[Rantau-Net] Pamaleh

[Damrus Lukman]

Assamu'alaikum .... !!!   Manolah Angku Rang Dapua, sipangka alek di Lapau nangko. Walau Angku surang nan baimbau, wujuiknyo sambah ka nan banyak. Sambah sujuik sambah tasimpuah, sabarek bungka nan piawai. Naraco luruih main daun, indak basibak jo basisie, bukan bahinggo jo babateh.   Ujuiknyo sambah nan taunjuak, nato tawalak ka ukuran. Tabayang barih jo balabeh, bana andai kato bida. Si Joroang manggali lambah, mamakai baju biludu. Kok tadoroang ambo manyambah, sakali gawa baribu ampun.   Wujuik kato buah rundingan, limbago nan tumbuah iko kini. Lah tacewang nyato ka langik, lah tatabuah nyato ka bumi. Tumbuah sarupo iko kini, iyo buah rundingan nan talewak di lapau nangko. Kilek camin lah ka muko, kilek balewang lah ka kaki. Lah basuluah matohari, bagalanggang mato rang banyak.   Manolah Mamak rang Lapau kasadonyo � Adopun nan manjadi buah rundingan nan talewakan di lapau nangko, ado babarapo �topik� nan menarik bagi ambo. Tarutamo, tantang �managemen� urang awak. Ambo mamparatikan� �tukang photo� nan banyak batebaran di tapi-tapi jalan di seantero Induak Koto Betawi nangko. Mereka, �tukang photo� nantun, mambuka kadainyo pagi-pagi sakali, kiro-kiro pukua tujuah. Melayani �konsumen� kiro-kiro sampai pukua sambilan. Sasudah itu mereka lalok. Kok ado urang nak bakodak kiro-kiro pukua sapuluah, tapaso manokok kaco etalase untuak manjagoan tukang kodak. Tangah hari, barulah mereka jago dan melayani konsumen nan tibo ciek-dua. Manjalang patang hari, konsumen agak rami, dan mereka melayani apo adonyo. Dengan usaho sarupo iko, nampaknyo cukup mandatang hasil nan lumayan. Buktinyo, mereka bisa batahan batahun-tahun, bahkan ado nan manambah kios di tampek nan lain.� Nan manjadi pertanyaan ambo adolah, manga mereka itu indak mangarahkan usaho itu kapado paningkatan �kualitas�. Kalau awak bakodak di �Photo Studio� nan gadang, awak mambayia cukuik gadang untuak sabuah jasa nan samo jo nan dibarikan oleh �tukang photo� di tapi jalan nantun.   Baitulah Mamak-mamak dan Angku-angku rang lapau. Tantu nan harus dipikiekan adolah, baa caro men-tranformasi-kan karangko bapikie urang awak, nan cenderung agak �pamaleh�. Taimpik nak di ateh, takuruang nak di lua, baduo nak di tangah. mambagi nak banyak ka awak.   Sakitu dulu mak, labieh kurangnyo ambo mintak maaf.   Pakieh Sutan, Bekasi