Waalaikumsalam w.w.
Tuan Bangsawan
Abdurrauf rajo rang Makah,
naiak tahta duo tingkek
dahulu kato nan basitinah
kudian kato basicapek.
iyo basicapekkan pulo bakumbalikan kapado Tuan
sapanjang bana nan katangah di Tuan cakotu, indak tarago dulang, kok diulang sinan juo katibono, Insyaallah. Bungka bulek tarajo banyang, indak kam dipereng lai, alah tasanda pado batang, alah sangkuk ditiang tinggi. alah sangaik sungguah tibo ditampaikno.
limbak nan dari pado itu bak kato asa nan mulo, bukan tolah ambo basiasek, tapi sungguah lai batanyo, alhamdulillah, kok tanyo alah bajawek, mintak nan alah tuan bari, alah sanang hati kami
sungguah baitu bana, supayo rantak nak sadaram, lenggang nak sapai, kirono kito basamo dapek manampaikkan "imbauan" DATUAK ko ditampaik nan sabaikno, karano rasono kito nan basamo juolah nan ka maanjuang tinggi, maamba gadang "imbauan" datuak ko, (kok mambaco surek Tuan, ambo raso Tuan lah samo didalam)
Tantangan gala nan ka dibarikan, kirono lai indak mamakai imbauan DATUAK doh, dek baitu, iyo alah sanang pulo hati ambo..
namun dibaliak pado itu, kirono Tuan daek pulo manyigi-nyigi, kok lailah kirono gala MANGGKUTO RAJO jo MANGKUTO ALAM ko manjadi gala salah satu gala dari suku nan ado dikampuang,
ba a dek baitu, karano ambo mampunyo kawan nan bagala MANGKUTO jo RAJO MANGKUTO.
sakadar itulah nan ambo sampaikan, untuang-untung lai paguno, calak-lak kaganti asah, kecek urang.go eh.
Wassalmu'alaikum w.w.
Sutan Bandaro Labiah.
== Undangan Tuan ambo tarimo, kok indak ado aral malintang, Insyaallah ampo hadiri, alah kasanang hati Tuan.
[EMAIL PROTECTED] wrote:
Ass,wr,wb.
Sutan Bandaro Labiah nan dihimbau jo sidang RN nan ambo hormati, maaf lah
ambo kalau tadorong, memang postingan ambo tadi tu ditujukan ka intern
kami di IKM Pusri Palembang ([EMAIL PROTECTED]), dek karano ado
unsur informasi dan baritanyo mako ambo CC kan ka palanta kito ko.
Di IKM Pusri tu salah saurang anggotanyo ado nan dipanggia dek kawan2
Datuak Jarebe Tebe namo panggilannyo, iko hanyo namo panggilan, bukan gala
subana gala, tapi gala dilingkuang saparmainan. Baa mangko di sabuik
Jarebe (JRB), karano dunsanak tu karajo di Departemen Jasa Rancang Bangun
(JRB). Ado pulo nan dipanggia Sutan Paliaro, dek karano beliau karajo di
Departemen Pemeliharaan (Maintenance Departemen), ado Sutan Mukasuik, dek
karano beliau karajo di Dept.Perencanaan Perusahaan, ado pulo nan
dipanggia Angku Guru Kapalo, karano beliau manjadi Kapalo PP&SDM
(Departemen Pendidikan Pelatihan & Sumber Daya Manusia) dan banyak nan
lain.
Jadi sakali lai ambo tegaskan Datuak Jarebe Tebeh tu anyo hayalan, maaf
kok ado suku atau kaum nan mamakai namo nan sarupo.
Mengenai pemberian gala ka Urang nomor satu di Pemprov Sumsel dan Pemkot
Palembang ko adolah marupokan gala kehormatan, yaitu gala nan indak
memerlukan kesepakatan suku dari suatu kaum atau nagari (contoh gala nan
untuak dilakekkan ka Yth : Uda Taufik Kiemas nan katurunan Batusangka tu).
Iko hanyo penghormatan awak urang Minang di Sumsel dan Palembang kapado
kaduo urang nan bisa untuak dijadikan tampek balinduang kok hari paneh,
tampek bataduh kok hari hujan, maklumlah awak marantau dinagari beliau.
Iyo juo kecek urang tuo2 kito :
Karatau madang dihulu
Babuah babungo balun
Marantau bujang daulu
Di rumah baguno balun
Nak duo pantun sajalan,
Kok jadi pai ka pakan
Ikan bali balanak bali
Ikan panjang bali daulu
Kok jadi pai bajalan
Sanak cari dunsanak cari
Induak samang cari daulu
Jadi dengan semangat petatah-petitih inilah mako kami BMKM Sumsel
Palembang memberikan gala kehormatan dengan harapan beliau2 bersedia
menjadi Mamak dan induak samang bagi kami urang Minang nan marantau di
Palembang ko.
Soal urang nan ampek jinih (4 jenis), itu hanya kesepakatan kami sajo
dalam pemberian gala ko yaitu : Alim Ulamo, Cadiak Pandai, Niniak Mamak
dan Bundo Kanduang sudah sepakat. Gala nan dipakai indak berakar kesuatu
kaum atau suku nan ado di Minang, dicari gala nan tapek untuak tu. Seperti
untuak Gubernur dan Walikota periode sebelumnyo dilakekkan gala Sutan
Mangkuto Rajo dan Sutan Mangkuto Alam. Jadi bukan nagari atau suku nan
mambari gala tu, tapi adolah kesepakatan urang nan ampek jinih nan ambo
sabuikan tadi.
Sakian sajo penjelasan dari ambo, maaf kok ado nan indak berkenan dihati,
ka Tuhan ambo mintak ampun. Kok ado nan paralu ambo jalehkan lai atau ado
nan kaditanyokan tentang BMKM Sumsel ko, kalau bisa ambo jawek akan ambo
jawek, kalau tidak, akan ambo bao ka rapek Pengurus BMKM Sumsel.
Tan Bandaro Labiah, lah sanang dihati, ambo sangajo maundang Tuan jo warga
RN lainnyo untuak hadir pado acara HBH tersebut.
Wassalam,
Mulyadi St.Bangsawan
>
>
__________
Yahoo! Messenger - Communicate instantly..."Ping" your friends today! Download Messenger Now
_______________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/listinfo/rantau-net _______________________________________________
