih tu bawibawa.
"Alah duo kali ambo mahagiahkan bakeh angku karajo nan
sangaik barek, namun kaduo-duonyo angku salasaikan dalam
sakejap sajo."
"Ambo Sutan Rajo Kayo."
Sahuk Buyuang Ketek jo suaro nan agak gametar. Apo pulo
karajo lain nan ka diagiahkannyo bakeh ambo? Baitu tanyo
dalam hati Buyuang Ketek agak- agak cameh.
"Karajo nan katigo nan ka ambo agiahkan bakeh angku, adolah
karajo nan sangaik ringan." Lanjuik Sutan Rajo Kayo.
"Apopun itu Sutan, ambo maanjuang tinggi mahamba gadang."
Sahuk Buyuang Ketek mempersiapkan diri.
"Ambo ka mamintak tolong bakeh angku untuak mandabiah ayam
jantan ambo nan banamo si Kurai Taji."
"Jikok baitu titah Sutan Rajo Kayo, utang di ambo
malakukan." Jawek si BK.
"Namun ado syaraiknyo ciek, Buyuang. Ayam ko harus angku
dabiah di suatu tampek nan sangaik rahasio, sahinggo indak
surang pun nan tau bahaso angku mandabiah ayam ko. Sudah tu
baru ambo bao ayam nan alah badabiah ko bakeh ambo baliak.
Kalau alah salasai dek angku tugeh tu, mangko angku sacaro
resmi ambo nyatokan sebagai karyawan tetap ambo."
Indak abih pikia si Buyuang Ketek, apo sariknyo mandabiah
ayam basisuruak tu? Namun si Buyuang capek manjawek:
"Ambo siap Sutan."
Mangko basiua lah si Sutan Kayo, "Switt..."
Siua nan singkek sajo, tapi ruponyo itu adolah panggilan
khusus untuak si ayam jantan nan banamo Kurai Taji,
tibo-tibo wanyo tabang mancogok di pintu rumah gadang,
malompek ka hadapan Sutan Rajo Kayo Nan Bapitih, tuannyo nan
ruponyo sangaik disaganinyo tu.
"Koq... Koq.. Koq.." Baitu bunyi si Kurai Taji.
Diambiaknyo dek Sutan Kayo ayam jantan nan sangaik rancak
tu, dikabeknyo kakinyo, diagiahkannyo bakeh si Buyuang Ketek.
"Iko nyo buyuang, dabiah lah di tampek nan tasuruak. Ingek,
INDAK buliah surang juo nan tau! Jikok sampai ado nan tau,
mangko tugas angku ambo nyatokan gagal! Jaleh?"
Mangko pailah si Buyuang Ketek sambia mangapik ayam jantan
tu, mancari tampek nan tasuruak sambia mambaok pisau sabilah.
Alah kiro-kiro ampek hari ampek malam si Buyuang Ketek tu
mailang mancari tampek nan tasuruak, alun juo tampak batang
iduangnyo baliak sambia mambaok ayam nan alah badabiah.
Di hari nan katujuah, pas hari Jumaaik, kiro-kiro matohari
baru tabik di wakatu sadangelok sumbayang dhuha, mancogok
lah si Buyuang Ketek jo mato nan kuyu sarato wajah nan
sangaik lelah tampaknyo.
Herannyo lagi, ayam nan dibaoknyo pulang bukan ayam nan alah
badabiah, tapi ayam jantan si Kurai Taji nan masih hiduik
juo baru, bahkan sangaik sehat tampaknyo!
"Mano lah Sutan Rajo Kayo Nan Bapitih!" Soru si Buyuang
Ketek bakeh urang diateh rumah gadang.
Kalualah Sutan Rajo Kayo dengan pakaian sarato tungkek kebesarannyo.
"Wahai Buyuang Ketek, apo nan tajadi sahinggo tujuah hari
tujuah malam angku mahilang, tapi nan ayam tu alun tadabiah juo?"
