Tolong dibaca aturan pada footer dibawah
-------------------------------------------
Para dunsanak sa palanta,
Patuik kito syukuri -- walaupun indak sangajo dirancang untuak itu --
nampaknyo minat dan dedikasi para pencinta kareta api di Sumatera Barat jo
gagasan pulang basamo dari Ajoduta alah bahasil mandorong timbuanyo wawasan
baru untuak mamajukan ekonomi kampuang kito malalui wisata. Dari tuka pikiran
di palanto iko alah nampak bukan sajo potensi dan dapek kito manfaatkan, tapi
juo masalah-masalah nan paralu kito tangani, agar niaik baiak ko bana-bana
dapek tawujud, dan bisa bakasinambungan di maso datang. Indak sakadar sakali
lacuik sajo sasudah tu abih. Di bawah ko adolah sakadar rangkuman dibumbui jo
saketek komentar, supayo kito dapek gambarannyo sacaro manyaluruah.
1. Hal-hal nan alah elok dan paralu kito paliharo dan kito
kambangkan taruih.
a. Kacintoan parantau Minang ka Ranah Minang. Iko jaleh bana, bukan hanyo
dari generasi paratamo, tapi juo dari generasi kaduo dan katigo.Alhamdulillah.
Rasonyo hal iko wajar dan manusiawi, karano ado dorongan bathin manusia untuak
mancari akar identitas di tangah baitu banyak ras dan etnik di Indonesia ko.
Paliang muko dalam garak ko adolah prakarsa Ajoduta di Amerika untuak pulang
basamo bulan Juli 2008 nantik. Sakadar catatan, kalau ambo indak salah, ado
buku Alex Haley, urang itam di Amerika nan niniak muyangnyo daulu dijua sabagai
budak, manalusuri asa niniak muyangnyo ka Afrika. Pangalaman tu baliau tulih
dalam buku Roots. Curito sanada dapek kito baco dalam novel Buya Hamka,
Tenggelamnya kapal van der Wijk nan tamusaua tu, mancaritokan kisah anak
surang datuak nan dibuang ka Tanah Bugih tu, dan kawin jo urang Bugih,
pulang ka Minangkabau mancari niniak muyangnyo. Dari sagi wisata, para
parantau ko adolah potensi langganan tatap dan paralu dirawat
elok-elok sabagai captive market nan indak ka putuih-putihnyo, karano kagiatan
pulang basamo ko dapek mambantu maagiah karajo ka dunsanak di Ranah. Wisata
mancanegara lain bisa jadi palangkok sajo.
b. Alam Ranah Minang nan sabana rancak. Kito indak usah mangapik daun
kunyik dalam soal ko, karano sagalo urang nan alah kanyang bawisata ka salruah
dunia, kudin mancaliak kampuang kito, sabana tacangang-cangang mancaliak. Alam
kito ko haruih kito rawat elok-elok. Jan sampai dek karano illegal logging,
abih tandeh sagalo kaindahan dan kacantikan Ranah nan kito cintoi itu. Kalau
kito pabiakan, bukan sajo Ranah Minang akan kariang karontang di maso datang,
tapi juo ka hantam banjir dan tanah longsong bakapanjangan. Karano tu jan
dipabiakan.
c. Keamanan. Dibandiangkan jo daerah-daerah lainnyo di Indonesia, Sumatera
Barat tamasuak daerah aman. Indak ado bom, indak ado huru hara, indak ado
tawuran massal antar panduduak. [Sasakali tantu ado demo]. Sanang ati urang
datang dan ingin babaliak.
d. Aset kareta api nan tapaliharo baiak. Kito patuik basyukur ka
nyinyia-nyo pak Chaidir Nien Latief, dan indak panek-paneknyo maansik kito
untuk mampartahankan bahkan mangambangkan kareta api sabagai aset daerah
nan salamo ko tabangkalai, bahkan akan ditutuik karano rugi taruih. Dalam
fungsi baru sabagai karena wisata, jaleh kareta api ko bisa iduik taruih bahkan
bisa bakambang, asa alam nan indah dirawat, dan asa acara pulang basamo
disalanggarokan elok-alok. Kalau kito kana bahaso banyak bana konferensi
nasional dan internasional nan disalanggarokan di Bukittinggi, bayangkan kalau
sagalo pesertanyo kito angkuik sakali gus dari BIM ka Bukittinggi jo kareta api
wisata ko. Dijamin sero ! Ambo ikuik naik kareta wisata bulan Desember 2006 nan
lalu. Ondeh maak, bukan main sanangnyo dibandiangkan jo naiak oto. Kito bisa
maota sacaro santai jo konco-konco. Bisa pulo dimintak baranti dima kito suko.
