I na va betg pli ditg … fin ils DIS DA LITTERATURA 2018!
lls 28avels Dis da litteratura han il motto TRANTER LINGIAS ed èn dals 2 fin ils 4 da november 2018 en la halla Tircal a Domat. Els sa deditgeschan al pled u meglier ditg al spazi tranter ils pleds. Tge è tranter (las) lingias? Tge capita en quest lieu? Igl è il spazi nua che l’autura e l’autur protegian la tensiun, la melodia, il messadi zuppà, forsa era critica e tabus. La litteratura viva da tals spazis. Els èn in segund plaun da communicaziun. La lectura ed il lectur vegnan animads da reflectar, d’interpretar e d’udir trantertuns. Per exempel cun agid da metafras, allusiuns ed ironia. È l’essenza, la vaira muntada forsa be da chattar tranter lingias? Suenter in onn pausa èsi quest onn puspè uschè lunsch: il Premi Term Bel turna als Dis da litteratura 2018. Il venderdi vegn il festival lantschà cun cabaret poetic e politic. Il duo schön&gut cun Anna-Katharina Rickert e Ralf Schlatter preschenta ses nov program MARY. Ils purtaders dal «Schweizer Kleinkunstpreis 2017» fascineschan cun satira spiertusa e fantasia senza cunfins. Silsuenter datti litteratura sin empustaziun: Era tar la segunda ediziun da la Shot-Story-Night pon ins retrair in’istorgia cunter in sitg. L’autura u l’autur vegn a la maisa, fa ina prelecziun exclusiva e suenter vegn fatg viva ensemen. I dat shots cun e senza alcohol. La sonda stat surtut il Premi Term Bel en il center. Ils texts nominads vegnan prelegids da Marietta Jemmi e lura discussiunads d’ina giuria. La surdada dal premi è la dumengia suentermezdi. En il Tavulin litterar discutan Martìn Camenisch e Clà Riatsch davart novs cudeschs e prendan sut la marella era quai che stat scrit tranter las lingias. La saira ha lieu ina gronda tschaina da gala Daletgs tranter lingias. Tranter las tratgas datti musica, cabaret e spectacul tranter artistas ed artists en cumbinaziuns surprendentas. Cun: Seraina Sidler-Tall & Simon Benz, Flurin Caviezel & Sara-Bigna Janett, Astrid Alexandre & Riikka Läser ed il clown Roberto Chiriatti. La dumengia sa ferma la turnea «Sin il viv!» per il giubileum da 25 onns da l’emissiun Impuls dal Radio Rumantsch per la 7avla ed ultima giada als Dis da litteratura. En il salun da coiffeur Haaratelier prelegian differents auturs lur texts. Gianna Olinda Cadonau e Prisca Agustoni dattan in insatg da lur poesias ch’ellas fan tranter linguas. En il rom dal project Poethreesome dal festival da litteratura Babel han ellas translatà vicendaivlamain lur ovras en differentas linguas. Vernissaschas, preschentaziuns e prelecziuns: Als Dis da litteratura datti era quest onn differentas vernissaschas, preschentaziuns e prelecziuns. Vernissaschas: Benedetto Vigne prelegia or da ses primroman Ils ventganov da settember. In roman plain tensiun, magia e misteri che raquinta d’in um sin viadi precipità e dals turbigls d’in pubertar. La victura dal Premi Term Bel 2016 Asa S. Hendry dat in insatg or da ses emprim cudesch Sin lautget. Ina giuvna ed in autur s’entaupan ed exploreschan lur cunfins en quell’amicizia nunusitada. Prelecziuns: Rico Tambornino prelegia or da ses nov cudesch Il scutinem dallas olmas. En quel descriva l’autur in schabetg commovent da l’onn 1847 che ha chaschunà l’ultim truament da mort en il Grischun. Martìn Camenisch explitgescha il context istoric. Paula Casutt-Vincenz prelegia or da ses emprim roman L’umbriva dil temps / Der Wandel der Zeit. La prelecziun vegn accumpagnada dal musicist Christoph Senn. Il Grischun talian Giovanni Maranta vul far pli enconuschent la poetessa ladina Luisa Famos ed ha perquai translatà quellas en talian. Ensemen cun Annina Sedláček prelegia el intginas. Preschentaziuns: Olga Prevost-Bazzell preschenta ensemen cun Dumenic Andry intginas da sias istorgias, reminiscenzas ed anecdotas ch’èn cumparidas en l’ediziun annuala da la UdG La Chasa Paterna. Flavia Hobi e Benedetto Vigne preschentan La Litteratura 37: Meds e messadis, il nov numer da la revista annuala da la ULR. Hermina Sgier prelegia intgins insatgs ordlonder. Rut Plouda prelegia ses text or da la revista Viceversa Litteratura 12, la revista che promova la litteratura en las quatter linguas naziunalas. L’ediziun da quest onn sa deditgescha al tema (Senza) vargunga. David Flepp raquinta or dal cudesch La cigna. La paraula veglia sursilvana che Gabriela Holderegger Pajarola ha raquintà da nov. Ultra da quai preschenta Mevina Puorger sia nova publicaziun da editionmevinapuorger, quest onn: Scuvierta da l’orma – ina reediziun da quatter novellas da Selina Chönz. Il program detaglià dals Dis da litteratura 2018 chattais sin nossa pagina www.disdalitteratura.ch <http://www.disdalitteratura.ch/> Cun cordials salids Il comité dals Dis da litteratura
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
