Inscunters en museums durant l’advent Da temps da retratga e d’isolaziun pon museums esser lieus, nua ch’umans s’inscuntran. L’acziun «TiM – Tandem en il museum» pussibilitescha tals inscunters. Il temp d’advent lantscha TiM ensemen cun la Lia Rumantscha dis da fufragnar en ils museums grischuns. Da la partida èn il Museum Kirchner Tavau, il Museum d’art dal Grischun Cuira e la Casa d’Angel a Lumbrein.
Occurrenzas d’advent TiM en il Grischun: 19-12-2021, 14.00 – 16.00, Kirchner Museum Tavau 22-12-2021, 15.30 – 17.00, Museum d’art dal Grischun Cuira 29-12-2021, 14.30 – 17.30, Casa d’Angel a Lumbrein -> Tut las occurrenzas èn sin: www.tim-tam.ch<http://www.tim-tam.ch> Passa 100 guidas e guids da TiM s’engaschan en tut la Svizra ed accumpognan persunas interessadas en il museum. En dus inventan els in’istorgia davart in’ovra d’art u in object exponì e s’emprendan uschia d’enconuscher. Las istorgias che sa furman en quest rom pon ins publitgar sin www.mi-s.ch/rm<http://www.mi-s.ch/rm> en il «Musée imaginaire Suisse» virtual. Là chatt’ins gia bundant 1’500 istorgias, e la collecziun vegn cumplettada mintga di cun novas. Uschia han era Jon Domenic Parolini, schef dal departament da cultura dal Grischun, e Gianna Olinda Cadonau, manadra Cultura da la Lia Rumantscha, sa laschà inspirar en il Museum d’art dal Grischun ed han inventà ensemen in’istorgia: Il misteri da la heinza Cur cha’l fain d’eira miss süllas heinzas vaivna ün pêr dis peida per la tschercha. La prüma not d’eira da laschar in pos las heinzas. Illa seguonda not eschna its da heinza a heinza, ans vain sfuschignà suottaint, aint illa chasina da fain sün trais chommas. No vain tscherchà sül fuond, però eir aint il fain. Be ün’unica jada til vaina chattà. I d’eira la terza not. Marchet, quel paur curius dal bain il plü süsom, ha chatschà alch steccal aint il mantun da fain. La heinza guardaiv’oura sco ün guerrier d’ün reginam magic camuflà cun fain. Forsa savaiva eir Marchet. Ma eir no savaivan. Minchatant as zoppa qualchosa suot il fain. Sco dit, i d’eira la terza not cha’l fain d’eira süllas heinzas. No vain examinà üna davo tschella. Uossa restaiva be amo quella cul steccal. No til vain vis subit. Sül fuond, immez il cuvel da fain d’eira ün öv. El glüschaiva ün pa ed alch as muantaiva dadaintvart. No til vain guardà sainza dir pled. Ed uschè ha cumanzà noss’aventüra. Ovra d’art: Dorota Gaweda ed Eglé Kulbokaité, «Hexanol (I), 2019», atschal, fain Nus giavischain a tuttas e tuts in bel temp d’advent cun blers inscunters creativs! Lia Rumantscha per nossa lingua Via da la Plessur 47 | 7001 Cuira telefon +41 (0)81 258 32 22 | e-mail: [email protected]<mailto:[email protected]> www.liarumantscha.ch<http://www.liarumantscha.ch/>
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
