Untuk tersayang Mpok Atun yang bahenol, Sudah lebih dari 3 tahun aye tidak menyurati Mpok Atun, aye harap Mpok Atun kagak marah ke aye yah, maklum 3 tahun ini aye dibuat sibuk banget sama ini dan ntu, mirip dengan pemerentahan Indonesia sekarang yang kerja nya sibuk ini dan sibuk ntu melulu. Kadang aye jadi kepikiran bahwa aye ajah 3 tahun an sibuk ini dan ntu, tanpa hasil memadai, apalagi dengan pemerentahan yah ?
Mpok Atun kan kerja jadi te ka we di kerajaan jiran sonoh, sekarang ini bisa dibilang ntu kerajaan udah keblinger dan mandang rendah banget negara dimana aye tinggal dan mati nantinya. Suwer semakin kemari kerajaan ntu semakin kurang ajar ajah, nganggap ni negara jadi kecil dan gak ditakutin lagi. Sampe seenak jidatnya ntu polisi diraja maen gebuk kagak pake konpirmasi segala macem, udah gitu menta maapnya pake di kredit beberapa ari, kurang ajar pan ?, emang sih raja kita demennya alon alon melulu, udah jelas warganya kena gebuk, eh malah ntu raja bilang nya sabar doangan, belegug pan ?, coba ntu raja aye nyang duduk in, udah pasti begitu dapet inpo ada rakyat aye kena gebuk tanpa alasan, langsung aye usir diplomat nomor satu nya tanpa pesan ba bi bu be bo... Bila ntu kerajaan jiran balik ngomel, aye suruh semua rakyat di kerajaan ini meluruk kesono gak pakai senjata segala macem, cukup pake sampan, kapal, tanker oli, rangsumnya bawa tenda, kompor gas nyang tangki gasnya isi 3 kilo, indomie, beras ramos ama pandan wangi seorang sekwintal, masak iya tibatan 50 juta orang gak bisa kekirim dalam tempo sesingkat singkatnya....disonoh ntu rakyat kita suruh ngawal satu warga kerajaan satu orang, anak kicit mah jangan di itung dah kasian belon ngerti masalah. Bila mereka maen dor langsung kita adu in ke mahkamah international, karena udah melanggar HAM, wong kita orang kesono rame rame mau namu ama numpang molor masak iya di jelegurin ama senjata tajem. Kita tinggal dah di sonoh barang sebulan dua bulan, nyang namanya namu kita emang kudu sopan, jadi gak perlu masuk rumah rumah lah, tidur ditenda ama deket kali ajah, udah gitu plototin lagi , jadi tiap ari kerjanya cuma mlototin masyarakat sonoh, syukur syukur ntu masyarakat jadi keder sendiri dan kalo ada yang sampe gantung diri segala macem kita mah ngelayat ajah, ikut bela sungkawa gitu. Eh Mpok Atun, nyang namanya wasit karate internasional ajah kena gebuk pulisi diraja, pigimana ama te ka i yah ?, siapa yang bisa nge lapor in ?, dan kudu lapor kemana ?, Mpok kalu kena co'el keipikiran ngelapor juga gak ?, ada undang undang pelecehan seksual kagak ?, apa cukup di kepret ama tali beha Mpok Atun ?, jangan jangan malah te ka we yang ngelapor ke pulisi diraja juga dikerjain lagi ama ntu pulisi belutukutuk, tulung kasih ingpo ke sini yah kalo ada nyang nyolak nyolek para te ka we, biar ntar kita kita bales colak colek orang sonoh nyang tinggal di sini, kita menta bantuan para tukang copet senen buat nyolek, sekalian sekali nyolek ha pe satu kesambet, ongkos jalan ketutup dah. Eh Mpok Atun, bentaran lagi Puasa, sekarang Ruwah emang udah mau abis, jadi jangan lupa siap siap jaga kesehatan yah, maklum puasa ni kali cuaca nya panas, biarpun bulan nya udah berbuntut ber ber, ujan mah tetep ajah ogah singgah, jadi kayak nyang sengaja ngasih coba an, jadi kudu sabar banget yah.... Udahan dulu yah, aye mau nongton sinetron Cinta Fitri, asyik dongengnya ntu sinetron, jadi keingetan nongton pelem india nyang suka diputer di layar tancep, biarin digigit nyamuk, tetep ajah mata nongton ama sekali sekali jelalatan ngeliatan nyang mengkilap mengkilap. Bay bay beibeh, aye pasti sambung lagi ntar yah, titip salam ama nyak en babeh juga yah, aye si cina culun baru sekarang ngasih kabar lagi. Dadah. sur [Non-text portions of this message have been removed] Post message: [EMAIL PROTECTED] Subscribe : [EMAIL PROTECTED] Unsubscribe : [EMAIL PROTECTED] List owner : [EMAIL PROTECTED] Homepage : http://proletar.8m.com/ Yahoo! Groups Links <*> To visit your group on the web, go to: http://groups.yahoo.com/group/proletar/ <*> Your email settings: Individual Email | Traditional <*> To change settings online go to: http://groups.yahoo.com/group/proletar/join (Yahoo! ID required) <*> To change settings via email: mailto:[EMAIL PROTECTED] mailto:[EMAIL PROTECTED] <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/
