LAPORAN LANGSUNG DARI ARENA PERTEMUAN ANGGOTA RANTAUNET JABOTABEK, KAMIS, 18 MEI 2000
Rapek Biaso nan Lua Biaso
Bogor Baru, Rantaunet.com
Duo laki-laki separoh baya duduak sadang maota di sebuah rumah di Bogor Baru. Tidak
lamo sasudah tu, sabuah oto Kijang baranti di muko rumah tu. Ampek urang anak mudo
turun dari oto dan duo laki-laki tadi yang indak lain dan indak bukan Mak Bandaro jo
Uda Erwin langsuang tagak dari kurisi angeknyo manyambuik ampek urang anak mudo tadi.
"Ikono nan ditunggu," kato Mak Bandaro manyonsong dan manyalami ampek urang anak mudo
nan kamudian dikenal dengan Miko, Maifil, Rahyussalim dan Yenni. Tibo-tibo langik
Bogor sekitar pukua 11.50 WIB tu langsuang bandarang. Nampak bana cewang di langik
katiko itu. Apo lai Nyonya Mak Bandaro langsuang manyuguahkan minumannyo. "Iko buatan
urang Koto Nan Ompek Payo Kumbuah, ko," kato nyonya Mak Bandaro mambasoi rakan-rakan
nan datang dari Jakarta ko untuak minum aie sirup nan dicampua jo sari buah-buahan.
"Jadi juo patamuan kito nampaknyo, " tambah uda Erwin nan tingganyo samo-samo di Bogor
jo Mak Bandaro nan dulu terkenal jo Montir Lauik Jawa ko.
Sasudah baso jo basi, akhianyo masuaklah ka ruang tangah. Masiang-masing nan datang
lah tibo. Ota jo bicaro lah mulai dikatangahkan, sakali-sakali di salo pulo jo galak
ketek dan galak gadangnyo. Samantaro itu kue jo minuman lah jadi sasaran pulo untuak
pangincuang jo palamak ota.
Singkeknyo patamuan anggota Rantaunet Sejabotabek II ko batua-batua sumarak. Baa
kaindak dek sanak. Mungkin iko bukan sajo patamuan biaso, tapi bisa pulo di bilang lua
biaso. Nan datang bukan sajo dari Jabotabek dan bukan pulo dari babarapo kampuang di
Minangkabau ruponyo. Tapi babarapo perusahaan mendukuang patamuanko.
Perusahaan Oracle nan terkenal dengan tekhnologi perangkatlunak databasenyo langsuang
mautus Direktur Teknologinyo nan banamo Hanur Ramadhan. Urangnyo putiah rancak tinggi
samampai, mungkin dek banyak mamikiakan teknologi, kaniang liau iyo nampak tacelak
saketek. Tapi jaan salah-salah bilo da Hasnur ko galak, bisa indak nampak talingo
deknyo.
Disampiang itu, Induk Koperasi Unit Desa (INKUD) iyo pulo manugaskan Direksinyo nan
banamo Imaldi untuak manghadiri patamuanko. Bayangkan sajo sanak, uda awak ko sadang
main golof langsuang disuruah baranti dan manghadiri patamuan ko.
Lain pulo dengan perusahaan Minyak Total Ekplorasi iyo manugaskan pulo salah seorang
staf ahlinyo nan banamo Dave Saib untuak duduak pulo di partamuan ko. Bahkan karano
pentiang acarako baliaupun dikawani dek amak anak-anak. Batambah sumaraklah acarako,
walaupun kadang-kadang Mak Dave ko diganggu dek handphone baliau nan acok badariang.
Tapi baa lai, ota ko samakin lamak.
Itu perusahaan Minyak, Mak Parpatiah Darul Makmur tanyato diutus pulo dek parusahaan
'ikan basi' alias kapa lauik. Baliau pun banyak mambarikan input dalam acara ko. Dek
disalo galak jo gagasan tantang visi rantaunet mambuek rapek ko makin basumangek.
Istilah urang kini kalau lah Mak Parpatiah bacarito kito bisa tarenyuh dek liau. Baa
kaindak sanak, masalah pandidikan dan carito lapau nan mangambang diraso alun
memberikan manfaat banyak demi maso depan kampuang lai.
Hadir pulo di situ tukang angkek Tanjuang Pariuak nan banamo Miko Mikardo, nan
sahari-hari awak kenal dengan urang dapua. Pangusaha Heavy Cargo ko agaknyo
mancaritokan kasadiahnyo maurus dapua ko. "Lai ambo ka mamasak samba lamak, bahan ko
nan sarik," kecek uda nan pakai kaco mato minus ko. "Mamang susah mambangun website
rantaunet, mintak sajarah pendirian rantaunet sae lah duo tahun indak adoh nan
maagiah," tambah pendekar dari Pasia Selatan ko maibo-ibo.
Batambah lamak otako, katiko sato pulo di sinan dokter Rahyussalim. Rekan kerja dokter
Boyke nan ahli dalam bidang seksologi ko. Babagai carito jo bahaso Minang di
kamukokan, tantu otako indak jauah dari baa caro Rantaunet ka muko.
