La mar el Cinema sil Plaz - Glion, sonda ils 8 da fevrer 2020, 20.15 h.
«Dil marinari che mai va» – Corin Curschellas e sias Rodas interpreteschan, ensemen cun Tumasch è ed Andi Schnoz, veglias e novas canzuns da mar. Denteren legia Benedetto Vigne texts romontschs da bartgas, splagias e monsters marins.
A caschun dils davos Dis da Litteratura a Domat il november vargau ha ina collascha da canzuns da mar e texts maritims giu fatg detg furore. Uss vegn quella «revue» musicala-litterara exclusivamein a far staziun a Glion, el Cinema sil Plaz, sonda sera, ils 8 da fevrer (allas 20.15 h).
Il titel dalla producziun ei «Dal mariner chi mai nu va», tenor ina lingia ord la canzun satirica dad Arnold Rauch Il mariner. Canzuns da mar stattan pia el center da quella «revue». Sper la renumada chanson da Charles Trenet La mer resunan cheu er aunc il vegl schlagher Seeman (deine Heimat ist das Meer) da Lolita, il famus Yellow Submarine dils Beatles (per surmiran!) ni la nunemblideivla Paloma, tenor la translaziun romontscha dad Arturo Casanova.
Quella part musicala vegn interpretada d’ina specia da «super-group» romontscha che consista dallas Rodas da Corin Curschellas, dil cantautur Tumasch è e dil ghitarrist da jazz Andi Schnoz. Tier las Rodas sunan la cellista Barbara Gisler e l’accordeonista Patricia Draeger, ina cumbinaziun ch’empermetta l’encarschadetgna dueivla tier las canzuns da mar.
Denter las canzuns prelegia Benedetto Vigne mintgamai cuorts texts litterars romontschs che han da far culla mar. Sper exempels actuals aud’ins cheu er enquala truvaglia divertenta orda tschentaners daditg vargai. Aschia in rapport naval dil marinari sutsilvan Johannes Barandun dil 1864, nua ch’ins entaupa meerräubers, wallfischs e fernspiegals. Ei deva pia marinaris romontschs ch’ein propi stai sin mar.
Glion, Cinema sil Plaz, sonda ils 8 da fevrer 2020, 20.15 h.
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
