Concert da la gruppa el mar a l’Ustria Staziun a Cumpadials, sonda ils 13 da schaner 2018, a las 20.30 h.
La gruppa da rock el mar exista en il coc gia dapi precis ventg onns, ella è vegnida fundada a Turitg dal ghitarrist Thomas Gloor e dal vocalist Elmar Deflorin, l’anteriur timunader dals renumads hardrockers sursilvans Hades. La vusch principala ha Elmar en il fratemp surlaschà a ses figl Marius Deflorin, barattond il microfon cun la battaria. Dapi plirs onns da la partida è er il bassist Benjamin Tanner, fertant che Benedetto Vigne, il rockadur pionier surmiran, è entrà avant quatter onns en la gruppa sco segund ghitarrist.
Da curt han el mar publiitgà lur primalbum «Temps d’esser libers». Sin la cuverta da l’album ha in utschè rut cun violenza il giatter da la cabgia ed è sgulà davent. In dessegn da l’artista Pia Valär che illustrescha fitg bain il tun da questa gruppa da rock turitgaisa-rumantscha: Sias chanzuns seguan ritems bain structurads, ma las armunias laschan resentir inquala dissonanza e las melodias fladan bramas da partir, da sa deliberar. Ma ins auda er segns da la vegli’ encreschadetgna muntognarda, purtads d’in rock bain ragischà e tuttina «indie», e d’ina poesia detg colurada.
Qua aud’ins – sper la ballada principala cun ses cler appell da libertad – ina blagheria da «gion ferm» (Physical Man), ina desditga a l’urbanissem surfatg (New York), in lament da tuschander (Fai tgei ti vul). U lura dus u trais vers d’amur ed adina puspè fins muments visiunars. La plipart chantada per rumantsch sursilvan, danor trais excepziuns englaisas ed ina perfin per tudestg – tut però cun ina tempra marcanta plaina da soul.
el mar – ina gruppa multigeneraziunala, poliglotta e variostilistica - d’udir live exclusiv a l’Ustria Staziun a Cumpadials, sonda ils 13 da schaner 2018, a las 20.30 h.
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
