Concert annual dall’Uniun da musica Sagogn Ei fuva inaga ina musica da mercenaris grischuns ella Hollandia dil 1597. Ils hollandes sesanflavan amiez l’uiara d’independenza culla Spagna ed ils musicants eran vegni recrutai el regiment hollandes. Il cumandant Stefan ha intimau ils musicants da batter igl inimitg, schend a mintgin: „STAI SI, DEFENDA!“ Aschia ein ils ver 35 musicants grischuns daventai perdetgas dalla battaglia da THYELLENE.
Era il muronz dalla Vreneli vom Guggisberg ei staus dalla partida a quella battaglia. Turnond silsuenter ella patria ha el enderschiu dalla mort da sia carezada. Contristaus da quella novitad ha il schuldau cumponiu ina canzun davart sia tresta sort e dau num a quella S’ISCH ÄBE-N-E MÖNSCH UF ÄRDE. Cunquei che nuot rentava el en sia patria eis el puspei serendius egl jester e morts leu pauc suenter. El ei vegnius satraus sil santeri dalla CROYDON CITADEL. La musica da schuldada ch’ei stada en Hollandia ha denton aunc passentau entginas aventuras ensemen, aschidadir ADVENTURES IN BRASS. Ina tracta per exempel la GOSPEL BRASS MACHINE – mo gliez ei in’autra historia. Insumma savessen ils musicants raquintar STORIE DI TUTTI I GIORNI. Mo ils 35 cumpogns partan IN SIEMI dad in’aventura ch’els han aunc buc fatg. Els vulan exnum emprender da saltar step tier il toc RIVERDANCE... Sche lur siemi va en vigur saveis Vus vegnir a mirar/tedlar sonda, ils 18-04-2015, allas 20.00 e la dumengia, ils 19-04-2015, allas 17.00 ella sala plurivalenta a Sagogn. Sonda suenter concert ei ustria. Da Vossa viseta selegra l’Uniun da musica Sagogn
UMS 2015.pdf
Description: Adobe PDF document
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
