Stimedas lecturas e stimos lectuors da la posta rumantscha L’Uniun dals Grischs invida cordielmaing al terz Poetry Slam Engiadinais! El ho lö prossem venderdi, als 22 settember illa Chesa Planta a Samedan. La bar (chi serva eir il nouvissim drink – Engiadina Mule) es avierta a partir da las 19:30 ed a las 20:00 cumainza il slam. Nus ans allegrains fich süls ‘slams’ da Lorenzo Polin, Sara Francesca Hermann, Jürg Gautschi, Gianna Duschletta e sülla moderaziun da Romana Ganzoni!
Poetry Slams sun occurrenzas, inua cha persunas prelegian lur texts ad ün publicum. Ils texts paun esser poesias, istorgias, que po dafatta ir in direcziun da „rap"… que es listess, ma minchün ho be 6 minuts per sia performance. Il publicum decida chi chi guadagna e quella persuna survain tradiziunelmaing üna butiglia Whiskey, tar nus Engiadinais saro que però üna buna butiglia iva (sponsoriseda da Mia Iva<https://miaiva.ch/>). In generel sun Poetry Slams sairedas fich pachificas e divertaivlas chi promouvan in prüma lingia la cumpagnia vi da la bar ed in nos cas natürelmaing eir la lingua rumauntscha. Scha vulais tadler cu cha que tuna, schi chattais cò ün pêr contribuziuns dal prüm slam Poetry SlamEngiadinais (udg.ch)<https://www.udg.ch/occurrenzas/poetry-slam-engiadinais> A salüda La suprastanza da l’Uniun dals Grischs
_______________________________________________ Simpel, bun, rumantsch e gratuit: la Posta Rumantscha. Infurmaziuns sin www.posta.giuru.ch
