Stimadas damas, stimads signurs La Chanzlia federala a Berna tschertga in(a) translatur(a) rumantsch(a). Candidaturas pon vegnir inoltradas online fin ils 25 da november 2012. Cun amiaivels salids, Rico Valär
La Secziun da terminologia da la Chanzlia federala coordinescha la lavur terminologica da l’administraziun federala e contribuescha uschia a la qualitad unitara da l’activitad plurilingua da la Confederaziun. Per coordinar e planisar las translaziuns rumantschas entaifer l’administraziun federala e per accumpagnar la publicaziun da texts rumantschs tschertgain nus ina/in *Translatur(a) rumantsch(a) (60%)* Vus coordinais las incumbensas da translaziun en rumantsch che derivan da l’entira administraziun federala e planisais la translaziun da texts e da decrets impurtants dal dretg federal en collavuraziun cun la chanzlia chantunala dal Grischun. Vus cooperais cun il Center da las publicaziuns uffizialas (CPU) per actualisar e publitgar ils texts da lescha, Vus realisais autonomamain incumbensas da translaziun, Vus garantis la qualitad da texts da tut gener e da tut ils nivels da cumplexitad e Vus redigis er texts originals rumantschs (brevs, pleds, e.u.v.). Ultra da quai avais Vus la responsabladad per la terminologia rumantscha da l’administraziun federala e per sia publicaziun en l’internet. Nus tschertgain ina persuna che ha terminà in studi universitar en translaziun u en linguistica e che ha ina experientscha professiunala da plirs onns. Vus avais l’abilitad d’As famigliarisar svelt cun novas tematicas, essas ina persuna iniziativa, perseveranta, avais in talent organisatoric ed in senn per collavurar en in team. Vus essas da lingua materna rumantscha, savais bain rumantsch grischun ed avais in nivel excellent da tudestg (C1 tenor il Rom europeic cuminaivel da referenza per las linguas RECR). Giavischadas èn er fitg bunas enconuschientschas d’ina ulteriura lingua naziunala (nivel B1 tenor il RECR). Vus enconuschais MultiTrans u in auter program da translaziun usità ed essas d’accord da lavurar cun in tal. As registrai per plaschair fin ils 25 da november 2012 cun ina candidatura cumpletta sin il portal online da las plazzas tar la Confederaziun: www.stelle.admin.ch, sut Chanzlia federala ChF, http://direktlink.prospective.ch/?view=BC2B3F5F-1CC4-A8E3-2E9CBC24AACC7635&m1613_lk=1 . Per ulteriuras infurmaziuns stat gugent a disposiziun signur Adrian Wymann, schef da la Secziun da terminologia, tel. 031 323 72 31. Grad d’occupaziun: 60% Lieu da lavur: Berna Classa da salari: 23 (tenor la definiziun e classificaziun da la plazza) Termin d’annunzia: 25 da november 2012
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
