Wa'alaikum salam wr wb.
(diquote kasadono baliak untuak konsumsi Rantaunet dan Banuanet)
Hendra.
Topik "namo-namo nagari nan di indonesiakan" lah babarapo
kali muncul di Rantaunet kalau ndak salah juo di SMA1-net.
Ambo sandiri pernah manulih di Singgalang (?? lupo ambo) sakitar
thn 1967 (*) tantang namo2 nagari nan diindonesiakan ko.
Juo di Kompas sakitar 1996 ambo manulih hal nan samo.
Memang hal nan sangaik "rancu" namo2 nan diindonesiakan ko.
Rasono sabagai urang minang maraso sato malu ....... iko
rasono go eh.
Hal iko paralu dibaok katangah baliak.
Karano di rantaunet kini lah ado rang tuo kito nan aktip,
dan panjabaik pamarentah mudah2an hal iko bisa sampai ka
Gubernur dan DPRD.
(*) sabalun tulisan ambo kalua di koran dipadang tu,
jorong ambo di Kbg Putih dibaco urang Bulaan Kambar.
Bulaan dan kambar indak ado dibhs indonesia.
Sajak tulisan tu kalua, urang2 mambaco baliak ka aslino
Bulaan Kamba.
mak Ban (alumni 1969)
~~~~~~~~~~~~~~~~~~~~~~~
> Ass WW. dunsanak sadonyo, salamaik bapuaso.
>
> Untuak marintang ari jo maelo saha, ambo kamaota saketek di
> palantako buliah kan sanak ? Tatkalo ambo pulang kampuang n
> bakaliliang di Sumbar, babarapo kali ambo mambaco plang
> namo suatu nagari atau daerah agak ganjia manuruik ambo,
> misalnyo 'Kota Gedang' untuak manyabuik 'Koto Gadang'. Raso
> rasonyo 'Gedang' tu indak cocok untuak arati kato atau
> padanan kato 'Gadang' nan bararti 'besar' dalam bahaso
> indonesia (di jawa Gedang tu aratinyo pisang). 'Koto'
> diubah jadi 'Kota' mungkin bisa tapi indak cocok pulo
> rasonyo. Sanak mungkin parnah pulo mambaco plang namo
> 'Ladang lawas' untuak mangganti namo 'Ladang Laweh' , apo
> iyo 'Laweh' dalam kosa kato Minang samo jo 'Lawas'?.
> Rasonyo labiah rancak dan mantap awak manyabuik 'Ampek
> angkek' dari pado 'Empat Angkat'
>
> Kalo sanak simak banyak namo tampek,daerah,nagari atau
> mungkin kampuang dinagari awak di Indonesia kan tapi sacaro
> arati sangaik indak samo, jiko arati samo rasonyo kurang
> pas juo. Mungkin sumangaiknyo Nasionalis sahinggo sadonyo
> di Indonesiakan, tapi untuak apo sabuah namo diganti jo
> bahaso Indonesia apolai sampai marubah arati jo makna,
> bukankah itu sabuah identitas?
>
> Katiko awak jalan kadaerah Jambi basuo jo kota 'Muaro
> Bungo', rasonyo indak ado nan kurang dibandiang apabilo
> urang Jambi manggantinyo manjadi 'Muara Bunga'. 'Angso
> Duo' marupokan kabanggaan Jambi tanpa harus diganti jadi
> 'Angsa Dua' . Urang Palembang tatap bangga mamakai namo
> 'Pasar Panglimo' indak usah diganti jadi 'Pasar Panglima'.
> Kalo awak bakaliliang di Jawa Barat awak basuo jo namo
> namo khas daerahnyo, Ciembeuluit, Dayeuh Kolot, Cihaur
> Geulis, Pameungpeuk dan lain sabagainyo, tarasonyo elok
> bana tanpa dipaso an mamakai ejaan bahasa indonesia. Cubo
> liek di Jakarta ado 'Pasar Rebo' kalo di Indonesiakan jadi
> 'Pasar Rabu', 'Pasar Senen' tatap dipakai tanpa harus
> diganti jo 'Pasar Senin'
>
> Katiko ambo bakunjuang kakawan lamo di Padang jo di Kik
> Tinggi,indak surang juo anaknyo nan bisa babaso Minang sado
> alahe pakai bahaso Indonesia d/h Jakarte padahal lahia,
> sikola, sampai mahasiswa inyo disinan. Suatu wakatu ambo
> bakenalan jo surang urang awak dari kalangan intelek di
> Banduang di karatu namonyo tatulih gala Dt.Panglima Kaya,
> mungkin iko hasia metamorfosis dari Dt. Palimo Kayo. Samo
> juo halnyo jo surang konco ambo nan mamakai gala Sutan Raja
> Basa, aslinyo mungkin Sutan Rajo Baso.
>
> Nah ...sanak sadonyo, tadi pagi ambo mambaco tulisan
> diharian Kompas Sabtu 30 Sept 06, halaman 14 " Feodalisme
> di Negeri Egaliter" ditulih oleh sanak "Ivan Adilla",
> dosen Fakultas Sastra Unand. Tulisan sanak ko Rancak
> Bana, untuak camin diri awak urang Minang. Alinia terakhir
> tulisan baliau agak manggalitik ambo, makonyo ambo
> lansuang mambuek tulisanko, parintang wakatu manunggu
> babuko....
>
> Bravo n Salam kenal untuak Sanak Ivan Adilla di Unand -
> Padang.
>
> Talabiah kurangnyo maaf yo sanak,kok ado nan tasingguang
> kanaiak-talendo katurun.
>
> Salam
>
> (hendra bahar/74/bdg)
___________________________________________________________
indomail - Your everyday mail - http://indomail.indo.net.id
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK DIPERHATIKAN:
- Hapus footer dan bagian yang tidak perlu, jika melakukan Reply
- Besar posting maksimum 100 KB
- Mengirim attachment ditolak oleh sistem
=========================================================
