Contrengan ini aye oret khusus buat Mpok Atun nyang bahenol, nyang ngendon jadi TKW di negeri Jiran, aye nyontreng bukan asal nyontreng, ada banyak nyontrengan yang akan aye oret, jadi aye pake in nomor supaya jadi nyeri kayak buku Ko Phing Ho, isi oretan sepesial cuman nyambung sama per te ka we an/sosial ama politik nyang kebeneran puteran pemilu lima taonan dimulaen. Jadi Mpok Atun di sonoh minimal bisa ngerti versi dari aye cina culun.
Politik. Supaya Mpok punya persamaan gambaran, aye kudu jelasin politik dimata aye, buat aye politik ntu sama dengan ngobrol ngaler ngidul gak ada awal dan gak ada akhir, ntu inti politik nyang aye ngerti, mengenai kenapa jadi kayak gitu karena aye tau nya nyang namanya politikus gak pernah otak atik mikser buat bikin bolu, nyang ada adu ngomong kayak ayam nyang lagi mau di adu, siapa nyang taringnya tajem dipasangin, dah menang langsung kong korongok bangga sambil ngibasin sayapnya, bagian nyang keok lari blingsatan mirip hidung belang di udag satpol pe pe di warung remang remang, ntar nongol lagi begitu dah lupa kena sepak. Mpok Atun, 2009 ini pemilihan umum udah dimulai lagi, banyak banget deh parte yang ngikut pemilu ini kali, ada 34 biji, aye mah dari dulu sebelum jadi banteng gendut, udah demen ama banteng ceking, gak ngerti deh kenape ntu parte Pe De I Pe ngikutin aye melulu, ketika aye kurus, ntu lambang banteng ikutan ceking sekarang aye gendut dah makmur, eh ntu bantengnya ikutan gendut. Di taon 2004 aye gesit blingsatan sebar bendera ama jelasin jagonya Presiden Megawati, ampe ngejelasin kenapa bolu aye gak ketabok ama ketanggor lagi krisis ekonomi nyang aye gak ngerti, aye mah suka bengong nongton di te pe ada ekonomi mikro ama makro, nyang aye tau mikropon buat karaokean ama makro tempat belanja orang beduit. Aye ampe rela ngeluarin duit nyang bikin bini cemedut segala macem, lha aye mah mikirnya gampang ajah, cuman punya waktu 2 taon lebih dikit Mbak Mega udah bisa bikin adem, apalagi ditambah 5 taon ?. Aye juga ngerti ntu waktu di 2004 Presiden nyang aye dukung bakalan keok, soalnya udah keliling kesana kesini siwir siwir nyang mao nyoblos kebanyakan bukan ke Mbak Megawati. Supaya mPok Atun ngerti, politik di Indonesia ini selain kudu bisa adu ngomong, juga kudu ngeliat ke Orang Pinter, mereka ntu ngeramal bukan asal ngeramal, padahal aye gak percaya ama gak ngerti, koq bisa gitu yah tukang ngeramal tau menang kalahnya, padahal nyang milih rakyat bukannya tukang ramal ama tukang adu ngomong. Orat oret orang pinter, semenjak aye nimbrung di politik praktis mao gak mao aye jadi kelibet ama nyang namanya orang pinter, ada orang pinter bergelar haji anu dan anu, kyai anu ama kyai anu, ampe ada seorang orang pinter nyang bikin aye beneran bengong, lha gimana gak bengong ada nyang ngomong dia ntu sebenarnya Tan Malaka nyang lagi nyamar, dan nyang namanya Tan Malaka ntu isinya gak pernah mati, aye percaya gak percaya juga sih, lah orang pinter ini biasa dipanggil Mama Alit, asli cowok, tinggalnya didalam kampung daerah Cariu Jonggol sonoh. Dia beneran deh jago, begitu nyrocos ntu sejarah Indonesia kayaknya udah kena patri di kepalanya, padahal penampilan di liat selewatan gak lebih kayak babah nyang suka jualan beras di Kramat Jati sonoh, nyang bikin beda dia bisa cerita panjang lebar isi dari buku Manilog, sama satu lagi nyang judul bukunya aye suka lupa melulu. Kan aneh ada orang tinggal di kampung bisa ngerti banget sama