Amanat PNM Tengku Hasan M. Di Tiro Wali Neugara Atjèh Bak Peu-ingat Uroë Ulang Thôn Atjeh Meurdéhka Njang keu 30 4 Désèmbèr 1976-4 Désèmbèr 2006 Keu bandum bansa Atjèh, Assalamu’alaikum, Uroë njoë 4 Désèmbèr 2006, nakeuëh uroë rajek bansa Atjèh bansigom dônja njang keu-30 thôn. Uroë njoë nakeuëh sabôh uroë sutji keu-peurdjuangan bansa-teuh untôk tatjapai tjita-tjita geutanjoë. Lhèë plôh thôn kon watèë njang paneuk dalam sabôh peurdjuangan bansa. Le that keumadjuan njang ka tateumeung seulama njan, meutapi that meuhai pangkai njang harôih tabajeuë, meuplôh ribèë bansa-teuh jang ka sjahid dan ka teu-énanja dan hana seunipat keu-padum le hareuta njang ka binasa. Ukeuë njoë mantóng lé lom keureubeuën njang harôih tapeuteubiët untôk tapeu-punòh tjita-tjitateuh. Sjukô Alhamdulillah, dengòn beureukat dô’a ureuëng-ureuëng njang ka sjahid, geutanjoë banmandum ka tateumeung pijôh siat dalam masa damè, tapi beudjeuët keu-sabôh peu-ingat bagi geutanjoë banmandum, peurdjandjian MoU Helsinki njoë kon aché nibak peurdjuangan geutanjoë, meutapi mantóng panjang djalan njang harôih ta langkah untôk tapeuseulamat dan tapeupunòh banmandum asoë peurdjandjian MoU Helsinki lagèë jang ka meutanda djaroë bak 15 Agustus 2005. Bak uroë njoë, ulôn peu-ingat bak banmandum geutanjoë, bahwa ukeuë njoë geutanjoë akan tatamóng dalam prang jang leubèh hèbat lôm, njakni prang politék. Dari seubabnjan geutanjoë harôih keumah tapeudjak buët njoë deungòn hana tuwo keu tradisi-tradisi keuneubah éndatu, jakni seumangat dan meu-seutija sabé keudroë-droëteuh, disiplin seureuta sematéh ateuëh sabôh-saboh peuneutôh dan keubidjakan dalam dumpeuë peukara yang meuhubông deungòn keupeunténgan geutanjoë Atjèh. Wassalam, Hudép beusaré, mate beusadjan Sikrèk gaphan, saboh keureunda. Tengku Hasan M. Di Tiro Wali Neugara Atjèh.
<<attachment: image002.jpg>>
