Assalamu'alaikum.w.w.
.... kito sambuang nan kapatang agak sajamang pulo....
Fanatik ka agamo ndak baa, tapi fanatik ka pemuka
agama indak buliah. Karano kalau nyo salah baa ?.
Fanatik ka pemimpin indak buliah, batuhankan ka
pemimpin apo lai.
Baa mangko dianggap urang yahudi tu batuhankan ka
pendeta nyo ?.
Kato mereka, mereka indak batuhankan pendeta mereka
doh. Tapi apo nan dikecekkan pendeta mereka, mereka
ikuik, Tuhan ditinggakannyo. Iko bermakna mereka sudah
batuhankan pendeta mereka.
Ambo ulang sakali lai buliah tuan-tuan paham,
buliah di padang mahsyar nantik kalau ditanyo,
alah disampaikan ka sidang RN, bisa dijawek "alah".
Kalau kito liek, yahudi ko pendeta-pendetanyo
tu manuka hukum Allah swt. Diambiaknyo hukum nyo
surang ditinggakannyo hukum Taurat. Tuhan berfirman
urang-urang ko maambiak hukum pendetanyo maninggakan
hukum Taurat. Aratinyo mereka lah batuhankan ka
pendeta-pendeta nyo.
Kalau awak takah itu pulo, samo lah tu. Maambiak
hukum lain manulak hukum Allah swt., samonyo tu.
Kito ambiak hukum kolonial kito campakkan hukum
Allah, awak lah batuhankan ka kaum kolonial tu pulo.
Pemimpin mambuek hukum surang, batinggakan hukum
Allah swt. awak lah batuhankan ka para pemimpin
pulo. Kok ditanyo dalam kubua nantik (soal-soal
kubua ko kan lah bocor...:) )
"Maa imaamuka ?"
Aa nan kadijawek ?. Al-Qur'ani imami ?... ndak bisa
dek awak indak mamacik hukum Tuhan tu.
Tu baa lai, "Al-Undang-Undang dasar al-45".... :)
tantu bantuak itu .....:)
Ndak ka tibo panggado Munka Nakia ka awak ?....hiiii
Kito baliak-baliak.
Jadi jalan nabi-nabi, jalan sarupo nan ditampuah dek
para nabi tu lah nan ka awak ikuik. Dari nabi Adam as.
sampai nabi Muhammad saw. Nan kito ambiak adolah
syari’at nabi Muhammad saw. Syari’at urang dulu-dulu
indak dipakai lai do. Tapi Tauhid samo dari nabi Adam
sampai nabi Muhammad samo sajo.
Kok lai taikuik-i dek awak mako awak ummat yang
berbahagia dek karano awak nan paliang dulu masuak
sarugo baru ummat-umaat lain. Hebatlah awak....
Kalau masuak ... :)
Nabi manyabuik,
"Tuubaa liman ra-ani wa-aamanabi,
tsumma tuuba tsumma tuuba tsumma tuubaa liman
aamanabi walam yaraani".
Berbahagialah orang-orang yang melihat aku dan beriman
akan daku. Kemudian berbahagialah, berbahagialah, dan
berbahagialah orang-orang yang beriman dengan aku tapi
tidak melihat akan daku.
Nabi sabuik berbahagia tu sakali untuak urang-urang
nan
beriman ka baliau dan maliek baliau, tapi Nabi sabuik
berbahagialah tu tigo kali untuak urang-urang nan
indak
maliek baliau tapi beriman ka baliau. Awak memang
indak maliek Nabi. Tapi lai baiman awak ka nabi ?.
Lai baturuik jalan nabi ?.
Nabi sampai manyabuik, "Aku rindu kepada saudara ku"
Kata sahabat, "Kami bukan saudaramu yaa rasulullah ?"
Kata Nabi "Kalian sahabatku"
Kata sahabat "Lalu siapa saudaramu yaa rasulullah"
Kata nabi "Orang yang beriman denganku tapi tak
melihatku"
Awak diujuang sakali tapi nabi rindu ka awak.
Kok lai ikuik baliau, kok lai jalan iko nan kito
mintak siang jo malam, jalan para nabi.
Nabi ibadahnyo tinggi, lai katakao ?.
Kalau kito ndak dapek mambuek 100%, 30 % pun jadilah.
