Tgi che sa rumantsch, po mussar quai! Il passaport da las linguas da fide datti uss era per rumantsch
Vulais Vus mussar a Vus sezza/sez ed als auters che Vus avais emprendì rumantsch? U èn cumpetenzas linguisticas en rumantsch d'avantatg per Vossa professiun resp. Voss studi? A partir d'immediat pudais Vus examinar e laschar certifitgar duas giadas ad onn Vossas enconuschientschas dal rumantsch. Ils 20 da november han lieu ils emprims examens da rumantsch. Per incumbensa dal Secretariat fide organisescha la Lia Rumantscha examens en tut ils tschintg idioms sco er en rumantsch grischun. Las datas dals examens chattais Vus sin la pagina-web da fide<https://fide-service.ch/de/sprachnachweise/rumantsch> e sin la pagina-web da curs da la Lia Rumantscha<https://www.curs.ch/fide>. Ils examens pon ins far sin ils nivels da cumpetenza linguistics A1 en scrit/A2 a bucca ed A2 en scrit/B1 a bucca. Er ulteriuras cumbinaziuns èn pussaivlas. L'examen dura en tut circa in'ura. El consista d'ina part a bucca (discurs da 15 minutas cun in'experta/in expert) e d'ina part en scrit (30 fin 45 minutas). En il focus èn situaziuns dal mintgadi. Tgi che absolva cun success l'examen survegn il passaport da las linguas. Quel vegn emess per incumbensa dal Secretariat da stadi per la migraziun e vegn renconuschì sco diplom linguistic er en proceduras dal dretg da dimora e dal dretg da burgais. Ils examens da rumantsch fan part dals diploms linguistics dal sistem da fide che s'orientescha al Rom europeic communabel da referenza per las linguas. Nus ans legrain da Vossas annunzias! Lia Rumantscha per nossa lingua Via da la Plessur 47 | 7001 Cuira telefon +41 (0)81 258 32 22 | e-mail: [email protected]<mailto:[email protected]> www.liarumantscha.ch<http://www.liarumantscha.ch/>
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
