Nouv'ediziun da l'istorgia Janaiverin D'incuort es cumparü il nouv cudesch "Janaiverin" cun illustraziuns da Tanya Schatzmann e text da Fadrina Hofmann Estrada. Davo ün mez tschientiner daja uossa üna nouva versiun da l'istorgia da nanins engiadinaisa.
L'istorgia da nanins basa sün ün raquint da Maria Ritz edi dal 1953 illa seria "Chasa Paterna" da l'Uniun dals Grischs. Il raquint situà illa regiun da Lavin e Guarda descriva ün muond müravglius ingio cha nanins chavan or per far landroura las stailas, ingio chi regna ün dragun aint il lai da Macun ed ingio ch'üna muntanella veglia salva il s-chazi da las erbas chi guarischan. Perquai cha Janaiverin dvainta ferm amalà as fa il bazegner Pavradèl sün viadi fin in Val Tuoi per tscherchar l'unica masdina chi po güdar al pitschen nanin. Sün seis viadi guadogna Pavradèl ün ami e scuvrischa la secretezza dals nanins da Val Tuoi. "Dar inavant la richezza da la natüra e fantasia" Bundant ün mez tschientiner davo la prüm'ediziun da "L'istorgia da Janaiverin" daja uossa üna nouva versiun da l'istorgia tenor il concept e las illustraziuns da Tanya Schatzmann. "Duos gravidanzas d'elefant porta fingià cun mai quist proget d'ün cudesch da pops. Inspirada da l'istorgia fich variada da Maria Ritz es nada l'idea da quintar l'istorgia cun illustraziuns per pudair dar inavant la richezza da la natüra e da la fantasia eir ad uffants chi nu san amo leger", quinta Tanya Schatzmann. Fadrina Hofmann Estrada ha scrit l'istorgia amo üna jada pels uffants dad hozindi. Il cudesch es biling in vallader e tudais-ch. "Eu sun creschüda sü cull'istorgia da Janaiverin e n'ha plaschair da pudair preschantar uossa quist grondius raquint ad ün public plü vast", disch Fadrina Hofmann Estrada. Duos duonnas cun ün proget cumünaivel Tanya Schatzmann lavura sco graficra independenta a Lavin (www.grrrafica.ch). Illustraziuns fan part da sia lavur creativa. Las illustraziuns da "Janaiverin" sun disegns cun rispli culurats i'l stil d'aquarel. Ils disegns sun fats cun bler'amur pel detagl. Fadrina Hofmann Estrada es schurnalista ed autura. Cun Janaiverin fa ella seis prüm pass illa litteratura per uffants. La lingua e'l möd da raquintar sun gnüts adattats al temp dad hozindi. Nat es ün cudesch per uffants per gronds e pitschens, per giuven e vegl, per tgnair insembel sco la rascha. Pitschen insaj da lectüra: "Sü pro’ls vainchetrais lais da Macun, là esa ün cuvel da nanins. Mincha saira sortan ils homenins sulvadis e seguan a bazegner Pavradèl per ir a chavar or. Il plü giuven da la cumpagnia ha nom Janaiverin. Il pitschen nanin vain nomnà uschea pervi da seis ögls raduonds chi sumaglian a duos parmuoglias da janaiver madür". Janaiverin. Illustraziuns Tanya Schatzmann; Text: Fadrina Hofmann Estrada; Ediziun: Uniun dals Grischs. Lavin 2011. ISBN 978-3-033-0311-4 Adressa da contact: Tanya Schatzmann 7543 Lavin [email protected] www.janaiverin.ch 081 860 31 23 _______________________________________________ Damai che la POSTA RUMANTSCHA è ina rait averta per tuts, na ston las opiniuns dals auturs betg correspunder a la posiziun da la GiuRu! Per scriver a tut ils commembers da la glista scriva a: [email protected] www.posta.giuru.ch
