|
Iko manyambuang curito sabalunnyo tantang Kelompok Pemusik
Jalanan (KPJ) Padang. Ari Sabtu kapatangko ambo batamu jo salah sorang manejer
hotel di Padang. Bacuritokanlah pakaro acara maundang pamusik jalanan tu ka
baliau. Langkok jo alasan dan sikap panonton.
Mungkin dek tertarik, baliau manyauik; cubolah buek proposal
tantang itu. Ambo indak bisa bajanji, tapi awak cubo untuk mangecek jo GM kami,
kok lai mungkin baliau namuah manyadiokan tampek di hotel untuk KPJ
tu".
Jawek ambo kutiko tu, jadi.
Alah kini baru takana; baraso limo baleh tahun ko ambo hanyo
manjadi pangamat kesenian, dan alun pernah manjadi manajer atau promotor.
Binguanglah ambo mamikiakan bantuak jo isi proposal nan dimintak urang tu. Nan
tapikia, tantu iko karajo profesional. Baa kontrak? Bara biasonyo kelompok musik
dibayia untuak main di hotel? Apo fasilitas nan biasonyo disadiokan hotel, dan
apo pulo nan paralu dipanuhi dek pengisi acara. Bara lamo jam main?
Rang lapau, iyo lah bagalau masalahko di kapalo ambo. Kok lai
dunsanak nan bapangalaman jo masalah ko, tolong banalah kami baa.
Kok indak dijawek tantangan tu, takana pulo diambo kawan-kawan
di KPJ tu. Bilo pulo inyo ka dapek kasempatan lai?
Pikiran ambo katiko tu saketek se nyo. Ado tampek mangkal
anak-anak KPJ tu memainkan karyanyo surang. Kalau tampek tatap lah ado, dan lamo
lambek urang tahu, nan katuju buliah datang ka tampek tu. Tapi kok bantuak kini
sajo taruih, kok ado sanak di rantau nan nak mandanga, ka ma kadicari KPJ tu?
Mungkin tapaso awak mancari urang-urang mudo bagitar-gitar di tapi jalan.
Jan-jan salah alamat pulo. Jadi, kiro-kiro bantua urang bagurau di Pasa Banto
dulu. Kok taragak bagurau awak, pai ka sinan.
Tapi kini, di hotel di tawarkan urang. Baa aka?
Mokasih.
Ivan
|