Batambah padek dek adoh pulo utusan Kantua Menteri Pariwisata nan banamo Oni Alfian.
Uda nan suko baraun-raun ko juo tak katinggalan maramaikan rapek ko. Garik sunguik uda
kito nan tinggi gadang ko, mambuek mato peserta rapek indak baraliah lai. Ditambah
pulo jo gagasan baliau nan boneh-boneh.
Indak tatinggalan pulo Untusan Kantor Menteri Pendidikan Nasional, uda Rusjdi Nurdin.
Dikawani dek rang rumah dan tigo urang --- eh ampek--- anak baliau. Baliaulah nan
manambah carito tantang awal mulo rantaunet ko badiri. Karano wakatu kuliah di Amerika
baliau tamasuak urang partamo di rantaunet. Bahkan manuruik carito, baliaupun pernah
menjadi admin rantaunet. Kini baliau mamgang Teknologi Komunikasi di Depdiknas.
Lai pulo, caritonyo Mulyadi. Utusan pengelola jaringan Networking dari Lintas Arta ko
agak senyum-senyum sajo. Maklum alun punyo rang rumah. Sahinggo dipagarahkan dek Mak
Parapatiah, mudah-mudahan sasudah partamuan ko Mulyadi nan masih baumua 23 tahun
manjadi atau mandapek induak bareh.
Baitubanalah kajadiannyo sanak. Indak katinggalan PT Satelindo nan punyo satelit
palapa mautus tenaga ahli nan lulusan ITB Banduang. Adolah uda Firdaus datang pulo
basamo rang rumah tacinto. Walaupun pulang agak capek saketek, karano kawan baliau ko
malaian dan baliau alah bajanji untuak mancaliak, namun gagasan baliaupun manjadi
bahan nan indak takiro untuak dipadebatkan.
Mungkin da Erwin indak kito caritoan lai, pokoknyo baliau nomor satu datang di rumah
Mak Bandaro nan urang Banuhampu pansiunan ARCO ko. Nan paliang kamek apo sanak? Di
saat rapek alah mambuahkan hasil sakitar pukua 16.00 uni Ben dari Chichago lansuang
manalepon. Agaknyo lapeh taragak urang rantaunet di Jabotabek mandanga suaro Ni Ben
McKosky nan terkenal dengan Katua Kito di Rantaunet Foundation ko.
Ondeh sanak, indak tabado doh sanang hati mandanga suaro tuo kito ko. Kabanyo
baliaupun marasokan hal nan samo,baa kaindak baru jago lalok di Amerika langsuang
takana hajatan kito di rumah Mak Bandaro ko. Langsuang maangkek gagal talipon dan
maapel aggota rapek surang demi surang. Kok indak malu iyo titiak aia mato haru
mandapek talipon dari Niben ko.
Nah, akhianyo sanak patamuan ko diliput dek wartawan dotcom, Tabloid Teknologi
Informasi di Jakarta nan dulu pernah manjadi wartawan almarhum Ummat dan wartawan
Singgalang yaitunyo ambo nan banamo Maifil hadir jo urang rumah nan banamo Yenni nan
didatangkan langsuang dari Padang.
OTA LAPAU
Patamuan ko diawali dengan perkenalan dari masiang-masiang nan hadir untuk saliang
kenal mangenal. Kamudian Mak Bandaro bacarito tantang apo rantaunet, sajarah dan
rencanayo dibuek dulu. Kamudian di tambah pulo dek uda Rusjdi karano baliau ko dulu
parnah jadi admin katiko sikola. Disambuang dek Miko jo uda Im.
Patamuan nan dipimpin dek Maifil alias Katik Batuahko sasudah tu membarikan kesempatan
pado dunsanak nan hadir. Tantang rapek ko nan dibari judul Mambangkik Batang Tarandam,
nan istilahko dipinjam dari uda Hasnur nan baliau kutip pulo dari Buya Hamka jo
Mohammad Natsir. Dan uda Im nan dari Inkud ko manambah kito bukan sajo mambangkik
batang tarandam tapi mambangkik batang tabanam. "Lah tabanam diimpik batu pulo lai,"
celetuk salah seorang peserta rapat dan akhianyo disambuik dek galak urang sadonyo.
Manuruik da Hasnur, komunitas rantaunet paralu membuek website nan langkok informasi
tantang Minangkabau dan Sumbar. Karano kito mampunyoi baban moral untuak mangembangkan
SDM urang awak. "Untuak itu paralu kito mancerdaskan urang Minang ko dengan informasi
yang kaya tentang kampuang dan trend modern nan dimuek di database website kito," kato
da Hasnur dari oracle ko.
"Oh itu, kito jaan talalu jauh dulu. Ambo raso iko adolah jangko panjang. Nan
pendeknyo paralu kito bantuak format baa urang rantaunet ko bisa mempengaruhi
kaputusan di kampuang. Aratinyo suaronyo bisa di danga dek pajabat dikampuang, kok
caronyo tasarah ka floor lah," kato Mak Parpatiah.
