[Ein Bild, das Text, Person enthält. Automatisch generierte Beschreibung]
«TiM – Tandem en il museum» ils 20 da mars al Di mundial da l'istorgia 14.00–17.00 A chaschun dal Di mundial da l'istorgia ils 20 da mars van tandems da TiM a la tschertga da las pli bellas istorgias en numerus museums da l'entira Svizra. «TiM – Tandem en il museum» e la Lia Rumantscha envidan dad er inventar istorgias rumantschas. Bundant 30 museums en tut la Svizra sa participeschan ils 20 da mars 2022 tranter las 14.00 e las 17.00 al Di mundial da l'istorgia. Las guidas ed ils guids da TiM animeschan visitadras e visitaders da sa laschar inspirar dad in object u maletg e dad inventar latiers ina curta istorgia. En il chantun Grischun èn da la partida il Museum retic Cuira, il Museum d'art dal Grischun Cuira, il Museum Kirchner Tavau e la Fundaziun Nairs Scuol. En tscherts museums spetgan guidas e guids rumantschs per inventar istorgias en tut ils idioms. Tgi ch'è preschent en tge museum ves'ins sin la pagina da TiM tim-tam.ch<https://www.tim-tam.ch/rm/cun_tim_en_il_museum>. Gianna Olinda Cadonau, guida da TiM e collavuratura da la Lia Rumantscha, vegn p.ex. ad esser en la Fundaziun Nairs a Scuol. Tut las istorgias vegnan publitgadas sin la plattafurma d'istorgias Musée imaginaire Suisse mi-s.ch<https://www.mi-s.ch/rm/home>. Uschia resulta ina rait spessa d'istorgias. Il Di mundial da l'istorgia ha plinavant lieu ina concurrenza: las auturas ed ils auturs da las «meglras» istorgias gudognan in pass dals museums svizzers. Nus ans legrain da bleras istorgias rumantschas e giavischain buns inscunters creativs! Lia Rumantscha per nossa lingua Via da la Plessur 47 | 7001 Cuira telefon: +41 (0)81 258 32 22 | e-mail: [email protected]<mailto:[email protected]> www.liarumantscha.ch<http://www.liarumantscha.ch/>
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
