Tolong dibaca aturan di footer dibawah
--------------------------------------
Ambo mulo mancaliak dunia,kato gaek taun 1959 tapi sikola kalas satu taun 65,
masotu saraek nak masuak sikola bukan umua atau babadan gadang tapi balatakkan
tangan suok ateh kapalo resek talingo kida, koklai tagabai,ditarimo masuak
sikola tapi kok singkek tangan walaupon umua lah 10taun alun buliahlai
ditarimo,nan ambo pulo, badan gapuak kapalo gadang tangan pendek pulo,tapi
antah dek pitunjuak datang atau nasib sadang kaelok, ambo bantai manakua maso
maresek tangan taguliciak kaateh kuduak mako sampailah tangan
katalingo,tacapailah saraek masuak sikola.
Nagari ambo dilingkuang bukik sabalah kabaruah batabek gadang,ambo pikia itu
sajolah nan dunia masotu,oto lalu ciek2 kok honda dipanggia
Motorpit,kuretaanginpun jarang basobok kok garobak yolai banyak.
Kok makanan nan populer iyolah Bada masiak jo Palai rinuak,umua 10 nyo bao di
gaek bajalan ka Bukik tinggi, itulah baru mangicok naiak oto sabaluntu nan acok
hanyolah naiak pungguang kabau bagalimang luluak,mangimpau sambia manggaro
buruang.
Mandaki kelok2, sabanta barayun kakida sabanta barayun ka suok, madok kabawah
baraso kalareh, mangguluang raso paruik,mungkin dek lamo batahan2 manembak
sagalo bareh bagulimang samba,baserak ka kuduak rang dimuko, onde mak oi,
mancaliak rang dimuko takajuik lantas malengong kabalakang tabiklah rusuah rang
gaek, sambia minta maoh capek rang gaek mangaluakan anduak ketek nan lah
bapulau2 dek kasan salemo.
Untuang lai bajunyo indak kanai,inyo lai panyaba pulo,kok indak,antah apo
caruik nan ka inyo baco.
Ambo raso sanak tau dima kampuang ambotu. kok indak tatakok rancak tanyo ka
angku Z Chaniago.
Taun 76 ambo tamaek SMEP, Januari 77 lansuang manyubarang lauik katanah
Ringgik, masotu saringgik baru 140 rupiah.
Januari Taun nan katiboko ganoklah 30taun ambo bajaga umua ditanah
subarang,dari baraja manggaleh dikaki5,karajo Restoran,manyupir Ta kali ciek
(TAXI) kiniko mambao nan labiah gadang nan baroda6, mauruih jo maangkuik barang
dari Palabuahan Klang ka KL dan sekitarnyo.
Induak bareh lai rang awak, basobok di KL taun 93, diateh kasapakatan jo
karajo samo kami baduo, kok paja baru satangah lusin.
Bilo agaknyo Sanak kamanyilau katanah subarang? jan lupo baimbau jo ambo atau
Ajo Arshas nan gagahtu.
Sakitulah dulu carito ambo di episode ko, beko abihlo modal nak bacarito,
hati nak bacarito juo.
Wassalam
Kani47
Riri - Mairizal Chaidir <[EMAIL PROTECTED]> wrote:
Salam kenal juo dari ambo.
Kalau kampuang, sabananyo urang gaek padusi dari Sungai Balantiak, kampuang
ketek di dakek Batu Ampa, Kab. 50 Kota.
Tapi ambo dari lahia di (tahun 1962) sampai pertengahan 1978 di Padang
Panjang. Makonyo kalau urang batanyo ambo urang ma, reflek tajawab urang Padang
Panjang, sebab ambo ndak tau banyak lo jo kampuang asli ambo.
Tahun 78 tu ambo pindah ka Jakarta, SMA, lanjut ka STAN. Lulus Diploma 3 ambo
ditempatkan di BPKP Padang (akhir 84-pertengahan 87)
Sudah tu masuak Stan baliak, Diploma 4, lulus, karajo sabanta di BPKP Pusat.
Tahun 92-94 maambiak S2 di Adelaide, Australia. Pulang ka Jakarta, di BPKP
Pusat lo baliak sampai pertengahan 97.
Dipindah ka Lampung, sampai 2000. Sudah tu, sampai kini bakarajo di Jakarta,
walaupun sajak tahun 2005 ndak di BPKP lai.
Tingga kini - sajak 2002 - di Jati Bening, Bekasi.
Lah panjang jo sejarah ambo.
Kalau angku Syaukani baa? Nio lo ambo mandanga sejarahnyo.
RIri
---------------------------------
Access over 1 million songs - Yahoo! Music Unlimited.
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK SELALU DIPERHATIKAN:
- Hapus footer dan bagian yang tidak perlu, jika melakukan reply.
- Posting email, DITOLAK atau DIMODERASI oleh system, jika:
1. Email ukuran besar dari >100KB.
2. Email dengan attachment.
3. Email dikirim untuk banyak penerima.
================================================