A juo lai nan labiah dari itu, sasudah kito pusiang dek mancari
nafkah di Rantau dima sagalo urang basiguluik mancari rasaki ? Bahkan SBY
pulang baliak ka Ranah kito ko tiok sabanta. Sanang ati baliau nampaknyo.
e. Adonyo badan-badan usaha nan bagarak dalam bidang wisata. Hotel,
restoran, biro parjalanan, travel, palabuhan kapa tabang, dan toko souvenir
kito punyo, dan indak kalah mutunyo jo usaho dima sajo.
f. Sumangaik dari tanago-tanago mudo sukarelawan. Ambo sabana basyukur
jo dedikasi dan kegigihan babarapo tanago mudo, antaro lain Dunsanak Ir Kurnia
Chalik jo Ir Yulnofrins Napilus, nan marupokan lokomotif saluruah kagiatan
wisata model baru di kampuang kito iko. Baliau-baliau ko bukan pangusaha
wisata, dan nampak di ambo indak ado rencana nak mambuek usaho wisata untuak
mancari untuang. Bahkan sagalo biaya untuak sagalo kagiatan baliau-baliau ko
kalua dari kantuang baliau surang-surang.
g. Dukuangan kuaik dari Pemerintah Daerah. Kito patuik bana batarimo kasih
ka Pak Gub kito, pak Gamawan Fauzi, nan maagiah respons nan sabana capek,
untuak mandukuang sagalo kagiatan wisata ko. Alun panah ambo mancaliak respons
surang gubernur dimano pun nan saroman respons pak BA-1 kito ko. Bahkan baliau
mamutuihkan untuk mambuek jalan kareta api dari dan ka BIM di Katapiang dan
mandukuang gagasan city check-in di stasiun Simpang Haru.
2. Hal-hal nan masih paralu babarapo bahkan paralu bana
kito sapakati dan kito peloki.
a. Motto atau semboyan wisata Ranah Minang. Walaupun nampaknyo sederhana,
namun rasonyo iko cukuik penting, karano motto atau semboyan iko ka manjadi
gambaran nan ka malakek dalam pikiran para wisatawan, baik para parantau maupun
bukan. Dalam wacana RantauNet alah ado ampek macam saran. Piliahlah ciek nan
badagok, nan sabana khas, nan marupakan kakuatan kito di Ranah.
b. Kasiapan obyek-obyek wisata nan khas. Dalam panglihatan ambo, sijarah
Kerajaan Pagaruyuang, Perang Paderi, dan PDRI marupokan tigo titik kuat
wisata Minangkabau nan bisa kito manfaatkan.Dalam keadaan kini, lokasi
paristiwa-peristiwa itu alun siap dikunjungi para wisatawan. Sijarah Kerajaan
Pagaruyuang alun ado lai. Ambo alah mandorong taruih Dunsanak Taufik Thaib jo
Upik Raudha Thaib untuak mampacapek tabiknyo bahan-bahan tantang sijarah
Paraguruang ko. Ambo juo taruih mandorong para pelaku sijarah PDRI untuak
mambuek monumen mini dan museum mini di lokasi-lokasi basijarah saroman di
Halaban, Bangkinang, Alahan Panjang, atau di tampek-tampek lain. Bahkan kini
urang indak tahu dima sajo persisnyo lokasi tajadinyo Perang Paderi dan PDRI .
Manuruik pandapek ambo, lokasi-lokasi basejarah tu paralu kito rehab, leaflet
jo booklet kito cetak, dan guides kito pasiapkan, langkok jo pakaian zaman itu.
Tantang PDRI, panguruih Perhimpunan Kekerabatan Nusantara (PKN) alam
manyusun buku sijarah nan sabana langkok dan alah diluncuakan tahun 2003 di
Istana Wakil Presiden, Jakarta, nan bajudul Peranan Pemerintah Darurat
Republik Indonesia (PDRI) dalam Perang Kemerdekaan nan bisa dijadikan sabagai
salah satu referensi.
c. Mutu palayanan. Manganai soal palayanan ko ado contoh nan paralu
kito tiru. Di restoran Padang dakek Cipanas, Jawa Barat, di pintu kalua ado
tulisan gadang di ateh pintu nan babunyi kiro-kiro: Kalau Anda puas,
beritahukan pada orang lain. Kalau Anda tidak puas, beritahukan kepada kami.
Di ateh kapa tabang atau di hotel-hotel, biasonyo ado formulir nan bisa diisi
tantang baa pandapek panumpang taradok palayanan mereka, karano mereka
mamaralukan kesetiaan langganan. Langganan adalah raja baitu motto nan lazim.
