Ils Dis da litteratura envidan a maisa
Cun il motto “à la carte” envidan ils Dis da litteratura da Domat ad ina maisa plaina da prelecziuns, discussiuns, vernissaschas, musica, divertiment e buccadadinas gustusas. “bumperfatscha” - dals 8 als 10 da november 2013 a Domat en la sala Tircal.
L'emprim sautar ....
L’entschatta dals Dis da litteratura è fitg musicala: Il venderdi saira a Domat preschenta Corin Curschellas ensemen cun la gruppa Pflanzplätz ed Andry Gabriel quellas chanzuns (ed er anc autras). Da la partida quella saira èn medemamain las chantaduras Astrid Alexandre ed Ursina Giger ed il saxofonist Andri Steiner. E tgi che avess gia da sentir durant il concert in lev sfurmiclim en las chommas, po sautar suenter concert uschè ditg che la musica suna. Vegni era vus a far ina bella festa quella saira!
... e lura mangiar - cun la dunna perfetga!
Tranter auter è era da la partida in dals gronds tradiziunalists: "Il Gioder" - probablamain in dals pli enconuschents gourmands rumantschs. Il reschissur René Schnoz lascha renascher la figura litterara cun l’inscenaziun “Il Gioder reloaded” che vegn mussada sonda saira, ils 9 da november a las 20.30: il Gioder è in um bel e pulit e tuttina viva el anc sco single en l'hotel mamma. El è dischillusiunà da las dunnas dad ozendi: mo schlunzras e baterlunzas e da cuschinar n'hani gnanc idea. In bel di va el – sut pressiun da sia mamma – ora en il mund per tschertgar la dunna perfetga. Il criteri principal: nagin fastfood, betg sushi, gnanca spaghettis à la carbonara dastgi dar! Ella sto savair cuschinar la vaira spaisa grischuna uschè bain sco sia mamma! A la festa da S.Placi a Mustér capita lura insatge miraculus..... Tge precis? Quai vesais als Dis da litteratura.
Guardar e tadlar blers cudeschs novs
Sin il program dals Dis da litteratura èn natiralmain era preschentaziuns e prelecziuns dals pli novs cudeschs sco era differentas discussiuns litteraras. Tranter auter preschentan Arno Camenisch, Annatina Nay, Lothar Deplazes, Rico F. Valär e la giuvna Dominique Dosch lur pli novs cudeschs. La dumengia sa deditgescha ina gruppa da discussiun (Mevina Puorger, Walter Rosselli, Jon Bischoff e Valeria M. Badilatti) a differents projects cun las ovras dad Oscar Peer che ha festivà l’avrigl passà ses 85avel anniversari.
Sco finiziun dals Dis da litteratura ha però lieu la surdada dad in auter premi, numnadamain il Premi Terra Nova da la Fundaziun Schiller svizra. Peter Egloff vegn undrà per sias translaziuns tudestgas da las ovras principalas da Leo Tuor Giacumbert Nau, Onna Maria Tumera e Settembrini.
Ils 23avels Dis da litteratura, dals 8 als 10 da november 2013 en la halla Tircal a Domat. Detagls e program chattais sin www.litteraturarumantscha.ch. E... visitai era nossa pagina da facebook: https://www.facebook.com/DisDaLitteratura?fref=ts
www.litteraturarumantscha.ch. Quella porscha buns citats litterars..
... e per tgi che na po/sa/vul betg vegnir a Domat: Radiotelevisiun Svizra Rumantscha rapporta directamain da Domat e sin www.rtr.ch chattais vus lura ina dossier cun tuns e purtrets.
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