Nabi jago tiok-tiok malam sumbayang. Tagak jo duduak,
rukuak jo sujuik nabi samo panjangnyo. Kalau tagak
20 minik rukuak 20 minik, sujuik 20 minik pulo.
Sampai Aisyah ra. mamiciak kaki Nabi ....
Takuik-takuik
kalau-kalau nabi lah wafat sadang sujuik tu dek ndak
bangkik-bangkik.
Bangkak kaki nabi karano itulah. Katiko nabi baumua 60
tahun, sudah uzur,makonyo sumbayang sarakaat tagak
sarakaat duduak.
Awak ko dapek jago 2 kali saminggu pun jadilah. Ndak
bisa sakali saminggu, ndak juo bisa sabulan sakali,
ndak juo bisa sataun sakali, ndak bisa juo, ...tu
kadipangaan ?....ndak usahlah ....... :)
Sabananya awak bisa jago, tapi dek maleh. Kalau lai
baniek bisa sajo nyo tu. Pangkanyo namuah ndak
namuah,
kalau lai namuah bisa sajo nyo.
Jadi dari segi ibadat sajo jauah tingga awak dek nabi.
Itupun nabi nan lah banyak baibadah tu mangecekkan
"Masih sedikit amalanku".
Iko nan aneh. Nabi nan lah dijamin masuak sarugo tu
banyak amalannyo, awak nan alun jaleh masuak sarugo
tu lai, saketek amalan. Aneh. Baa awak sabananyo ?
Dalam terjemahan Hamka Nabi mangatokan ka Aisyah ra.,
katiko ditanyo baa mako banyak-banyak bana amalan tu
dek lah dijamin masuak sarugo, "Afala akuunu abdan
syakuura, Apakah aku tidak mau menjadi seorang hamba
yang pandai berterima kasih".
Nabi kok ado nan mamintak indak pernah mambiakan
tangan urang tu kosong. Kok tibo diawak, ndak usah
jauah-jauah kawan-kawan nan marokok sajolah misalnyo,
dimintak urang sakali, baagiah, duo kali baagiah,
"...ooo silakan ...silakan..", nan katigo ?.
"eh...ko rokok den ko mah" ...:)
Nabi, dapek mamaafkan urang nan babuek macam-macam
ka inyo. Suatu hari, surang yahudi nampak nabi sadang
duduak basanda. Nyo naiak ka ateh dek yahudi tu nyo
baok batu gadang ka maimpok nabi. Kok kanai lah jaleh
mati. Nyo impok dek yahudi tu dari ateh, tapi batu tu
jatuah malayang-layang bantuak daun, nabi ndak kanai
do. Heran yahudi tu nyo bae tajun, batu tu alun sampai
inyo lah sampai dulu di bawah.
"Maafkan aku yaa rasulallah", Kecek nabi "Ndak baa do,
angkau dimaafkan". Baitu nabi.
Cubo tibo diawak,
"..Ndeeh kok kanai den tadi tu aa, ndak mati den dek
ang tu yoo ?, kama utak aang", paaang kanai lampang
paja. "Aaa mukasuik ang sabananyo haaah ?".
Nabi indak,...indak bitu do, dimaafkan yahudi tu.
Iko jalan nan ka dituruik, lai katakao diawak ?.
Jan kan ikuik nabi, ikuik sahabat sajo alun tantu
kito mampu lai doh.
Sahabat nan mulie ado 4, Abu bakar maningga umua 63
tahun, Umar maningga umua 63 tahun, Usman maningga
umua 80 tahun, Ali maningga umua 63 atau 64 tahun.
Umua mereka 60-an sajo. Dan memang ummat Muhamaad
60-an sajo. Itu sababnyo awak.
Lahia diazankan dek urang,
7 hari diagiah namo,
7 tahun disuruah sumbayang,
10 tahun dirotan kalau ndak sumbayang
15 tahun kito baligh,
40 tahun awakpun matang,
56 tahun kito pensiun
60 tahun.... Standby .....aaa bitu ....:)
.... Ndeh... bisuak kito sambuang lai dih...
Wassalam
St. Sinaro
__________________________________
Do you Yahoo!?
Yahoo! Small Business $15K Web Design Giveaway
http://promotions.yahoo.com/design_giveaway/
____________________________________________________
Berhenti/mengganti konfigurasi keanggotaan anda, silahkan ke:
http://groups.or.id/mailman/options/rantau-net
____________________________________________________