Haruih kito akui, bahaso sabagian masyarakat kito masih alun maagiah paratian
nan sungguah-sungguah ka masalah ko.Alun malaksanakan pepatah muluik manih
kucindan murah kapado nan mamaralukan palayanan. Ado nan masiah acuah indak
acuah. Ado juo nan mambarunguik sajo. Iko rancak dipeloki.
d. Kurangnyo leaflets dan booklets tantang obyek wisata sarato guides nan
andal. Sudah barang tantu urang ingin tahu apo sijarah atau dongeng
tantang obyek wisata nan dikunjuanginyo. Kalau indak kan tangango-ngango sajo
baliau-baliau indak tantu a nan kaiojok. Kalau saran ambo tantang wisata
sejarah bisa ditarimo, mako paralu ado leaflet dan booklet tentang Perang
Paderi 1803-1837 dan tantang Pemerintah Darurat Republik Indonesia (PDRI)
Desember 1948-Juli 1949. Kalau bisa disadiokan toko buku mini nan manjua
buku-buku tantang Minangkabau. Soal buku ko kito punyo duo tokoh nan sabana
badedikasi, yaitu Ny Upi Tuti Sundari dan Bp Firdaus Oemar Dt Maradjo. Kalau
tantang guides yo paralu bana disiapkan elok-elok, karano mareka nan sacaro
langsuang manjalehkan ka para pangunjuang. Jadi haruih tahu bana jo apo nan
dijalehkannyo tu. Kalau paralu adokan kursus, dan agiah sertifikat. Untuak
kaparaluan khusus, ambo manyarankan adonyo senior guides dari nan gaek-gaek
palaku sejarah, nan tahu bana curito dan dongeng tantang suatu atau babarapo
obyek wisata. Kini misalnyo masih ado pelaku sejarah Perang Kemerdekaan
sawakatu PDRI dulu, nan masih bisa dimntakkan bantuan sasakali.
e. Koordinasi antaro sasamo lembaga pemerintahan. Iko adolah pinyakik
turunan Republik nan tasuo dima sajo. Antaro satu dinas jo dinas lain acok
bana indak saliang tahu apo nan ka dikarajokan. Masing-masiang jalan
surang-surang. Manuruik pandapek ambo, iko bisa diatasi jo mangoperasikan
samacam pusat informasi nan punyo hotline ka saluruh instansi pamarentah di
daerah. Untuak kalancaran, paralu ditunjuak surang piket nan manampuang
sagalo masalah nan bakambang dalam pelaksanaan wisata nan kadijadikan andalan
dalam mandorong maju ekonomi Sumatera Barat ko.
e. Katarlibatan DPRD tingkek Propinsi, Kabupaten, dan Kota. Sagalo usaho
mandorong wisata nan ka jadi andalan pambangunan Ranah ko jaleh mamaralukan
investasi. Sabagian ditangguang dek para penggemar wisata, sabagian dek usaha
wisata saparati hotel, biro perjalanan, PT KAI. Tapi nan basifat rehabilitasi
jo pambangunan infratstruktur tantu mamaraukan dukungan APBD nan manjadi
wewenang DPRD Propinsi, Kabupaten, dan Kota. Sampai kini ambo alun banyak bana
paratian dunsanak-dunsanak kito di limbago pawakilan rakyat tu ka masalah iko,
dan paralu bana kito dorong.
f. Tukang pangua, baiak tukang pangua swasta maupun tukang pangua
resmi. Masalah ko alah acok bana dikaluahkan dek urang awak nan pulang
kampuang. Indak jarang urang kapok untuak pulang kampuang, apolagi ado obyek
wisata lain nan labiah aman dan jo biaya nan samo. Singapura misalnyo. Karano
itu paralu bana pak Gub mandorong polisi untuk manangani para tukang pangua ko,
baiak sacaro preventif/mancagah maupun sacaro represif/mananggulangi.
Sampai disiko lah daulu. Beko panjang bana.
Wassalam,
Saafroedin Bahar.
---------------------------------
Don't be flakey. Get Yahoo! Mail for Mobile and
always stay connected to friends.
Sukseskan Pulang Basamo se Dunia, Juni 2008.
-----------------------------------------------------------------
Website: http://www.rantaunet.org
============================================================
UNTUK SELALU DIPERHATIKAN:
- Hapus footer dan bagian yang tidak perlu, jika melakukan reply.
- Posting email, DITOLAK atau DIMODERASI oleh system, jika:
1. Email ukuran besar dari >100KB.
2. Email dengan attachment.
3. Email dikirim untuk banyak penerima.
--------------------------------------------------------------
* Berhenti (unsubscribe), berhenti sementara (nomail) dan konfigurasi
keanggotaan, silahkan ke: http://rantaunet.org/palanta-setting
* Membaca dan Posting email lewat web, bisa melalui mirror mailing list di:
http://groups.yahoo.com/group/RantauNet/messages
http://groups.google.com/group/RantauNet?gvc=2
dengan mendaftarkan juga email anda disini dan kedua mirror diatas.
============================================================
