Tolong dibaca aturan di footer dibawah
--------------------------------------
Assalamulalaikum w.w. ara dunsanak sapalanta,
Ado duo masalah nan agak manggaduah pikiran ambo, yaitu : 1) di ma latak
tokoh-tokoh Minang nan indak sapanuahnyo badarah Minang, saparati Dr. Mohammad
Hatta, Angku Muhammad Syafei, atau A.A. Navis, dan 2) apo gala kahormatan
tingkek Minangkabau nan ka kito agiahkan untuk manghormati tokoh-tokoh Minang,
dan limbago apo nan sarancaknyo maagiahkannyo. Katarangannyo adolah sabagai
barikuik.
Paratamo, ambo sabana takajuik wakatu hadir dalam rapek mambahas rencana
mambuek patuang Bung Hatta di Bukiktinggi. Rencananyo patuang baliau pakai baju
datuak,sasuai jo satu-satunyo foto baliau babaju datuak nan diagiahkan dek
Gubernur Harun Zain wakatu itu. Namun ado di antaro hadirin nan bakabaratan,
karano ruponyo Bunda Bung Hatta bukan urang awak, jadi baliau indak basuku dan
karano tu indak mungkin bapakaian datuak, apolagi jadi datuak.. Sabana
taparangah ambo mandanga reaksi tu. Ambo sabana yakin bahaso Bung Hatta indak
ka maminta baliau dibuekkan patuang, apolagi pakai baju datuak. Baliau alah
talalu gadang untuak digadangkan jo gala datuak. Gala ‘Proklamator’ sajo alah
labiah gadang dari gala datuak, kan? Tapi itulah kaadaannyo.
Kaduo, ambo sabana taharu sawakatu babincang-bincang jo Bung Anas Nafis,
dunsanak Ali Akbar Navis. Ruponyo baliau katurunan Sentot Alibasyah, jadi
katurunan Jawa, karano itu indak basuku pulo. Hal itu balansuang taruih sajak
1837, jadi hampia 170 tahun baliau dilatakkan di lua paga komunitas Minang.
Tambahan lai, Angku Syafii dari INS Kayu Tanam ruponyo urang Kalimantan.
Soalnyo, sia di antaro kito nan barani mampasoalkan kaminangan baliau-baliau
dan barani mansoalkan jaso-jaso baliau tu untuk Minangkabau dan Indonesia ? Dan
apo panghargaan sacaro formal nan alah kito agiahkan ka baliau-baliau? Rasonyo
alun ado lai. Sairiang jo itu, ambo dibisiakkan den Dunsanak Taufiq Ismail
untuak mangharagoi jaso Bung Des Alwi, nan alah jadi anak angkek Bung Hatta dan
sabana banyak jasonyo ka sejarah Indonesia.
Sasudah batanyo suok kida, ambo ado usul untuak masalah ko. Saroman ko. 1)
Karano maagiahkan gala sako sabagai gala kahormatan bisa bamasalah
khususnyo dalam hubungan jo harato pusako, mako gala kahormatan Minangkabau nan
akan diagiahkan sabagai kahormatan adolah gala sangsako, saroman nan alah
paranah diagiahkan dek katurunan Pagaruyuang. 2) Supayo sasuai jo
tata negara kito kini, dan supayo jan ado pulo kritik taradok iko, gala
sangsako nan diagiahkan dek katurunan Pagaruyuang itu dilakukan malalui
Gubernur Sumatera Barat ateh pasatujuan DPRD Sumbar. Labiah rancak kalauado
Perda pulo soal iko.
Gagasan ko alah ambo bicarokan jo duo katurunan Pagaruyuang, yaitu Sdr Taufik
dan Raudha Thaib, dan alhamdulillah baliau baduo satuju. Ambo juo batanyo ka
pak Chaidir Nien Latief Dt Bandaro, mantan Ketua LKAAM paratamo, dan
alhamdullilah baliau juo cocok. Bung Taufik dan Raudha ka datang ka Jakarta
tanggal 13 biasuak ko.
Baitulah, sabagai langkah paratamo ambo ingin mausulkan supayo tokoh-tokoh
Minang, baiak badarah Minang maupun indak, atau nan bajaso ka rakyat Indonesia
dan urang Minang, nan alun kito agiah panghargaan Minangkabau sacaro resmi –
padohal kito alah maagiah gala tu ka Sultan Hamengku Buwono X jo Presiden SBY
-- sugirolah kito agiah gala kahormatan sacaro resmi tu jo sagalo atributnyo.
Kito mulai dari Dr. Mohammad Hatta, taruih jo Muhammad Syafei, dan AA Navis.
Supayo langkok, jan lupo ka Bung Des Alwi.
Ambo yakin, caro iko bukan sajo akan mampakuaik raso parsatuan dan kasatuan
Minangkabau, tapi juo mampuaik raso kabangsaan kito ba Indonesia. Sampai kini
ambo maraso sabana aneh, masak ka Bung Hatta bapakaian datuak sajo ado reaksi ?
Rasonyo agak bakalabiahan. Kini gala sangsako bisa jadi jalan kaluanyo. Sacaro
khusus ka Bung Taufik, Rangkayo Raudha, jo pak Chaidir ambo ucapkan tarimo
kasih banyak.
Dalam jangka panjang, paralu dibuekkan samacam ‘Minangkabau Hall of Fame’
dimano disimpan sagalo dokumen dan foto nan bakanaan jo karya-karya
baliau-baliau tu. Baa kok Pusat Dokumentasi dan Informasi Minangkabau di
Padangpanjang kito gunokan untuak itu ?
Wassalam,
Saafroedin Bahar Soetan Madjolelo (70th)
__________________________________________________
Do You Yahoo!?
Tired of spam? Yahoo! Mail has the best spam protection around
http://mail.yahoo.com
--------------------------------------------------------------
Website: http://www.rantaunet.org
=========================================================
* Berhenti (unsubscribe), berhenti sementara (nomail) dan konfigurasi
keanggotaan,
silahkan ke: http://rantaunet.org/palanta-setting
* Posting dan membaca email lewat web di
http://groups.yahoo.com/group/RantauNet/messages
dengan tetap harus terdaftar di sini.
--------------------------------------------------------------
UNTUK SELALU DIPERHATIKAN:
- Hapus footer dan bagian yang tidak perlu, jika melakukan reply.
- Posting email, DITOLAK atau DIMODERASI oleh system, jika:
1. Email ukuran besar dari >100KB.
2. Email dengan attachment.
3. Email dikirim untuk banyak penerima.
================================================
