Ils 26avels Dis da litteratura tschertgan l¹essenza dal scriver Sut il motto «rispli sin pupi» han ils Dis da litteratura lieu ils 4-6 da november 2016 sco usità a Domat. Il simpel maletg dad in palpiri alv ed in rispli visualisescha ils utensils pli impurtants da l¹auturA e dat occasiun da discurrer davart l¹essenza dal scriver. Co chatta l¹idea la via sin il palpiri? Tge capita sche il palpiri alv resta alv? Il comité d¹organisaziun sa legra sin discussiuns fritgaivlas.
Tranter auter retschaivan ils Dis da litteratura Leo Tuor cun ses nov cudesch, Annetta Ganzoni e Bettina Vital che preschentan la prosa dad Andri Peer, Clà Riatsch e Göri Klainguti cun lur critica litterara, Benedetto Vigne e ses diari giapunais, Arno Camenisch e ses giast, Arnold Spescha e Gianna Olinda Cadonau cun novas poesias. Natiralmain na dastga la discussiun litterara betg mancar. Ella vegn ad avair lieu en furma usitada. La sonda saira vegn quest onn ad esser fitg divertenta cun in quiz litterar ch¹è ina sfida per artist ed auditori. In ulteriur punct culminant è la concurrenza da scriver PREMI TERM BEL che ha lieu mintga segund onn. Las cundiziuns èn: il text sto esser rumantsch, nunpublitgà, en furma da prosa e dad ina lunghezza maximala da trais paginas (ca. 9000 segns). Inoltrar ils texts enfin ils 16 d¹avust 2016 per posta ni per email a: Sereina Nay Milchgasse 40 5000 Aarau [email protected] Las tschintg finalistas e finalists preschentan lur text durant ils Dis da litteratura a la giuria d¹experts ed al public preschent. Sper la premia da mintgamai 500.- francs per mintga finalistA datti 1000.- francs per il premi da la giuria e 500.- francs per il premi dal public. Il program detaglià suonda il settember 2016. Dapi quest onn è la cumparsa mediala e visuala dals Dis da litteratura nova: la nova pagina d¹internet <www.disdalitteratura.ch> è infurmativa ed attractiva a medem temp. Ensemen cun il nov logo (mira sut) duai ella rinforzar la preschientscha dal festival en il public. Natiralmain infurmain nus era sin Facebook <https://www.facebook.com/DisDaLitteratura/> surda ils Dis da litteratura. Il comité d'organisaziun giavischa ina bella e sulegliva stad. A revair. Maurus Candrian Heinrichstrasse 210 8005 Zürich [email protected] <mailto:[email protected]> www.disdalitteratura.ch <http://www.disdalitteratura.ch>
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
