Saira da rock rumantsch en il Helsinki a Turitg, venderdi ils 8 d’avrigl 2016, cun Pascal Gamboni ed ils L_MAR.
Il Klub Helsinki sper la staziun Hardbrücke ed il Prime Tower è ina prim’adressa turitgaisa per la musica basica, qua ha Sophie Hunger lantschà sia carriera, qua han gia sunà ils Carrousel ed ils Aeronauts, qua ha Chris Wiesendanger fatg jazz e Manuel Stahlberger ses cabaret musical. E qua ha damai lieu per l’emprima giada ina sairada da rock rumantsch, e quai cun Pascal Gamboni ed ils L_MAR.
El fetschia Lo-Fi-Rock en moda rumantscha, quai vul quasi dir in rock bass temprà. Quai scriva Radio SRF Virus davart Pascal Gamboni, noss prim-chantautur tuatschin. Remartgabel è sco Pascal ha reducì sur ils onns sia furma artistica davent dal format da band cumplexa giu vers l’entertainer solitari, dond adina dapli post a sia poesia laconica e precisa, a ses accords setgs e spargnus, a sia vusch chauda e carmalanta. «La ventira» numna el ses ultim album, ses setavel gia. Tribunas si e giu per la Svizra al beneventan cun fervur, gea, perfin a New York ha Pascal Gamboni gia mess pe musical. In veritabel ambassadur rumantsch.
Avant trent’onns era Elmar Deflorin (59) la vusch centrala dals hardrockers sursilvans Hades. Oz suna el battaria en la gruppa turitgaisa-rumantscha L_MAR, surlaschond il chant principal a ses figl Marius (30). Ina gruppa trans-generaziunala damai, che cumpiglia ultra da quai il ghitarrist Thomas Gloor (59), il bassist Benjamin Tanner (41) ed il segund ghitarrist Benedetto Vigne (65). Las chanzuns, prevalentamain rumantschas, fladan in’aria da rock modern, portan però tranter las lingias in rest da la famusa encreschadetgna grischuna. Pia ina bella cumbinaziun per expats rumantschs.
(prevendita: http://helsinkiklub.ch)
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
