Allas Romontschas ed als Romontschs ella Bassa Bugen lein nus presentar a Vus nies project "canorta romontscha". Nus essan ina gruppa da geniturs romontschs che vivan ella Bassa, pli exact a Turitg e contuorn. Nus tuts havein affons pigns ed ils biars da nus han ina partenaria ni in parternari che ei buca da lungatg mumma romontsch. Era sche nus vivin en in contuorn tudestg, resta il romontsch denton per nus in impurtont element da noss¹identitad ed igl ei nies giavisch da dar vinavon quei lungatg a nos affons. Per sustener ils affons d¹emprender romontsch era ordeifer igl ambient dalla famiglia essan nus sedecidi da promover ina canorta romontscha. Pil mument essan nus el stadi dall'evaluaziun da pusseivladads. Suenter las discussiuns inizialas lein nus persequitar las suandontas variantas: (i) Cumpletar ina canorta existenta cun ina gruppa romontscha. En quella varianta duess la canorta porscher per silmeins ina gruppa d¹affons dus tochen treis dis cun lungatg romontsch. Per ils auters dis vegness il lungatg ad esser il tudestg. (ii) Fundar ina canorta romontscha. Per saver persequitar quella varianta fuss ei necessari che rodund 30 affons vegnessen annunziai. Vitier fuss ei era necessari dad anflar avunda persunas qualificadas sco mussadras/mussaders da canorta. (iii) Termagliera romontscha: Mo sche las empremas duas variantas vegnan buc en damonda. La canorta duei esser situada el contuorn dalla staziun principala da Turitged ella duei esser aviarta per plidaders da tut ils idioms, seigi quei ord vesta dils affons ni dil persunal ella canorta. Il menaschi dalla canorta romontscha duei entscheiver l¹entschatta 2016. Pil mument ein ils geniturs dad otg affons interessai da separticipar ad in tal project. Per saver realisar ina dallas purschidas duvrein nus denton ina gruppa d'affons pli gronda ed era avunda persunal dil fatg. Nus vein contactau pliras organisaziuns a Turitg che han interess da sustener nies project. Per saver far il proxim pass e decider tgei varianta che nus savein persequitar lein nus fixar fin fenadur il diember d'affons ch¹ei dalla partida naven dall'entschatta. Nus encurin perquei dad ina vart famiglias da Turitg e contuorn che vulan dar a lur affons pigns la pusseivladad supplementara da viver il romontsch ella veta quotidiana, da l¹autra vart persunal dil fatg da lieunga romontscha per la canorta. Nus lein perquei envidar tuttas persunas interessadas da prender si contact cun nus, per exempel sut [email protected] <mailto:[email protected]> , ni da vegnir a nossa proxima sentupada ils 2 da fenadur allas 20:00 uras el caffé Gloria, Josefstrasse 59, 8005 Turitg. Culs megliers salids Peter Vesti Linus Cantieni Christian Casanova Livio Cathomen Remo Pfister
Remo Pfister | Mobile +41 79 961 40 46 | Haldenstrasse 43 | 8045 Zürich | [email protected]
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