Dilapehkannyo dek si Buyuang Ketek si Kurai Taji tu di
halaman rumah gadang, malompek nyo ka tunggua karambia,
dikapakkannyo sayoknyo tigo kali, langsuang nyo baeh
bakukuak panjang: "Kkukuruyuuaakkkkk...!"
Maramang bulu kuduak sado urang nan tagak di halaman,
nampaknyo si Kurai Taji ko bukan ayam sumbarang ayam,
melainkan ayam nan batuah sahinggo alah tujuah hari wakatu
abih, namun si Buyuang Ketek indak juo berhasil mandabiahnyo.
Manyoru lah Buyuang Ketek sudah tu:
"Iyo alah gagal ambo melaksanakan tugeh Angku, Sutan Rajo kayo."
"Ari partamo pai ambo ka puncak gunuang, namun ambo indak
bisa mandabiah ayam Sutan ko karano ado nan mancaliakkan
ambo; ado nan tau bahaso ambo ka mandabiah ayam ko.
Ari kaduo masuak ambo ka guo nan paliang dalam, tapi ado juo
baru nan tau bahaso ambo ka mandabiah ayam ko.
Ari katigo dan seterusnyo, alah berbagai tampek nan ambo
jelajahi, dari rimbo nan labek sampai lautan nan laweh indak
batapi, tapi ado juo baru nan mancaliakkan ambo..."
"Akhianyo ambo sadar, wahai Sutan Rajo Kayo Nan Bapitih nan
budiman, bahaso ambo indak sanggup mangarajokan
tugeh angku ko doh."
Tatagun kasado nan hadir. Urang lah balungguak di halaman
rumah gadang tu, mambulalang raso ndak pacayo ka apo nan tajadi.
Alun sempat Sutan Rajo Kayo manitah, disambuang dek Buyuang Ketek
keceknyo:
"Dengan ini ambo secara resmi mengundurkan diri dari jabatan
nan ambo apply, karano ambo nyato indak sanggup melaksanakan
perintah Sutan Rajo Kayo nan sabananyo tampak ringan tu."
Mangko dicampakkannyolah dek si Buyuang Ketek KKS (Kartu Karyawan
Samantaro)
dari perusahaan Sutan Rajo Kayo Ltd. nan salamo ko
dipaciknyo, nan manunjuakkan bahaso BK ko masih dalam maso
probation di Sutan Rajo Kayo Holdings, & Co.
Mangko manitahlah Sutan Rajo Kayo:
"Wahai Buyuang Ketek, siapokah garangan nan bisa mengikuti
engkau bahkan ka tampek-tampek nan paliang langang sarato
paliang tasuruak tu?"
"Sutan Rajo Kayo... Nan mangikuti ambo kama juo ambo pai,
indak lain dan indak ukan adolah Allah SWT nan selalu
mengetahui apo nan ambo karajokan."
Jawek si BK tegas.
Haniang menyelimuti halaman rumah gadang untuak beberapa
saat, sahinggo panjaik jatuah pun pasti tadanga. Bahkan ado
nan manyangko bahaso malaikaik lalu sahinggo tahanianga sajo
urang sabanyak tu.
Dalam keheningan tu, mangko malangkah lah si Sutan Rajo Kayo
mandakek bakeh si Buyuang Ketek. Urang rami batanyo tanyo
dalam hati, apokah garangan nan kadilakukan dek Rajo Kayo ka
BK? Apokah ka ditampa dilapuaknyo BK ko karano ndak sanggup
mangarajokan karajo nan tampaknyo sangaik gampang tu?
Namun indak disangko dek nan banyak, tibo-tibo dipaluaknyo
si Buyuang Ketek dek Sutan Rajo Kayo Nan Bapitih nan sangaik
terhormat tu. Agak heran rang nan banyak, baa mungkin surang
Sutan Rajo Kayo mamaluak surang anak mudo matah nan bansaik
pulo, nan lah gagal pulo melaksanakan tugeh nan diembannyo?
