*La Cuntrabanda – Passagis e barrieras dil lungatg en il focus dals 25avels Dis da litteratura!*
*La cuntrabanda da lungatg è misteriusa. U betg? Ils participants e las participantas dils Dis da litteratura van sin la tschertga da las barrieras e dals cunfins dal rumantsch. Entras discussiunsvivas, preschentaziuns e prelecziuns duai la cuntrabanda vegnir scuvrida – sin via tut legala. * La 25avla ediziun dals Dis da litteratura ha lieu a Domat dals 6-8 da november 2015. L’ediziun da quest onn sa deditgescha a la *cuntrabanda*, als passagis e las barrieras sin via d'ina lingua a l'autra. Tranter auter retschaivan ils Dis da litteratura ad *Angelika Overath *cun sias poesias rumantschas, ad *Angelica Biert e Mevina Puorger *cun ina versiun auditiv da „La müdada“ e cun raquints da Schimun Vonmoos, a *Denise Mützenberg e Luzius Keller* cun lur Antologias, a *Tresa Rüthers-Seeli* ed a *Mario Pult *cun sia ediziun sur da Tista Murk. Natiralmain na dastga la discussiun litterara betg mancar. Ella vegn ad avair lieu en furma usitada. Il venderdis sera procuran las participantas ed ils participants dal *POETRY SLAM da CUNTRABANDA* per divertiment. ArtistAs dal pled rumantsch e giasts svizzers prelegian lur istorgias, poesias, dialogs, sgnoccas e scenettas - gia scrittas u improvisadas live on stage. A la fin elegia l'auditori il victur u la victura cun applaus. Il premi è: in vinars rumantsch! Enstagl da la concurrenza da scriver Premi Term Bel preschentan ils DDL quest onn in *gieu da scriver en differents lungatgs, *moderà da Flurin Caviezel. La sonda saira vulain nus festegiar 25 onns Dis da litteratura! Suenter ina discussiun davart ils differents aspects da la cuntrabanda cun experts eminents èn tuts envidads a nossa festa cun musica per saut da la band *Quintinò*. In ulteriur punct culminant è il cabaret musical-litterar «Teufelsbrücken» da *Jürg Kienberger* e *Claudia Carigiet*, preschentà en collavuraziun cun la chasa da la translaziun Looren. *Ils 25avels Dis da litteratura, dals 6 als 8 da november 2015 en la halla polivalenta Tircal a Domat. Detagls e program (gleiti) sin * www.litteraturarumantscha.ch*.* -- Giuventetgna Rumantscha Chascha postala 312 7002 Cuira www.giuru.ch [email protected]
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
