Il festival Neolatin. LitteraturA Nairs ha lieu ils 18 e 19 da mars 2023 en la Fundaziun Nairs, Scuol.
Neolatin.LitteraturA Nairs sa deditgescha a la poesia contemporana neolatina cun prelecziuns plurilinguas, experiments da scriver e da translatar, ina vernissascha da cudesch, in discurs da podi ed ina performance poetica! Tranter auter sa scuntra l’enfant terrible da la litteratura catalana Pol Guasch cun la liricra putera che viva medemamain a Barcelona Jessica Zuan. Forsa la pli enconuschenta poetessa rumantscha Leta Semadeni sa scuntra cun Yolanda Castaño, in dals nums ils pli enconuschents e pli internaziunals da la lirica gallega. L’autura tessinaisa che viva en Brasilia Prisca Agustoni vegn a collavurar cun la scriptura versada engiadinaisa Romana Ganzoni, la giuvna scriptura ladina Nadia Rungger discuta cun il romanist e poet Dumenic Andry ed il poet portugais Carlos Coelho, che viva a Scuol entra en in dialog cun la poetessa Gianna Olinda Cadonau ch’è era creschida si a Scuol. Tuts premiads, tuts pronts per far experiments, tuts plurilings! Lur poesias èn la basa per ina performance plurilingua e multimediala dad Astrid Alexandre, Selina Beghetto, Myriam Gurini e Sara Francesca Herman…ulteriuras infurmaziuns dal program curatà da Bettina Vital e da Flurina Badel suondan. LitteraturA Nairs dat impuls ed è ina plattafurma critica per discussiunar litteratura rumantscha actuala. http://nairs.ch
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