Mangeceklah Sutan Rajo Kayo sambia manangih di bahu si Buyuang Ketek;
"Ondeh Buyuang Ketek anakku..."
"Memang batua apo nan Ananda katokan, sasungguahnyo kama juo
awak pai, apo juo nan awak karajokan walaupun ndak ado urang
nan mancaliak, sesungguhnyo Allah SWT Maha-Mengetahui..."
"Indak ado karajo awak nan indak diketahui-Nyo..." Kecek
Sutan Rajo Kayo sambia taisak-isak.
(Sejujurnyo dunsanak, ambopun manangih pulo dinyo katiko
manulihkan carito
ko- iyobana terharu awak dinyo... titiak aia mato ambo mambayangkan.)
"Engkau ukanlah gagal melaksanakan tugeh dari ambo Nak...
Ruponyo angku lah nan ambo cari-cari salamo ko namun ndak
pernah ambo tamukan..."
"Alah ratusan pemuda nan datang bakeh ambo, alah indak
taetong pulo ayam ambo nan mati tadabiah... Namun baru
angku-lah nan manyadari bahaso kasado perbuatan awak, baik
baiak atau buruak indak lapeh dari pengawasan Allah SWT,
wahai anakku..."
Lamo Sutan Rajo Kayo taisak-isak di bahu Buyuang Ketek,
hadirin di halaman rumah gadang pun banyak nan baurai aia
mato (tamasuak penulis - pen.). Nan induak-induak
bajaleh-jaleh manangih marauang, sadangkan para pemuda
sambia tasipu-sipu manyeka aia mato di suduk matonyo, baitu
pulo apak-apak sarato datuak-datuak nan hadir.
Kasudahan kaji, si Buyuang Ketek akhianyo diangkek sebagai
urang kepercayaan Sutan Rajo Kayo Nan Bapitih nomor satu.
Indak itu sajo, si Buyuang Ketek pun akhianyo dikawinkannyo
jo anak perempuannyo satu-satunyo dari Sutan Rajo Kayo nan
banamo Puti Nilam Bainai, nan sangaik rancak putiah manih
sarato jombang. Indak ado pemuda nan indak titiak aia
saleronyo jikok mancaliak anak gadih Sutan Rajo Kayo nan
jauah labiah rancak dari Paris Hilton nan indak bakain tu.
Di kamudian hari, salah surang cucu dari Sutan Rajo Kayo Nan
Bapitih tu, manuruik hikayat, akhianyo marantau ka Luhak
Limopuluah Koto, Ranah Rang Pikumbuah, tapeknyo ka Jorong
Tiakar Kecamatan Guguak Kenagarian Salapan Koto.
Cucu dari Sutan Rajo Kayo tu banamo Abdul Hamid Dt. Indo Marajo.
Abdul Hamid Dt. Indo Marajo ko baranak tigo urang, duo
laki-laki surang padusi.
Dek karano nan laki-laki ndak mandapek harato pusako tinggi,
mangko jatuahlah kasado pusako bakeh anak padusi nan surang
tu, nan banamo Syawalis Puti Rajo Intan (karano lahia di
bulan Syawal).
Anak ka-ampek dari Syawalis nan bajunjuangan jo Dt. Mangkuto
Sinaro Nan Kuniang, pangulu sarato suluah bendang dalam
nagari urang Pagacancang Pincuran Mudiak ko lah nan akhianyo
manyandang gala Sutan Pamenan, dek karano sabana manjadi
pamenan mato sarato pamenan kiro-kiro dek urang banyak.
Manuruik kaba, Sutan Pamenan ko kini marantau ka Ranah Rang
Pasundan di suborang lauk.
[***]
Bogor, tangah malam malakik ka pagi,
Kamis, 20 Juli 2006 M / 23 Jumadil Akhir 1427 H.
Wassalam,
W.A. Sutan Pamenan
Perumahan Telaga Kahuripan
Blok Candraloka AA-10 No. 3
Parung, Bogor 16330
---------------------------------
Stay in the know. Pulse on the new Yahoo.com. Check it out.
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================