soal ketatanegaraan nyang emang bikin rumek kepala, ama bisa tau sejarah Indonesia mulai dari jaman kerajaan, pokoknya diadu ama guru sejarah di tingkat pakultas mah boleh diadu deh. Dia bisa cerita asal usul Soekarno mulaen dari dalem perut, nyang dia bilang emang udah di siap in buat nanti Indonesia Merdeka, sampe ke masalah per pe ka i an segala macem, jangan nanya tentang kerajaan kerajaan deh, dibolak balik dia ngerti banget, malah ampe ke taon segala macem. Belon lama ini bikin geger lagi, soalnya ada keturunan Chiang Kai Sek sengaja dateng ke dia, gak ngerti kenapa ntu keturunan ampe dateng ke dia, nyang jelas utusan Obama sih, kedatengan ntu tamu beneran bikin kalang kabut ponggawa Indonesia, gak boleh di liput ama per tepe an segala macem, mana ketemunya diatas gunung lagi, gak ada listrik ampe sengaja di pasang kabel listrik segala macem, eh pas udah nyala ntu listrik kudu dicabut, pokoknya bikin belingsatan deh, emang sih pertemuannya kagak di kandang orang pinter. Beberapa temen aye nyang dulu aktip banget di Pe De I Pe, semenjak kenal dia jadi ogah lagi ikut aktip di parte, lebih suka jadi sopir ama tukang kelalang keliling kesonoh kesinih, maklum namanya juga anak mudah ketemu ginian terang ajah jadi kesengsem, aku ajah nyang udah jelas raja bolu bisa kesengsem apalagi nyang biasa biasa, bagus juga sih, soalnya seudah ketemu ama orang pinter ini, mendadak wawasan teman aye jadi pada berobah, mendadak bisa ngerti apa ntu elmu ketatanegaraan, gak kayak sebelonnya, masuk parteujungnya jadi anggota De Pe Er, padahal elmunya pas pas an banget, keokngomong morang maring buntutnya dilayanin morang maring tangan nyang jalan, sekarang keok ngomong cuman diganda ketawa, aneh kan Mpok Atun ?. Pemilu sekarang mau di mulaen, aye punya temen mau maju jadi anggota De Pe Er De, sewaktu dia naek jadi ketua pengurus kecamatan dia bangganya bukan maen, apalagi ketika ada perentah kudu "road show" dia langsung setiap ari make pakaian rapih, komplit topi, jaket ampe pin segala macem di pasang di ntu baju, udah gitu dia kelalang keliling deh ama motornya. Aye ampe beneran malu banget, koq ada orang bloon ginih bisa naek pangkat ngurus parte setingkat kecamatan ?, sue nya ntu orang teman aye nyang udah gak mau aye ajak ngobrol lagi, abisnya ambisi banget sih, palingan aye kudu rada cape ngejelasin ke teman temin di daerah aye deh supaya jangan nyoblos dia, bikin malu beneran deh. Moga moga sih gak bisa jadi Caleg dah, emang sih kasian juga dia udah nge gadang gadang kiri kanan, mesem sini mesem sonoh, pasang muka kayak nyang udah duduk di Senayang sonoh, mengenai daleman ilmu sendiri mana di pikirin, lha asal nya juga jaga kuburan.............mimpi ama mingpi kan cuman beda seuir. Dah dulu yah Mpok Atun, aye mau ngelamun jorok dulu jadi ketua umum parte jadi jadi an. sur. ( 15 juli 2008 ) ------------------------------------ Post message: [EMAIL PROTECTED] Subscribe : [EMAIL PROTECTED] Unsubscribe : [EMAIL PROTECTED] List owner : [EMAIL PROTECTED] Homepage : http://proletar.8m.com/Yahoo! Groups Links <*> To visit your group on the web, go to: http://groups.yahoo.com/group/proletar/ <*> Your email settings: Individual Email | Traditional <*> To change settings online go to: http://groups.yahoo.com/group/proletar/join (Yahoo! ID required) <*> To change settings via email: mailto:[EMAIL PROTECTED] mailto:[EMAIL PROTECTED] <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/