"Sabananyo bisa kaduonyo, " kato uda Firdaus Satelindo. " Bisa sajalan teknologi nan
pakai database paralu pulo untuak manyimpa informasi dan nan caro-caro manyumbangkan
pamikiran ka urang nan mamagang kaputusan di kampuang paralu pulo," tambahnyo nan
diangguakan dek da Hasnur tadi.
"Nah, rancak kito harus mambuek organisasi rantaunet ko. Nan adoh kito, kan baru OTB
(Organisasi Tanpa Bentuk) meniru istilah orde baru dulu," kato da Erwin, tatango Mak
Bandaru ko.
"Batua tu," kato da Im. "Kito harus punyo sabuah organisasi nan harus bisa terprogram,
terukur dan terkendali," kato liau mangaluakan jurus manajemennyo. "Batua, kito harus
punyo visi," kato Mak Parpatiah mandukuang.
"Sabananyo kito alah punyo Rantaunet Foundation, kabalah dipatenkan di Amerika," kato
da Rusjdi. "Tapi itu indak profit oriented," kato Mak Bandaro. "Kalau RF tu khusus
untuak kegiatan sosial urang rantaunet. Seperti memberi beasiswa anak tak mampu tapi
cerdas di kampuang, mambantu bencana alam dlll," tambah Mak Bandaro.
Akhianyo, carito ka carito hari lah laruik juo dilatakanlah rapek ko pado duo agenda.
Partamo, mambangun website dan mambuek organisasi rantaunet.
KAPUTUSAN
Adopun dari usua ka usua supayo partamuan Anggota Rantaunet Jabotabek II ko jaan mode
rapek mancik akhinyo dapek diputuihkan:
I. Website rantaunet akan dibangun. Dengan nama portal Rantaunet.com akan dilaksanakan
secara gotong -royong seluruh anggota rantaunet. Namun demikian diusulkan adoh nan
manjadi panangguang jawek. Jadi kok adoh anggota rantaunet nan akan malaporkan atau
manyumbang tulisan adoh nan mangumpuakan dan batangguangjawek tantang manajemen
kontennyo masiang-masiang.
Adapun nan diusulkan rapek untuak panangguang jawak kontent ko adolah (maaf indak
dipanggia uda, mamak, bapak atau kakak):
1. KOMERSIAL : Imaldi.
2. PARIWISATA dan TRAVEL: Oni
3. BUDAYA/SOIAL : Darul Makmur
4. KESEHATAN : DR. Rahyussalim
5. ADAT dan AGAMA : Khairi Yusuf
6. PENDIDIKAN : Rusjdi Nurdin
7. INFO PALANTA : Mak Bandaro jo Mak Sati
8. POLITIK : Maifil
9. KABA ANGEK : Maifil dan Miko
10. TEKNOLOGI : Hasnur Ramadhan
Inilah nan di usulkan untuk mamagang amanah ko, tapi sanak sadonyo berhak mambantu dan
mausuakan namo untuk kalancaran pembangunan website kito.
II. Agenda untuak Mambuek organisasi akan dijalankan, kalau floor mailinglist satuju.
Untuk iko informasinyo akan dipantau dek da Im. Dan salanjutnyo nanti akan disusun
draf AD dan ART, kamudian di adokan rapek untuk manantukan misi dan visi serta bentuk
usaha dan kegiatannyo.
Nah sanak sadonyo itulah nan tarekam dek memori ambo mulai dari suasana rapek nan di
apik jo makan basamo dan asinan asli Bogor tu. Kok adoh nan indak pado tampeknyo ambo
mohon maaf. Maklum ambo anak mudo matah nan umua alun satahun jaguang dan darah alun
satampuak pinang.
Kok adoh salah tampek jo bahaso iko hanyo untuak palamak carito. Mohon sumbang dan
sarannyo. Dari Bogor Baru rumah Mak Bandaro mantan montir lauik jawa, MAIFIL EKA PUTRA
KHATIB BATUAH malaporkan untuak sanak di palanta. Alhamdulillahirabbil alamin.
SALAM
Maifil Eka Putra, KB
LAPAU RantauNet di http://lapau.rantaunet.web.id
Isi Database ke anggotaan RantauNet:
http://www.egroups.com/database/rantaunet?method=addRecord&tbl=1
=================================================
WEB-EMAIL GRATIS ... @rantaunet.web.id ---> http://mail.rantaunet.web.id
=================================================
Subscribe - Mendaftar RantauNet Mailing List, kirimkan email
Ke / To: [EMAIL PROTECTED]
Isi email / Messages: subscribe rantau-net email_anda
Unsubscribe - Berhenti menerima RantauNet Mailing List, kirimkan email
Ke / To: [EMAIL PROTECTED]
Isi emai / Messages: unsubscribe rantau-net email_anda
=================================================
WebPage RantauNet http://www.rantaunet.web.id dan Mailing List RantauNet
adalah servis dari EEBNET http://eebnet.com, Airland Groups, USA
=================================================
