Lapau Mak Kari * "Barek sa Pikua, Ringan sa Jinjiang." By padangekspres Selasa, 04-Mei-2004, 05:19:21 WIB
DARI jauah, Mak Kari nan pulang dari musajik mancaliakkonco-konconyo lah duduak di palanta lapau. Ado Mak Labai jo Mak Pudin. Pudin sadang bacurito, sambia duduak tagak. Kadang-kadang tangannyo manunjuak-nunjuak ka ateh, bantuak urang kampanye. Mak Kari sairiang jo Pak Mardjohan, M. Pd, kapalo dinas Pendidikan Nasional kota Padang manuju Lapau. Dari halaman, ulah Mak Pudin diparatikan dek Mak Kari jo Pak Djohan. Lah hampia dakek pintu, tibo-tibo tandanga bunyi "Prraaakk..!". Urang nan di Lapau tagalenjek, baitu pulo Mak Kari jo Pak Mardjohan. Tangan Mak Pudin nan laweh baradu jo meja nan sadang tahidang jo kue sarato kopi angek. Tutuik kopi mak Labai talambuang, galehnyo hampia tagolek. Untuang inyo pandeka. Sacapek kilek tangannyo tibo di galeh kopi nan tingga satangah. "Heeiiit, kopi awak pulo nan taniayo ko mah Pudin, kopi den alun ba-baia lai doh," kecek Mak Labai mampagarahan si Pudin nan sadang tarabo. Si Mira jo tamu nan tadi sato takajuik, tagalak sengeang mandanga Mak Labai mampagarahan konco palangkinnyo. Pudin indak ma-acuahkan garah Labai tadi, inyo taruih sajo mancaracau; "Kalau bantuak iko guru mandidik, bilo nagari awak ka maju.Alah den bayia pulo pitih kursus nan diadokan dek sakolah sarato gurunyo. Ba ratuih ribu kepeang den kaluakan. Nan nilai anak den bantuak iko juo, angko ampek sajo indak tabuak dek inyo doh. Indak bakarunciangan nampak dek den." Mak Kari nan paham sangaik kakobeh Pudin, manggauik kaplonyo nan indak gata, Pak Djohan baitu pulo. "Assalaamu 'Alaikum..," salam Pak Djohan sambia duduak di hadok-an Pudin nan sadang bakacak pinggang. Mancaliak nan masuak urang nan jarang ka Lapau, Pudin malu surang. Sambia duduak dijaweknyo salam tamu tadi. "Kopi ciek Mira, aia putiah sagaleh..," sorak Pak Djohan. "Iyo Pak..," jawek si Mira dari dapua. Untuak manutuik malu si Pudin, Mak Labai capek manyalo, "Iko pucuak dicinto, ulam tibo namonyo ko. Tantang sikola jo pendidikan nan dipagunjiangkan, Pak Kapalo dinas nan tibo. Katangahan lah ka baliau Pudin, jan mangecek di balakang sajo," saru Labai ka si Pudin. "Lai tandanga dek Ambo nan dikecek-an Mak Pudin tadi..," sambuik Pak Djohan. "Jadi, ba-a nan sabananyo Pak..?" tanyo Pudin nan sadang malu-malu tangguang "Sajak tahun lampau, Ujian Akhir Nasional atau UAN iyo agak sarik dek sikola untuak luluih. Supayo bisa luluih, nilai rato-ratonyo harus di ateh angko anam. Sudah tu, indak buliah pulo ado angko ampek," baitu Pak Djohan manjalehan ka urang di Lapau. "Kalau itu satuju sajo awak tu nyo Pak..," sambuik Mak Labai. "Tapi, dari rapor bayangan nan ditarimo kapatang ko, labiah saparo anak silkola tu nan indak cukuik saraik untuak luluih," sambuangnyo. "Haa.., kan iyo kecek den tu. Aratinyo bana, guru nan indak salasai ma-aja-i anak muriknyo. Indak murik sajo nan pandia," solo Mak Pudin maraso di ateh angin. Mak Kari nan mandanga sajo dari tadi, sato sakaki, "Indak bisa disalahkan ka guru sajo doh. Awak harus pulo mangontrol anak awak. Jan disarahkan ka guru sajo. Apolai kini banyak guru nan mangarajokan proyek di lua. Tantu indak takamehan dek inyo doh." "Apolai guru lah sato pulo manggaleh buku jo baju saragam," sorong si Mira dari balakang. "Husss, jago muluik saketek. Jan dipaliharo virus di bibia nan cipeh tu," kato Mak Kari manyapo kamanakannyo nan mantiak. Manuruik Pak Djohan, pendidikan anak sikola, sarupo jo baban barek singguluang batu. Harus dijujuang basamo-samo. Manuruik Mak Kari baitu pulo, kini alah ado Komite Sikola nan manjadi wakia masyarakaik untuak mambantu sikola supayo mutu sarato kualitas pendidikan di nagari awak samakin maju. Usah bapikia pulo untuak mandapek untuang untuak awak surang. Malu basamo nan ka dihadang, dek karano nagari awak lah tanamo dari dulu banyak malahiakan urang cadiak candokio. Angek talingo awak mandanga kampuang nan tacinto ko dipagunjiangan dek urang sa-Indonesia, kalau banyak anak sikola awak nan indak luluih Ujian Akhir Nasional bisuak ko. Usah dicari sia nan salah, elok dipikia bana-bana. Suruikan hati ka nan elok. Baliak-an pangana ka nan bana. Kito hadok-i basamo-samo. Pasang lah tibo di kuduak, jujuang lah tibo di kapalo. Urak lah selo, ayunkan lah langkah, kami mairiangkan di balakang. Hep..taa..! (viveri yudi) Padang Ekspres Online : http://www.padangekspres.com/ Versi online: http://www.padangekspres.com/mod.php?mod=publisher&op=viewarticle&artid=2613 6 ____________________________________________________ Berhenti/mengganti konfigurasi keanggotaan anda, silahkan ke: http://groups.or.id/mailman/options/rantau-net ____________________________________________________
